Read Rejang IBRANI 7 Bible Online

IBRANI 7 - Rejang bible

IBRANI 7

¹ Melkisedek yo adeba rajo kunei Salem ngen imem Allah De Mahalekat. Waktau Abraham belek igai kunei pertempuran maleak rajo-rajo, Melkisedek teko semambut si ngen memberkatinya.

²Mako Abraham melei ngen Melkisedek puluak persen kunei kute jano de nbutne. (Gen Melkisedek taine, pertamo-tamo, “Rajo Keadilan”; ngen kerno si rajo kunei Salem, mako genne kulo taine “Rajo Sejahtera”.)

³Tetang Melkisedek yo coa ade keterangan neak ipe bae bahwo si temuan bapok ngen indok atau ninik puyang; coa ade kulo keterangan tetang laherne, atau mateine. Si serai awei Anok Allah; si adeba Imem de kekal.

⁴Jijai, ite kemliak neak yo padeak kelaine Melkisedek; si kembiak lai sehinggo Abraham, bapok leluhur bangso ite, melei ngen si puluak persen kunei kute sesuaktau de dapetne kunei perang o.

⁵ Neak lem hukum agamo Yahudi tentau bahwo imem-imem royot Lewi harus mok puluak persen kunei pendapatan umat Israel, adeba saudaro-saudaro tobo'o suang, kunyau tobo'o samo-samo royot Abraham.

⁶Melkisedek iso royot Lewi, tapi si temimo kulo puluak persen kunei kute de nbut Abraham, de memberkati kulo Abraham de justru bi temimo janjai-janjai kunei Allah.

⁷Memang coa nam mbantah bahwo tun de dapet berkat adeba lebiak rendeak kunei tun de melei berkat.

⁸Imem-imem de timimo puluak persen bagian o adeba tun de pacok matei. Tapi temurut Kiteb Sucai, Melkisedek de temimo pelei puluak persen bagian o adeba tun de tep idup.

⁹Buliak nadeak, bahwo Lewi — de royotne mok puluak persen bagian kunei umat Israel — masen kulo bagian o liwet Abraham, waktau Abraham masenne ngen Melkisedek.

¹⁰Kunyau Lewi ati laher, tapi buliak nadeak si bi ade neak lem awok Abraham ninik puyangne, waktau Melkisedek temau ngen Abraham.

¹¹Neak beak pipinan imem-imem Lewi, hukum agamo Yahudi nelei ngen umat Israel. Kerno imem-imem Lewi bel'o o coa dapet menea seca'o sempurno jano de harus neane, mako harus ade imem luyen, adeba de awei Imem Melkisedek, ngen iso kunei golongan Imem Harun igai!

¹²Nah, amen kedudukan imem-imem bubeak, hukum agamo Yahudi kulo harus nubeak kulo.

¹³Maksudne adeba Tuhan ite: Si kunei sukau luyen, ngen ati perneak suang kulo kunei sukau-Ne betugas sebagai imem.

¹⁴Kute tun namen bahwo Tuhan ite asalne kunei sukau Yehuda; ngen Musa coa perneak madeak sukau o waktau si miling tetang imem-imem.

¹⁵Hal de nadeak yo jijai lebiak jelas igai, ngen timboane suang imem luyen de awei Melkisedek.

¹⁶Si naket jijai imem, iso kerno peraturan-peraturan manusio, meluyen kerno idup-Ne de berkuaso ngen de coa ade abisne.

¹⁷ Sebab neak lem Kiteb Sucai nadeak, “Ko adeba imem selamo-lamone, awei imem Melkisedek.”

¹⁸Jijai, uyo peraturan de an bi coa nakei igai, kerno coa kuet ngen coa ade gunone.

¹⁹Hukum agamo Yahudi coa dapet menea sesuaktau kulo jijai sempurno. Do'o sebabne ite uyo nelei harapan de lebiak baik; ngen o ite dapet ma'ok Allah.

²⁰Kulo, kutene o senerto ngen supeak kunei Allah. Coa ade supeak awei o waktau imem-imem de luyen o naket.

²¹ Tapi Yesus naket jijai imem pakei supeak, waktau Allah madeak ngen-Si, “Tuhan bi supeak, ngen Si coa bakea bubeak pendirian-Ne, ‘Ko adeba imem selamo-lamone.’ ”

²²Ngen dio kulo Yesus jijai jaminan utuk suaktau janjai de lebiak baik.

²³Ade igai do hal: imem-imem de luyen o ade dau, sebab tobo'o masing-masing matei sehinggo coa dapet temrus jabatanne.

²⁴Tapi Yesus idup selamo-lamone, jijai jabatan-Ne sebagai imem coa baliak ngen tun luyen.

²⁵Kerno o utuk selamo-lamone Yesus dapet semlamat tun-tun de teko ngen Allah liwet Si, sebab Si idup selamo-lamone utuk melei permohonan ngen Allah bagiak tun-tun o.

²⁶Jijai, Yesus do'oba Imem Lai de ite perlu. Si sucai; ngen-Si coa ade saleak atau duso jano bae. Si cen'ei kunei tun-tun beduso, ngen naket sapei moi penan de lebiak lekat kunei kute lenget.

²⁷ Si coa awei imem-Imem Lai de luyen, de tiep bilai harus melei kurban kerno duso-dusone suang bel'o, tembei kerno duso-duso umat. Yesus melei kurban cuma debat bae utuk selamo-lamone, ketiko Si melei dirai-Ne suang utuk kurban.

²⁸Hukum agamo Yahudi maket tun de coa sempurno jijai Imem Lai. Tapi sesudo'o kunei hukum o, Allah menea janjai ngen supeak bahwo Si maket sebagai Imem Lai, Anok de sudo jenijai Penyelamat de sempurno utuk selamo-lamone.