Read Rejang FILEMON 1 Bible Online

FILEMON 1 - Rejang bible

FILEMON 1

¹Saudaro Filemon, kuat keme! Uku, Paulus, suang tahanan kerno Kristus Yesus, besamo ngen saudaro ite Timotius, temulis su'et yo ngen ko

² ngen jemaat de bekopoa neak umeaknu; kulo ngen kuat ite Apfia ngen Arkhipus.

³Keme ma'ep supayo Allah Bapa ite ngen Tuhan Yesus Kristus melei berkat ngen sejahtera ngen ko.

⁴Tiep kilai uku bedu'o, uku sembut gen Saudaro ngen mucep mokasiak ngen Allah.

⁵Sebab uku temi'uk bahwo Saudaro sungguak-sungguak pecayo ngen Tuhan Yesus, mengasihi kute umat Allah.

⁶Uku bedu'o semoga persaudaraan ite sebagoi tun-tun pecayo bakea dapet asea pengertian de lebiak lai das kute berkat de ite temuan kerno jijai do ngen Kristus.

⁷Saudaro Filemon, kasiaknu te'adep kute umat Allah, bi menea uku jijai riang ngen kuet. Kute umat Tuhan jijai riang kerno Saudaro.

⁸Kerno o, sebagai suang saudaro do imen, uku nam bae meriteak saudaro utuk menea jano de harus saudaro menea.

⁹Tapi kerno uku mengasihi saudaro, uku cuma minoi bae. Uku yo tun tu'ai ngen uyo dong nasuk sel kerno Kristus Yesus.

¹⁰ Uku, Paulus, minoi ngen ko tetang Onesimus, anok uku de lem Kristus. Sebab neak lem sel yo uku bi jijai bak aketne.

¹¹Bel'o si coa ade guno utuk nu, tapi uyo si ade gunone, iso bae utuknu, tapi utukku kulo.

¹²Uyo tun de uku kasihi o uku mbo igai ngenko.

¹³Sebeneane uku lok tema'en si besamo uku sebagai giteiko, selamo uku tena'en lem sel yo kerno melei namen Bito Baik kunei Allah.

¹⁴Tapi uku coa lok menea jejano amen uku ati minoi ngen ko. Uku lebiak galok amen ko meneane ngen rela; uku coa lok makso ko.

¹⁵Mukin Onesimus ce'ei kunei saudaro utuk sementaro waktau supayo Saudaro nam dapet si igai utuk selamone.

¹⁶Uyo si iso cuma suang hamba utuk saudaro; si lebiak kunei o. Si adeba sesamo tun Kristen de tecito. Si beguno sekilai utuk ku, jano igai utuknu! Paset si beguno sekilai baik sebagai hamba atau sebagai saudaro neak lem Tuhan!

¹⁷Kerno Saudaro manggap uku kuat sesamo Kristen, temimoba igai Onesimus serai awei saudaro temimo uku.

¹⁸Amen si besaleak atau ade utang ngen ko, kunyauba uku de temanggung kutene.

¹⁹Nah, baikba uku temulisne suang neak piyo: Uku, Paulus, bakea masen kutene. (Paset coa perlu uku minget bahwo Saudaro suang temuan utang ngen uku, adeba kehidupannu de blau sebagai tun Kristen.)

²⁰Sebab o, demi Tuhan cuboba tulung uku, riangba ateiku sebagai saudaro neak lem Kristus.

²¹Uku temulis su'et yo kerno yakin bahwo Saudaro bakea menea jano de uku minoi. Bahkan uku namen Saudaro bakea menea lebiak kunei o.

²²Sementaro o, tulung sedio kamar utuk uku neak umeaknu, sebab uku ma'ep Allah kemabul du'o Saudaro-saudaro kutene ngen mbin uku belek ngen udi.

²³ Epafras, de ade besam uku lem sel kerno Kristus Yesus, mbo salamne ngenko.

²⁴ Temimoba kulo salam kekuatku: Markus, Aristarkhus, Demas ngen Lukas.

²⁵Semoga Tuhan Yesus Kristus melei berkat ngen udi. Hormat keme, Paulus