Read Rejang 2 TIMOTIUS 4 Bible Online

2 TIMOTIUS 4 - Rejang bible

2 TIMOTIUS 4

¹Kristus Yesus bakea teko igai moi dunio yo utuk mukum tun-tun de idup ngen de matei; ngen Si bakea teko utuk meriteak sebagai Rajo. Kerno'o uku minoi nien ngen udi neak adep Allah ngen Kristus Yesus:

²Lokba ko melei Bito Baik kunei Allah o, terus pakso supayo tun temi'ukne, jano tobo'o lok jano coa. Lokba ko menea tun pecayo, kemten saleakne, ngen melei nasihat ngen tobo'o. Najeaba tun ngen sabar.

³Sebab bakea sapei waktaune tun coa lok igai temimo ajaran de benea. Sebelekne, tobo'o bakea temotoa kelokne suang, ngen melungguk dau gu'au utuk najea hal-hal de baik teni'uk tobo'o.

⁴Tobo'o bakea mutup ti'ukne te'adep de benea, tapi bakea temi'uk te'adep cerito-cerito dongeng.

⁵Kunyau awei o, ko harus kemuaso dirainu lem keadaan awei ipe kulo. Tabah lem saro, kemerjoba tugasnu sebagai tukang melei Bito Baik o ngen neaba ngen sebaik-baikne kewajibannu sebagai pelayan Allah.

⁶Tetang diraiku, bi sapei waktaune uku bakea matei sebagai kurban ngen Allah. Tegoa igai uku bakea teminggea dunio yo.

⁷Uku bi milau pertandingan ngen sebaik-baikne, uku bi sapei moi garis akher. Uku tep setia ngen Kristus sapei akher.

⁸Uyo bi seniap utuk uku kemenangan. Pado Bilai Kiamat, Tuhan, Hakim de adea o bakea semreak hadiah o ngen uku, kerno uku idup baik ngen Allah. Ngen iso uku bae de bakea temimo hadiah o, tapi kulo tun de kembiak indau mbot tekone Tuhan.

⁹Berusahoba supayo segro teko ngen uku,

¹⁰ kerno Demas bi teminggea uku kerno cito ngen dunio yo. Si bi lalau moi Tesalonika. Kreskes bi lalau moi Galatia, ngen Titus moi Dalmatia.

¹¹ Cuma Lukas de tinggea ngen uku. Mapetba Markus ngen mbin si besamonu, sebab si dapet temulung lem pekerjaanku.

¹² Uku bi meluak Tikhikus lalau moi Efesus.

¹³ Amen ko minyo, mbinba jubah de uku teminggea neak Troas neak umeak Karpus. Mbinba kulo bukau-bukauku, terutamo bukau-bukau de kertasne nea kunei babok.

¹⁴Aleksander, tukang tembago o, bi menea kejahatan te'adep uku. Tuhan bakea malesne sesuai ngen plepne.

¹⁵Ko suang harus teatei te'adepne, sebab si kembiak temtang bito ite.

¹⁶Pado waktau uku pertamo sekilai bela diraiku, coa ade suang kulo de temulung; kutene teminggea uku. Mudah-mudahan Allah coa semaleak tobo'o lem hal yo.

¹⁷Tapi Tuhan damping uku. Si melei kekuatan sehinggo uku sanggup melei namen kute Bito Baik o, supayo teni'uk kute tun iso Yahudi. Ngen uku selamat kunei bahayo kematian.

¹⁸Ngen Tuhan bakea bebas uku kunei tiep usaho de kidek te'adep uku. Si bakea semlamat uku, sehinggo uku masuk moi lem Kerajaan-Ne neak surgo. Bagiak-Ne ba kemuliaan selamo-lamone! Amin.

¹⁹ Salam uku ngen Priskila, Akwila ngen kute keluargo Onesiforus.

²⁰ Erastus tinggea neak Korintus, ngen Trofimus bi uku teminggea lem keadaan bolon neak Miletus.

²¹Berusahoba miyo ayok musim sengok. Salam kunei Ebulus, Pudes, Linus ngen Klaudia ngen kunei kute Saudaro do imen

²²Semoga Tuhan damping ko. Semoga Tuhan memberkati Saudaro-saudaro! Hormat keme, Paulus