Read Rejang IBRANI 11 Bible Online

IBRANI 11 - Rejang bible

IBRANI 11

¹Berimen taine yakin sungguak-sungguak ngen hal-hal de na'ep, taine temuan kepastian ngen hal-hal de coa kenliak.

²Kerno berimen, mako tun-tun zaman bel'o sennang Allah.

³ Kerno berimen, mako ite ngertai bahwo alam yo jenijai ngen Firman Allah; jijai, jano de dapet kenliak, tejijai kunei jano de coa dapet kenliak.

⁴ Kerno berimen, mako Habel semreak ngen Allah kurban lebiak baik kunei kurban Kain. Kerno imenne o, Habel tenimo Allah sebagai tun de baik, sebab nyatoba bahwo Allah temimo persembahanne. Habel sudo ninggea, tapi kerno imenne o, mako si masiak miling sapei uyo.

⁵ Kerno imen, mako Henokh coa matei, tapi naket ngen nembin moi Allah. Coa suang kulo dapet temau si, sebab si sudo naket Allah. Lem Kiteb tetulis bahwo ayok Henokh naket, si semnang atei Allah.

⁶Coa ade imen, coa suang kulo dapet semnang atei Allah. Sebab tun de teko ngen Allah harus pecayo bahwo Allah ade, ngen bahwo Allah melei bales ngen tun de mesoa-Ne.

⁷ Kerno berimen, mako Nuh nelei namen Allah tetang hal-hal de bakea tejijai konyo, de coa dapet kenliakne. Nuh taat ngen Allah sehinggo si menea debuek kepea de konyo tenyato semlamat diraine besamo keluargone. Ngen awei yo dunio nhukum, tapi Nuh suang kerno imenne Allah madeak sebagai tun baik.

⁸ Kerno berimen, mako Abraham taat, Allah menok ngen meluak lalau moi negrai de Allah jemanjai ngenne. Lajau Abraham berakat ngen coa namen moi ipe bakea lalau.

⁹ Ngen imen, Abraham tinggea sebagai tun asing neak negrai de jenanjai Allah ngenne o. Abraham tinggea neak di lem kemah. Awei'o kulo Ishak ngen Yakub, de temimo janjai de serai kunei Allah.

¹⁰Sebab Abraham gidong mbot kota de rencano ngen nea Allah ngen pondasi de kuet.

¹¹ Kerno berimen, mako Abraham dapet anok kunei Sara, kunyau Abraham bi tuai nien, ngen Sara suang temanang. Sara yakin bahwo Allah bakea menepati janjai-Ne.

¹² Kunyau Abraham waktau o awei tun do sudo matei awokne, tapi si dapet dau keturunan, de daune coa teitung — awei daune bitang neak lenget ngen benei neak patoi.

¹³ Kute tun o tep beriman sapei matei. Tobo'o coa temimo hal-hal de jenanjai Allah, tapi cuma kemliak ngen semambutne kunei uak. Ngen o tobo'o madeak bahwo tobo'o cuma tun asing ngen peratau neak bumai yo.

¹⁴Tun de madeak awei o temunjuk ngen jelas bahwo tobo'o dong mesoa negrai de bakea jijai taneak tanai tobo'o.

¹⁵Iso negrai de sudo tobo'o teminggea o de tobo'o meker. Sebab amen awei o, mako sudo dau kesepatan bagiak tobo'o utuk belek moi negrai o.

¹⁶Tapi nyatone, tobo'o indau debuak negrai de lebiak baik, negrai de neak surgo. Do'oba sebabne Allah coa selek amen tobo'o sembut Si Allah tobo'o, sebab Allah sudo sendio debuak kota utuk tobo'o.

¹⁷ Kerno berimen kulo, mako Abraham melei Ishak sebagai kurban ketiko si cenubo Allah. Ngen Abrahamba Allah melei janjai-Ne, tapi Abraham rela semreak anokne dedone o.

¹⁸ Allah bi madeak ngen Abraham, “Liwet Ishak dioba ko bakea dapet anok de Uku jemanjai ngenko.”

¹⁹Abraham yakin bahwo Allah sangup midup igai Ishak kunei matei — jijai, buliak nadeak, Abraham sudo temimo igai Ishak kunei matei.

²⁰ Kerno imen, mako Ishak jemanjai berkat-berkat ngen Yakub, Esau utuk maso konyo.

²¹ Kerno berimen, mako ayok Yakub ningea, Si melei berkatne ngen anok-anok Yusuf — ngen besandea neak ulau tokotne ngen nyembeak Allah.

²² Kerno imen, mako Yusuf — ketiko gesea ninggea — miling kelueane umat Israel kunei Mesir, teminggea pesen tetang jano de harus nea teadep mayitne.

²³ Kerno imen, mako tun tuai Musa munyin telau bulen anne sesudo laherne. Tobo'o kemliak bahwo si suang anok de baes, ngen tobo'o coa saben melawen priteak rajo.

²⁴ Kerno imen, mako Musa sesudo lai, coa lok senbut anok kunei smulen rajo Mesir.

²⁵Si lebiak tujau saro besamo-samo ngen umat Allah kunei pado utuk sementaro waktau midep kesenangan kunei idup de beduso.

²⁶Musa meding bahwo uak lebiak behargo utuk dapet penghinaan demi Rajo Penyelamat de jenanjai Allah o daripado dapet kute hok negrai Mesir, sebab Musa ma'ep upeak neak kedong bilai.

²⁷ Kerno berimen, mako Musa teminggea Mesir ngen coa saben teadep Rajo mengiak. Musa temujau tujuanne seolah-olah si coa kemliak Allah de coa keten o.

²⁸ Kerno berimen, mako Musa made Paska ngen mriteak kunyau necik daleak neak bang umeak tun Israel supayo Malaikat maut jibeak munuak anok-anok tuai tobo'o.

²⁹ Kerno imen, mako tun-tun Israel dapet sembeang laut mileak, seolah-olah tobo'o paneu neak das taneak de keing, tapi tun-tun Mesir tenlen laut o, ketiko tobo'o cemubo sembeang kulo.

³⁰ Kerno imen, tun-tun Israel menea tembok-tembok Yerikho ubuak sesudo tobo'o kemliling tujuak bilai anne.

³¹ Kerno berimen kulo, mako Rahap, selawei nakea o, coa milau matei ngen tun-tun de melawen Allah; sebab si temimo ngen ramah matai-matai Israel.

³² Nah, uku pacok bae terus miling, tapi waktau coa cukup utukku. Sebab uku ati igai sembut Gideon, Barak, Simson, Yefta, Daud, Samuel, ngen Nebai-nebai.

³³ Kerno berimen, mako tobo'o sudo maleak rajo-rajo. Tobo'o menea jano de benea, sehinggo temimo jano de jenanjai Allah. Tobo'o temutup bibia-bibia jegau.

³⁴ Madem opoi de lai, coa keno tikem pedang. Tobo'o coa dayo, tapi jijai kuet; tobo'o perkasa maleak pasukan-pasukan bangso asing.

³⁵ Kerno berimen, mako selawei-selawei dapet igai tun-tunne de bi matei, sebab tobo'o nidup igai. Ade kulo de rela senikso sapei matei, ngen temulok utuk bebas, kerno lok nidup igai debuak kehidupan de lebiak baik.

³⁶ Ade de cenimet, cenambuk, neket ngen ratoi ngen de nasuk moi lem penjara.

³⁷ Tobo'o neluk butau sapei matei, ade de notong ngen gesek, ngen ade de nunuak ngen pedang. Tobo'o meratau ngen kracok kunei babok bebirai atau babok kambing; tobo'o peset, ngen senikso.

³⁸Bumai yo iso penan de layak utuk tobo'o. Tobo'o meratau igai neak padang gurun ngen neak tebo-tebo, serto tingea neak lem guo-guo ngen lem lubang-lubang taneak.

³⁹Alangkah laine kemenangan de dapet kunei kute tun o kerno imen tobo'o! Namun tobo'o coa temimo jano de jenanjai Allah,

⁴⁰sebab Allah ade rencano de lebiak padek utuk te. Rencano-Ne adeba bahwo cuma besamo ngen te, tobo'o bakea jijai sempurno.