Read Rejang IBRANI 6 Bible Online

IBRANI 6 - Rejang bible

IBRANI 6

¹Kerno'o, maroba ite melakeak moi pelajaran-pelajaran tetang kehidupan Kristen de dewasa, jibeak cuma kemliak syari'ah ajaran agamo ite. Jibeak ite mulang igai pelajaran dasar bahwo tun harus bedan menea hal-hal de coa ade gunone, harus pecayo ngen Allah,

²atau tetang mpek tangen das tun, atau idup igai kunei matei atau hukuman de kekal.

³Insya Allah, ite melakeak moi pelajaran-pelajaran tetang kehidupan Kristen de dewasa!

⁴Sebab, tun-tun de sudo murtad, coa mukin najea igai. Tobo'o bel'o bi ade neak lem te'ang kunei Allah, bi mbuk pelei-Ne. Tobo'o kulo bi kenuaso Roh Allah.

⁵Tobo'o namen kunei pengalaman tobo'o bahwo kecek Allah o baik, tobo'o bi meding karunio-karunio de penuak kuaso kunei zaman de bakea teko.

⁶Tapi sesudo'o tobo'o murtad! Coa mukin majea tobo'o igai utuk tobat igai kunei duso-duso tobo'o. Sebab tobo'o gi dong menea Anok Allah semalib ngen menea Si nino neak adep tun dau.

⁷Pitok de mesep bioa ujen de cet tu'un moi dasne, lajau idup tanem-tanem de beguno utuk tun de temanemne, pitok o diberkati Allah.

⁸ Tapi amen neak o pitok idup lalang ngen sekejut, mako pitok o coa ade gunone, be bakea keno kutuk Allah ngen akhirne nembem sapei abis.

⁹Tapi Saudaro-saudaro de tercito, kunyau keme madeak awei o, tapi keme yakin tetang udi. Keme yakin bahwo udi bi temimo hal-hal de baik, adeba berkat-berkat de adeba bagian kunei keselamatannu.

¹⁰Allah iso Allah de coa adea. Si tep minget jano de udi nea utuk-Ne, kasih de udi kemten ngen Si sewaktau temulung saudaro-saudaro do imen, bel'o sapei uyo.

¹¹Keme lok nien supayo udi masing-masing terus semangat sapei akhir, sehinggo udi temimo jano de udi ma'ep o.

¹²Keme coa lok udi jijai malas. Tapi keme lok supayo udi idup awei tun-tun de temimo jano de jenanjai Allah, kerno pecayo ngen Si, kerno udi sabar.

¹³Ketiko Allah melei janjai ngen Abraham, Si besupeak bahwo Si bakea menea jano de sudo jenanjai-Ne. Ngen kerno coa ade de lebiak lekat kunei Allah, mako Si besupeak das gen-Ne suang.

¹⁴ Si madeak, “Uku janjai bakea memberkati ko ngen menea keturunannu jijai dau.”

¹⁵Abraham mbot ngen sabar, mako si temimo jano de jenanjai Allah ngen si.

¹⁶Amen tun besupeak, si besupeak das gen tun luyen de lebiak lekat kunei si, mako supeak o mapus kute bantahan.

¹⁷Allah lok jemlas ngen tun-tun de temimo janjai-Ne, bahwo Si coa bakea mubeak rencano-Ne. Do'oba sebabne Si besupeak igai ngen janjai-Ne o.

¹⁸Duai hal o coa dapet bubeak: Allah coa mukin mike tetang janjai ngen supeak-Ne. Kerno o, ite de sudo belindung ngen Allah, kenuet supayo bepegong teguh pado harapan de tebetang neak adep ite.

¹⁹ Harapan ite o awei jangkar de tetanem kembiak lem, adeba pegongan de kuet ngen aman utuk idup ite. Harapan o tembus tabir Ruang Mahasucai neak Umeak Tuhan neak surgo.

²⁰ Yesus bi meretes dalen moi penan o utuk ite, ngen bi masuk moi mindi jijai Imem Lai ite utuk selamo-lamone, awei Imem Melkisedek.