Read Rejang YAKOBUS 3 Bible Online

YAKOBUS 3 - Rejang bible

YAKOBUS 3

¹Saudaro-saudaro! Jibeakba dau tun kunei udi de lok jijai guau. Udi namen ite de jijai guau bakea hukum temurut ukuran de lebiak benek kunei tun luyen.

²Ite kute cet menea saleak. Tapi tun de coa perneak menea saleak ngen kecek-kecekne, si tun de sempurno, de dapet kemuaso kute diraine.

³Amen ite mpek tilai moi bibia kudo supayo si temurut kelok ite, mako si dapet kemuaso kute awok kudo o.

⁴Mokba kulo kepea sebagai contoh. Kunyau kepea adeba sesuaktau de kembiak lai ngen nembin angin de lai, tapi si kenuaso kemudi de kembiak titik, temurut kelok tun de mbin kepea.

⁵Awei o kulo ngen dileak ite; kunyau dileak ite o titik, tapi si dapet ombong tetang hal-hal de lai. Pekerba padeak laine imbo dapet nembem nge opoi de kemliak titik!

⁶Dileak serai ngen opoi. Neak awok ite, si adeba sumber kejahatan de sembea kejahatan neak kute dirai ite. Ngen opoi de kunei nerako, si mbem kute idup ite.

⁷Kute mecem benatang buas, burung, benatang makok ngen kan dapet jinok, ngen sudo kulo jeninok manusio.

⁸Tapi dileak manusio coa dapet jeninok suang tun kulo. Dileak o kidek ngen coa dapet kenuaso; penuak ngen acun de nea matei.

⁹ Ite makeine utuk madeak mokasiak ngen Tuhan, Bapa ite, tapi kulo utuk semupeak sesamo manusio de sudo cenipto temurut rupo Allah.

¹⁰Kunei bibia de serai kelua kecek-kecek mokasiak ngen kulo kecek-kecek supeak. Seharusne coa awei o!

¹¹Jano ade matai bioa de ngeluea bioa tawea ngen bioa pet kunei matai bioa de serai?

¹²Saudaro-saudaroku, pun ara coa dapet masea bueak zaitun, pun aggur coa dapet maseak bueak ara. Matai bioa de mesin coa dapet kulo ngeluea bioa tawea.

¹³Amen neak antaro udi ade tun de bijaksana ngen baik, lokba si kemtenne ngen idup baik, menea hal-hal de baik, de senerto rendeak atei ngen bijaksana.

¹⁴Tapi amen udi nyebuau, gis atei ngen meker dirai su'ang, jibeakba ombong ngen kebijaksanaan o, kerno ngen o udi ngike melawen kebenaran kunei Allah.

¹⁵Kebijaksanaan de awei o asalne iso kunei surgo. Si asalne kunei dunio, kunei nafsu manusio ngen kunei Iblis!

¹⁶Neak ipe ade nyebuau ngen sipet meker dirai su'ang, neak di kulo ade kekacauan ngen kute mecem perbuatan de kidek.

¹⁷Tapi tun de temuan kebijaksanaan de kunei das adeba pertamo-tamo sucai, sesudo'o galok damoi, rama ngen penurut. Si penuak ngen asai ibo ngen masea perbuatan-perbuatan de baik. Si coa berpihok ngen coa munafik.

¹⁸Memang kebaikan adeba asea kunei biniak damoi de tembea tun de cito damoi!