Read Rejang YAKOBUS 1 Bible Online

YAKOBUS 1 - Rejang bible

YAKOBUS 1

¹ Saudaro-saudaro umat Allah kutene de tesebea neak kute dunio! Salam kunei uku, Yakobus, hamba Allah ngen hamba Tuhan Yesus Kristus.

²Saudaro-saudaro! Amen udi meding memecem cobaan, lokba udi meding utung.

³Sebab udi namen, bahwo amen udi tep pecayo ngen Tuhan pado waktau meding cobaan, akibatne adeba: udi jijai sabar.

⁴Jagoba supayo ketabahan ateinu o berkembang sapei udi jijai sungguak-sungguak sempurno serto coa kuang lem hal jano bae.

⁵Amen ade tun neak antaro udi de kuang bijaksana, lokba si minoine kunei Allah, mako Allah bakea melei kebijaksanaan ngen udi; sebab ngen tiep tun, Allah melei ngen mu'eak atei ngen asai ibo.

⁶Tapi tun de minoi, harus pecayo; si coa buliak reragau. Sebab tun de reragau adeba awei umbok neak laut de kembus angin moi ipe bae.

⁷Tun de awei o coa tep pekeranne; si coa dapet mok keputusan jejano lem kute sesuaktau de neane. Kerno o, jibeak kulo si ma'ep utuk dapet jejano kunei Tuhan.

⁹Tun Kristen de peset lokba meding riang amen Allah melekatne.

¹⁰ Ngen tun Kristen de kayo lokba meding riang kulo, amen Allah merendeakne. Sebab tun kayo bakea nyep awei bungai dukut.

¹¹Pado waktau matai bilai terbit ngen panesne tenget, mako dukut o bakea jijai leu sehinggo guguaba bunggaine ngen nyepba kulo kebaesne. Awei'oba kulo ngen tun de kayo; si bakea ajua pado waktau si gidong maneu usahone.

¹²Riangba tun de sabar pado waktau si cenubo. Sebab sesudo si berasea taen lem cobaan o, si bakea temimo upeakne, adeba idup de sudo jenanjai Allah ngen tun-tun de cito ngen Allah.

¹³Amen su'ang tun tergoda ngen cobaan de awei o, jibeakba si madeak, “Godaan yo tekone kunei Allah,” sebab Allah coa dapet tegoda ngen kejahatan, coa kulo menggoda suang tun kulo.

¹⁴Tapi tun tergoda amen si tenarik ngen tepiket ngen kelokne su'ang de coa baik.

¹⁵Sesudo o, amen kelok de coa baik o tenotoa, mako laherba duso; amen duso bi lai, mako akibatne adeba matei.

¹⁶Jibeakba udi keno pike, Saudaro-saudaroku de tecito!

¹⁷Tiep pelei de baik ngen hadiah de sempurno tekone kunei surgo, tenu'un Allah, Pencipto kute te'ang neak lenget. Siba Allah de coa bubeak, coa kulo jijai sembab tiep kelem.

¹⁸Das kelok-Ne su'ang Si jemijai ite anok-anok-Ne liwet Firman-Ne de benea. Si menea o supayo ite dapet penan de utamo neak antaro kute makhluk ciptaan-Ne.

¹⁹Kemliakba dio bebaik, Saudaro-saudaro de tecito! Tiep tun harus gacang utuk temi'uk, tapi cendok utuk miling ngen mengiak.

²⁰Tun de mengiak coa dapet menea de baik, de semnang atei Allah.

²¹Sebab o, nuangba tiep kebiasaan de coa baik ngen kidek. Temimoba ngen rendeak atei firman de nea Allah neak lem ateinu, sebab firman o temuan kekuatan utuk semlamat udi.

²²Lokba udi menea jano de nadeak Allah, jibeak cuma temi'uk bae, sehinggo ngen awei o udi mike dirai suang.

²³Tun de temi'uk Firman Allah, tapi coa kemerjone adeba awei tun de gidong kemliak papeane de sebeneane neak adep kaco.

²⁴Sesudo si kemliak bebaik, si kulo lalau ngen langsung coa tinget awei ipe betuk papeane o.

²⁵Hukum Allah sempurno ngen temuan kekuataan utuk mbebas manusio. Tun de semlidik ngen kemliak bebaik serto kemerjo hukum-hukum o, iso temi'uk bae lajau coa mingetne, tun o bakea diberkati Allah lem kute hal de neane.

²⁶Amen ade su'ang tun de meding diraine de taat beragamo, tapi si coa jemago bibiane, mako si mike diraine suang; ibadahne coa ade gunone.

²⁷Ketaatan beragamo de sucai ngen sejati temurut pandangan Allah Bapa adeba: temulung anok-anok yatim ngen rando-rando de saro, jemago dirai su'ang supayo jibeak nusak dunio yo.