Read Rejang IBRANI 12 Bible Online

IBRANI 12 - Rejang bible

IBRANI 12

¹Nah, tetang ite suang, neak skliling te ade dau sekilai saksai! Sebab o, maroba ite muang kute de jijai beban ite ngen duso de terus melket ngen ite. Maroba ite ngen tekun temotoa perlombaan de ade neak adep te.

²Kenlokba pandangan te tetujuak ngen Yesus, sebab Siba de mbangkit imen te ngen meliharo kunei muloi sapei sudo. Yesus taen saro neak kiyeu salib! Si cao pedulai bahwo matei neak kiyeu salib o adeba debuak hal de semelek. Si cuma inget akan kegembiraan de bakea de neding-Ne sesudo'o. Uyo si temot neak depeak kanen takhta Allah ngen meriteak besamo ngen Si.

³Cubo meker akuaro sarone Yesus madep tun-tun beduso de melawen-Si ngen kembiak sengit! Sebab o jibeakba titik atei ngen putus smanget.

⁴Sebab lem perjuangannu melawen duso, udi coa perneak bejuang sapei harus temupeak daleak.

⁵ Jibeakba coa inget nasehat Allah yo, de nelei ngenko sebagai anok-anok-Ne: “Anok-Ku, kenliakba bebaik ajaran Tuhan, ngen jibeakba titik atei amen Tuhan mengiakko.

⁶Sebab Tuhan majea tiep tun de kenasiak-Ne, ngen si cemambuk tiep-tiep tun de nakau-Ne sebagai anok-Ne.”

⁷Lokba udi temimo cambukan kunei Allah sebagai debuak hajaran kunei suang Bapak. Sebab jano perneak suang anok coa Bakne nhukum?

⁸Amen udi coa temurut hukum awei kute anokne de luyen yo berartai iso anok sah, tapi anok de coa sah.

⁹Ite temuan bapok neak dunio. Si majea ite, ngen ite menghormati ne. Jano igai te'adep Bapa rohani ite de neak surgo, paset ite harus lebiak igai tunduk ngen-Ne supayo ite idup.

¹⁰Tun tuai te de neak dunio majea ite cuma lem waktau de tebatas, temurut jano de tobo'o meraso baik. Tapi Allah majea ite utuk kebaik ite suang, supayo ite dapet jijai sucai besamo-samo ngen Si.

¹¹Memang pado waktau ite najea, hukuman o coa semnang atei ite, meluyen cuma menea ibo bae. Tapi sesudo'o, utuk ite de sudo najea, hukuman o jijai sebab ite idup temurut kelok Allah, menea perasaan sejahtera utuk ite.

¹² Sebab o, kenuetba tangennu de lemah ngen ketotnu de kemtea o!

¹³ Bogoa paneuba neak dalen de rato, supayo kekeanu de picang o coa teklis, tapi malah jijai ka'en.

¹⁴Berusahoba utuk idup damoi ngen kute tun. Berusahoba kulo utuk idup sucai, khusus utuk Tuhan. Sebab coa suang kulo dapet kemliak Tuhan amen si coa idup awei o.

¹⁵ Jagoba jibeak sapei ade suang kulo de keluea kunei lingkungan kebaikan atei Allah, supayo jibeak ade de jijai awei tanem de ade acun neak tengeak-tengeak udi sehinggo timboa saro ngen musak dau tun ngen acunne.

¹⁶ Jagoba supayo jibeak ade de idup cabul atau coa mego hal-hal rohani, awei de nea Esau. Si jemua hokne sebagai anok tuai, cuma utuk do makuk kembuk.

¹⁷ Udi namen bahwo sesudo'o Esau lok dapet berkat o kunei bapokne, tapi si tenulok. Sebab kunyau ngen ngindoi si mesoa dalen utuk menea kesalahanne jijai baik, kesepatan utuk o coa ade igai.

¹⁸ Saudaro-saudaro coa teko madep sesuaktau awei de nadep bangso Israel bel'o. Tobo'o madep sesuaktau de pacok nabo, adeba Tebo Sinai ngen opoine de lai; tobo'o madep kegelapan, kelem ngen badai;

¹⁹tobo'o madep sa'ei terupet, sa'ei de lek. Ketiko tun-tun Israel temi'uk sa'ei o, tobo'o minoi nien supayo sa'ei o coa miling igai ngen tobo'o.

²⁰ Sebab tobo'o coa taen temi'uk periteak de senapei sa'ei o. Kerno sa'ei o madeak, “kute de mabo tebo yo, coa dulai jano do'o benatang atau api bae kulo, harus neluk ngen butau sapei matei.”

²¹ Jano de kenliak tun-tun Israel o kembiak baik sapei Musa madeak, “Uku saben ngen kemtea!”

²²Sebelekne, udi bi teko moi Tebo Sion ngen kota Allah de idup, adeba Yerusalem de neak surgo ngen beribau malaikatne.

²³Udi temotoa sesuaktau pertemuan de meriah — pertemuan anok-anok tuai Allah, de genne ade neak lem surgo. Udi teko madep Allah, Hakim kute umat manusio. Udi madep roh-roh tun-tun baik, de sudo jijai sempurno.

²⁴ Udi teko madep Yesus, Pengantara utuk janjai de belau o; udi madep daleak percikan de menjamin hal-hal de uak lebiak baik kunei de jenamin daleak Habel.

²⁵ Kerno o, teateiba jibeak sapei udi coa lok temi'uk Si de miling o. Tobo'o de coa lok temi'uk Si de teko moi bumai ngen semapei bito kunei Allah, coa nam lalau. Jano igai ite yo de temi'uk Si de miling kunei surgo! Amin ite coa lok temi'uk-Ne, coa mukin ite dapet bebas!

²⁶ Pado waktau o sa'ei-Ne gemuyang bumai. Tapi uyo Si bejanjai, “Debat igai, Uku bakea gemuyang iso bumai bae tapi lenget kulo.”

²⁷Kecek “debat igai” kemten bahwo kute dunio de sudo nea bakea gemuyang ngen senikia, supayo de tinggea cuma de coa dapet genuyang.

²⁸Kerno o, lok ba ite mucep mokasiak ngen Allah, karno ite temimo kunei Si sesuaktau kerajaan de coa dapet genuyang. Lokba ite mokasiak, beribadah ngen Allah. Hormat ngen saben, temurut ca'o de kenlok-Ne suang.

²⁹ Sebab Allah ite awei opoi de menea jijai mutung.