Read Rejang IBRANI 10 Bible Online

IBRANI 10 - Rejang bible

IBRANI 10

¹Hukum agamo Yahudi cuma melei gambaran de coa jelas tetang hal-hal de baik de bakea teko, iso gambaran de sebeneane kunei hal-hal o. Coa mukin hukum o dapet jemijai tun de teko nyembeak Allah ngen mbin persembahan, jijai sempurno, Kunyau tiep taun melei kurban-kurban de serai.

²Amen tun-tun de nyembeak Allah o benea-benea bi senucai kunei duso, tobo'o coa igai bakea temuan perasaan beduso, kurban coa bakea nelei igai.

³Tapi nyatone kurban-kurban de nelei tiep taun o menea tun inget ngen duso-duso tobo'o,

⁴sebab memang daleak sapai ngen kambing sebong coa mapus duso.

⁵ Do'oba sebabne waktau Kristus masuk moi dunio, Si madeak ngen Allah, “Ko coa lok kurban ngen persembahan; sebelekne Ko bi semiap awok utuk-Ku.

⁶Ko coa layak utuk kurban bakaran atau kurban utuk pengampunan duso.

⁷Lajau uku madeak, ‘Dioba Uku, ya Allah! Uku teko utuk menea kelok-Nu, awei de tetulis tetang dirai-Ku neak lem Kiteb Sucai.’ ”

⁸Mulo-mulo Kristus madeak, “Ko coa lok kurban ngen persembahan; Ko coa layak utuk kurban benatang de nembem sebagai persembahan ngen kurban utuk pengampunan duso.” Kristus madeak awei o, kunyau kute kurban o senreak temurut hukum agamo Yahudi.

⁹Sesudo'o Kristus madeak, “Dioba Uku, ya Allah! Uku teko utuk kemerjo kelok-Nu.” Jijai Allah mapus kute kurban de an o, gemiteine ngen kurban Kristus.

¹⁰Yesus Kristus bi menea jano de kenlok Allah ngen semreak dirai-Ne sebagai kurban. Ngen persembahan o, de nea-Ne cuma debat bae utuk seke'anne, ite kute senucai kunei duso.

¹¹ Tiep imem Yahudi maneu tugasne sebagai imem tiep-tiep bilai, cet si melei kurban-kurban de serai. Tapi kurban-kurban o samo sekilai coa dapet mapus duso.

¹² Sebelekne, Kristus melei cuma do kurban utuk pengampunan duso, kurban o berlaku utuk selamo-lamone. Sesudo melei kurban o, Kristus temot neak peak kanen Allah ngen meriteak besamo-samo ngen Si.

¹³Ngen uyo Kristus mbot sapei Allah menea musuak-musuak-Ne tunduk ngen-Si.

¹⁴Jijai ngen do kurban, Kristus menea tun-tun de sudo senucai kunei duso jijai sempurno.

¹⁵Tetang hal o Roh Allah melei kulo saksai-Ne ngen ite. Roh Allah madeak,

¹⁶ “ ‘Dioba janjai de Uku nea ngen tobo'o pado bilai-bilai de bakea teko,’ nadeak Tuhan, ‘Uku bakea mpek hukum-hukum-Ku moi lem atei tobo'o, ngen temulisne moi lem pekeran tobo'o.’ ”

¹⁷ Allah kulo madeak, “Uku bakea coa tinget duso-duso ngen kejahatan-kejahatan tobo'o.”

¹⁸Jijai, duso-duso ngen kejahatan-kejahatan o bi napun, mako coa perlu igai nelei kurban utuk pengampunan duso.

¹⁹Nah, Saudaro-saudaro, kerno mateine Yesus o ite uyo binai masuk Ruang Mahasucai.

²⁰Yesus bi mukok dalen de blau utuk ite, adeba dalen de melei kehidupan. Dalen o liwet tabir, adeba awok Yesus suang.

²¹Ngen uyo ite temuan suang imem de agung, de betanggung jawab das Umeak Allah.

²² Kerno o, maroba ite ma'ok Allah ngen atei tulus ngen imen de kuet; ngen atei de sudo senucai kunei asai saleak, ngen awok de sudo senucai ngen bioa de sucai.

²³Lokba ite bepegong teguh ngen harapan de ite pecayo, sebab Allah dapet cenayo ngen Si bakea tempat janjai-Ne.

²⁴Ngen lokba ite samo melei perhatian, supayo ite dapet samo melei dorongan utuk mengasihi sesamo ngen menea hal-hal de baik.

²⁵Lokba ite tep kopoa besamo-samo, jibeakba laloi awei tun luyen. Ite justru harus lebiak setia samo-samo melei kekuatan, sebab ite namen bahwo coa an igai Tuhan bakea teko.

²⁶Sebab amen bito de benea kunei Allah bi senapei ngen ite, tapi ite trus bae sengajo menea duso, mako coa ade igai kurban utuk mapus duso ite.

²⁷ Dodone de ade utuk ite adeba madep pengadilan Allah ngen opoi de kembiak lai de bakea mbem kute tun-tun de melawen Si!

²⁸ Tun de coa taat ngen hukum de nelei Musa, nhukum matei ngen coa ade apun, amen das saksai duai atau tlau tun, si tebukti besaleak.

²⁹ Padeak kebenek hukuman de harus nelei das tun de melat Anok Allah. Tun o manggap hino daleak perjanjian Allah, adeba mateine Kristus de bersih Si kunei duso. Si mino Roh kasiak karunio.

³⁰ Ite namen api si de madeak, “Uku bakea males!” ngen de madeak, “Tuhan akan menghakimi umat-Ne.”

³¹Padeak ngerine amen us moi tangen Allah De Idup!

³²Ingetba awei ipe keadaan Saudaro-saudaro pado waktau de sudo. Pado waktau o, sesudoh cahayo Allah menyinarimu, udi dau menderita; tapi udi tep bejuang ngen gigih.

³³Ade tikone udi nino, kelokne bae tun menea udi neak muko umum. Ade tikone kulo udi meding saro ngen tobo'o de nea awei o,

³⁴ngen udi meding ibo tun de neak lem sel. Ketiko kute de udi temuan mok tun, udi temimo o ngen riang atei, sebab udi namen bahwo udi masiak temuan suaktau de lebiak baik, de bakea taen sekeanne.

³⁵Kerno o, jibeakba putus asa, sebab amen udi tep pecayo, mako ade upeak de lai utuk do'o!

³⁶Udi perlu sabar, supayo udi dapet menea kelok Allah ngen awei o temimo jano de jenanjai-Ne.

³⁷ Sebab lem Kiteb Sucai tetulis, “Cuma tegoa igai, mako Si de bakea teko o, bakea segro teko; Si coa bakea menunda-nunda teko-Ne

³⁸Ngen umat-Ku benea bakea pecayo ngen idup; tapi amen ade neak antaro udi de mondor, mako Uku coa bakea senang ngen si.”

³⁹Ite yo iso umat de mondor ngen sesat. Sebelekne, ite adeba umat de pecayo ngen Allah, de senlamat-Ne.