Read Rejang IBRANI 13 Bible Online

IBRANI 13 - Rejang bible

IBRANI 13

¹Lokba udi tep mengasihi do ngen de luyenne sebagai tun-tun Kristen de besaudaro.

² Jibeak segan temimo neak umeaknu tun-tun de ati udi kenal. Sebab ngen menea de awei o, perneak tun, coa sadar, bi temimo malaikat neak umeakne.

³Ingetba tun-tun de neak lem sel, seolah-olah udi ade neak lem sel besamo tobo'o. Ngen tun-tun de nea sekelokne bae, lokba udi inget ngen tobo'o seolah-olah udi kulo nea awei o.

⁴Kute tun harus kemten sikep hormat teadep perkawinan, do'o sebabne lokba maten-ngenyan setia do ngen de luyen. Tun de cabul ngen tun de berzinah bakea nhukum Allah.

⁵ Jibeakba idupnu kenuaso caci, tapi lokba udi pues ngen jano de ade. Sebab Allah bi madeak, “Uku coa bakea munyau atau bakea teminggea ko.”

⁶ Sebab o ite binai madeak, “Tuhan adeba penulungku, uku coa saben. Jano de dapet manusio nea teadepku?”

⁷Jibeakba coa tinget ngen pemipin-pemipinnu de semapei pesen Allah ngen ko. Kemliakba awei ipe tobo'o idup ngen awei ipe tobo'o matei, contohba imen tobo'o.

⁸Yesus Kristus tep serai, baik bel'o, uyo, sapei selamo-lamone.

⁹Jibeakba munyau kute mecem ajaran de seseleh semset udi. Atei ite harus kenuet ngen kebaikan atei Allah, do'oba de baik; jibeak ngen peraturan-peraturan tetang kembuk. Tun-tun de bel'o taat ngen peraturan-peraturan o coa dapet utungne.

¹⁰Ite temuan debueak mezbah utuk melei kurban ngen Allah. Ngen imem-imem de jijai pelayan neak lem Kemah Tuhan, coa ade hok mbuk kurban de ade neak das mezbah o.

¹¹ Daleak benatang de nelei sebagai kurban utuk mapun duso, nembin Imem Lai moi Ruang Mahasucai, tapi bukei benatang o suang nembem moi luea kemah.

¹²Do'oba sebabne Yesus kulo matei neak luea gerbang kota utuk semucai umat-Ne kunei duso ngen daleak-Ne suang.

¹³Kerno o, maroba ite lalau ngen-Si moi luea kemah ngen milau hino tun besamo Si.

¹⁴Sebab neak bumei coa ade penan tinggea de kekea utuk ite; ite mesoa penan tinggea de bakea teko.

¹⁵Sebab o, liwet Yesus, lokba ite bogoa mujai-mujai Allah; do'o adeba kurban syukur ite ngen-Si, de ite melei liwet ucapan bibia utuk memuliakan gen-Ne.

¹⁶Ingetba utuk menea baik ngen saling temulung, sebab dioba kurban-kurban de semnang atei Allah.

¹⁷Totoaba periteak pemipin-pemipinnu, hormatba ngen tobo'o. Sebab tobo'o bogoa kemliak jiwonu, tobo'o harus betanggung jawab ngen Allah. Amen udi taat ngen tobo'o, tobo'o dapet kerjo ngen senang atei; amen coa, mako tobo'o bakea kerjo ngen atei ibo, do'o coa mbin utung utuk udi.

¹⁸Terusba bedu'o utuk keme. Keme yakin atei nurani keme sucai, sebab lem kute hal keme bogoa lok menea jano de benea.

¹⁹Khususne uku minoi nien, supayo udi demu'o uku supayo Allah segro mbin uku belek igai ngen ko.

²⁰Allah bi midup Tuhan ite Yesus kunei matei. Kerno matei-Ne o Si uyo jijai Gembala Agung bagiak ite, adeba bebirai-bebirai-Ne. Kematian-Ne o kulo mbin igai perjanjian kekal de nea Allah ngen ite.

²¹Semoga Allah sumber sejahtera o mlekep udi ngen kute de baik de udi perlu utuk menea kelok-Ne. Semoga liwet Yesus Kristus, Allah kemerjo neak lem ite, jano de kenlok-Ne. Lokba Kristus nujai selamo-lamone! Amin.

²²Uku minoi supayo udi temi'uk nasihat-nasihat uku yo ngen sabar, sebab su'et yo coa kembiak panjang.

²³Lokba udi namen bahwo saudaro ite Timotius bi bebas kunei sel. Amen si bi moi penan ite yo, uku bakea mbinne waktau uku semulau udi sudoyo.

²⁴Semapeiba salam keme ngen kute umat Allah. Temimoba kulo salam kunei saudaro-saudaro neak Italia.

²⁵Semoga Tuhan memberkati Saudaro kutene.