Read Rejang IBRANI 4 Bible Online

IBRANI 4 - Rejang bible

IBRANI 4

¹Nah, janjai Allah masiak berlaku, ite bakea nelei istirahat de jenanjai-Ne. Jijai, lokba ite jemago supayo jibeak ade suang kulo kunei udi de coa meding istirahat de jenanjai o.

²Kerno Bito Baik o bi nelei namen ngen ite serai ngen tobo'o. Tapi ngen tobo'o, bito o coa de gunone. Kerno ketiko tobo'o temi'ukne, tobo'o coa pecayo.

³ Tapi ite de pecayo temimo istirahat de jenanjai Allah o. Do'o cocok ngen jano de nadeak Allah, awei yo, “Uku mengiak ngen supeak, ‘Tobo'o coa bakea masuk utuk dapet istirahat besamo Uku.’ ” Allah madeak awei o kunyau pekerjaan-Ne bi selsei sejak Si menea dunio yo.

⁴ Sebab tetang bilai ketujuak, ade tetulis lem Kiteb Sucai awei yo, “Pado bilai ketujuak Allah istirahat kunei kute pekerjaan-Ne.”

⁵ Tetang hal o tenulis igai awei yo, “Tobo'o coa bakea masuak moi negrai o utuk dapet istirahat besamo Uku.”

⁶Jijai tobo'o de pertamo-tamo temi'uk bito tetang Bito Baik o, coa temimo istirahat o kerno tobo'o coa pecayo. Amen awei o bi jelas bahwo ade tun-tun luyen de buliak temimo istirahat o.

⁷ Kerno Allah bi temtau suaktau bilai de luyen igai, de senbut “Bilai Yo”. Betaun-taun sesudo'o Allah miling tetang hal o liwet Daud, lem ayat de tenulis nano, “Amen pado bilai yo udi temi'uk saei Allah, jibeakba udi telo ulau.”

⁸ Amen seandaine Yosua sudo melei tun-tun o istirahat de jenanjai Allah, mako Allah bakea miling igai tetang suaktau bilai de luyen.

⁹Jijai, bagiak umat Allah masiak ade janjjai utuk istirahat awei Allah istirahat pado bilai de ketujuak o.

¹⁰ Kerno tun de temimo istirahat de jenanjai Allah ngen si o, bakea istirahat kulo kunei kute pekerjaanne, serai awei Allah.

¹¹Kerno o, maroba ite berusaho sungguak-sungguak utuk temimo istirahat de jenanjai Allah o. Jibeak sapei suang kulo kunei ite gagal awei tobo'o bel'o, kerno coa pecayo ngen Allah.

¹²Kecek Allah adeba kecek de idup ngen kuet; lebiak tajem kunei pedang matai duai. Kecek o menikem sapei moi batas antaro jiwo ngen roh; sapei moi batas antaro sesendai telan sumsum, sehinggo namen lebiak lem pekeran ngen niat atei manusio.

¹³Coa ade do makhluk kulo de coa keten kunei pandangan Allah. Kute sesuaktau tukok neak adep-Ne. Ngen ite harus melei tanggung jawab ngen-Si.

¹⁴Do'oba sebabne ite harus be pegong teguh pado kepercayaan ite. Sebab ite temuan Imem Lai de lai, de sudo masuk sapei neak adep Allah — Siba Yesus Anok Allah.

¹⁵Imem Lai ite o isoba imem de coa dapet meding kelemahan-kelemahan ite. Se belek ne, Si sudo cenubo lem kute hal, serai awei ite suang; cuma Si coa menea duso!

¹⁶Kerno o, maroba ite ngen kembiak binai madep Allah de meriteak ngen baik atei. Allah bakea selen ngen ite, memberkati ite supayo ite dapet pertolongan tepat pado waktaune.