Read Rejang IBRANI 1 Bible Online

IBRANI 1 - Rejang bible

IBRANI 1

¹Pado jaman bel'o dau nien Allah miling ngen ninik puyang te liwet nebai-nebai ngen memecem ca'o.

²Tapi pado zaman akhir yo Si miling ngen ite liwet Anok-Ne. Liwet Anok-Ne dioba Allah jemijai alam semesta. Allah sudo temtau bahwo Anok-Ne ba kulo de berhok temuan kutene yo.

³Si adeba cahayo kemuliaan Allah, Siba wujud nyato kunei dirai Allah suang. Siba kulo de miaro keutuhan alam semesta yo ngen sabda-Ne de kembiak bekuaso. Sesudo Si temtau manusio utuk bebas kunei duso-duso tobo'o, Si mipin pemerintahan neak surgo besamo-samo Allah, Penguaso de paling lekat.

⁴Anok o dapet paket de uak lebiak lekat kunei malaikat, gen de nelei Allah ngen-Ne kulo uak lebiak terhormat kunei gen de nelei ngen malaikat.

⁵ Coa perneak Allah madeak awei yo ngen suang malaikat. “Koba Anok-Ku; pado bilai yo Uku jijai Bapa-Nu.” Coa perneak kulo Allah madeak awei yo tetang malaikat ipe bae, “Uku bakea jijai Bapa-Ne, Si bakea jijai Anok-Ku.”

⁶ Tapi pado waktau Allah mutus Anok tuai-Ne moi dunio yo, Allah madeak awei yo, “Kute malaikat Allah wajib nyembeak Anok o.”

⁷ Tetang malaikat-malaikat, Allah madeak awei yo, “Allah menea malaikat-malaikat-Ne jijai angin, ngen pelayan-pelayan-Ne jijai opoi.”

⁸ Tapi ngen Anok o, Allah madeak, “Takhta-Nu, ya Allah, bakea kekal selamo-lamone! Pemerintahan-Nu adeba pemerintahan de adea.

⁹Ko tujau ngen keadilan, jengik ngen de coa benea; do'oba sebabne Allah, Allah-Nu, miliak Ko ngen melei ngen-Ko kehormatan de menea sukacita, lebiak kunei kekuat-Nu.”

¹⁰ Allah madeak kulo, “Ko, Tuhan, pado mulone jemijai bumai, ngen Ko suang menea lenget.

¹¹Kutene o bakea nyep, ngen jijai tuai awei keracok; tapi Ko coa bakea bubeak.

¹²Alam semesta yo bakea Ko melipet awei bajau, ngen bakea Ko gitei ngen de luyen. Tapi Ko coa perneak bubeak, ngen idup-Nu coa bakea berakhir.”

¹³ Allah coa perneak madeak awei yo ngen suang malaikat kulo, “Temotba neak peak kanen-Ku, sapei musuak-musuak-Nu tunduk ngen-Ko.”

¹⁴Amen awei o, malaikat-malaikat o jano sebeneane? Tobo'o adeba roh-roh de melayan Allah, de neluak Allah utuk temulung tun-tun de bakea tenimo keselamatan.