Read Rejang IBRANI 3 Bible Online

IBRANI 3 - Rejang bible

IBRANI 3

¹Saudaro-saudaro sesamo Kristen de sudo nok Allah! Cubo peker lem-lem tetang Yesus yo! Allah mutus Si khusus utuk jijai Imem Lai lem agamo de ite pegong.

² Si setia ngen Allah de sudo miliak si utuk kerjo o, awei Musa bel'o setia kemerjo tugasne neak Umeak Allah.

³Tapi Yesus patut dapet kehormatan lebiak lai kunei Musa. Kerno tun de temgok umeak harus dapet kehormatan lebiak lai kunei umeak o suang.

⁴Memang tiep umeak ade de meneane, tapi de menea kute sesuaktau adeba Allah suang.

⁵Musa setia sebagai pelayan neak Umeak Allah ngen semapei hal-hal de bakea nelei namen Allah pado maso de bakea teko.

⁶Tapi Kristus setia sebagai Anok de betanggung jawab das Umeak Allah. Ite adeba Umeak Allah, amen ite tep semangat ngen tep yakin utuk dapet jano de ite kenlok.

⁷ Kerno o, awei nadeak Roh Allah, “Amen pado bilai yo udi temi'uk saei Allah,

⁸jibeakba ko telo ulau, awei ninik puyangnu, ketiko tobo'o brutak teadep Allah, ngen cemubo Allah neak padang gurun.

⁹‘Neak di ninik puyang cemubo Uku, ngen temrai Uku,’ nadeak Allah, ‘Padahal tobo'o bi kemliak perbuatan-Ku pat puluak taun keanne.’

¹⁰Do'oba sebabne Uku kembiak mengiak teadep tobo'o ngen Uku madeak, ‘Tobo'o bogoa coa setia, ngen coa lok taat ngen periteak-periteak-Ku.’

¹¹Uku mengiak ngen besupeak, ‘Tobo'o coa bakea masuk moi negrai o utuk dapet istirahat besamo Uku.’ ”

¹²Saudaro-saudaro, teateiba jibeak sapei ade neak antaro udi de ateine kembiak kidek ngen coa ade imen, sehinggo si coa pecayo ngen me'uak Allah de idup!

¹³Jijai, supayo coa ade suang kulo kunei udi de keno pike ngen duso sehinggo melawen Allah, lokba udi saling melei nasihat tiep bilai selamo ite masiak idup lem zaman de senbut “Bilai Yo” lem Kiteb Sucai.

¹⁴Ite kute adeba kuat seperjuangan ngen Kristus, asal ite sapei akhir tep yakin de ite temuan pado mulone.

¹⁵ Dioba de tetulis lem Kiteb Sucai, “Amen pado bilai yo udi temi'uk saei Allah, jibeakba udi telo ulau, awei ninik puyangnu, ketiko tobo'o mbrutak teadep Allah.”

¹⁶ Nah, api tun-tun de temi'uk saei Allah lajau mbrutak teadep-Ne? Do'oba kute tun de nipin Musa keluea kunei Mesir, iso?

¹⁷Ngen teadep api Allah mengiak pat puluak taun keanne? Teadep tobo'o de beduso, de matei neak padang gurun, iso?

¹⁸Ketiko Allah besupeak awei yo, “Tobo'o coa bakea masuk moi negrai o utuk dapet istirahat besamo-Ku” — api kulo de Allah maksud? De maksud Allah adeba tun-tun de mbrutak teadep Allah, iso?

¹⁹Uyo ite ngertai bahwo tobo'o coa dapet masuk, kerno tobo'o coa pecayo ngen Allah.