Read Rejang YAKOBUS 4 Bible Online

YAKOBUS 4 - Rejang bible

YAKOBUS 4

¹Kunei ipe asalne kute selisiak ngen tekea neak antaro udi? Jano do'o asalne iso kunei kelok-kelok udi de terus bae perang neak lem dirainu utuk dapet kesenangan dunio!

²Udi lok, tapi coa dapet, mako udi lok munuak! Udi semangat, tapi coa dapet jano de udi mesoa, mako udi tekea ngen belago. Udi coa dapet jano-jano, sebab udi coa minoi ngen Allah.

³Atau udi sudo minoine, tapi udi coa dapet, sebab de minoi o saleak; jano de udi minoi adeba utuk kesenangan dirainu su'ang

⁴Udi adeba tun de coa setia? Jano udi namen bahwo amen udi bekuat ngen dunio, mako udi jijai musuak Allah? Jijai api de lok kuat dunio yo, si jemijai diraine musuak Allah.

⁵Jibeak sako bahwo Kiteb Sucai coa ade alasan madeak, “Neak lem dirai ite Allah mpek Roh de kembiak kuet.”

⁶ Kunyau awei o, rahmat Allah de nelei ngen ite lebiak kuet kunei kelok roh ite o. Do'oba sebabne neak lem Kiteb Sucai tetulis kulo, “Allah temtang tun de ombong, tapi sebelekne Si mengasihi tun de rendeak atei.”

⁷Kerno o, hormatba ngen Allah ngen lawenba Iblis, mako Iblis bakea lalau kunei udi.

⁸Na'okba Allah, Allah kulo bakea ma'ok udi. Mpukba tangennu, udi de beduso! Ngen senucaiba ateinu, udi menduai atei!

⁹Lokba udi sungguak-sungguak nyesoa ngen ngindoi serto ibo; lokba tawainu jijai tangisan ngen riangnu jijai ibo!

¹⁰Lokba udi rendeak dirai neak adep Tuhan, mako Tuhan bakea melekat udi.

¹¹Saudaro-saudaro jibeakba saling mino atau saling semaleak. Tun de mino atau semaleak saudarone de samo-samo Kristen, si mino ngen semaleak hukum Allah. Ngen amen udi semaleak hukum Allah, do'o taine udi coa temotoa hukum-hukum o, meluyen jijai hakimne.

¹²Padahal cuma do de berhok melei hukum ngen manusio, semidang manusio. Adeba Allah de bekuaso semelamat ngen mbinaso. Jijai, api udi, sehinggo udi lok semaleak sesamo manusio?

¹³ Saudaro-saudaro de madeak, “Bilai yo atau men keme bakea berakat moi kota anu ngen tinggea neak di taun ke'anne utuk dagang ngen mesoa caci,” — temi'ukba nasihat uku yo.

¹⁴Jano de bakea tejijai ngen idupnu men, udi su'ang coa namen! Udi cuma awei asep de tegoa bae keten, sesudo'o nyep.

¹⁵Seharusne udi madeak awei yo, “Amen Tuhan kenlokne, keme bakea idup ngen menea dio atau do'o.”

¹⁶Tapi uyo udi ombong ngen uta lai. Kutene o saleak.

¹⁷Kerno o, tun de namen jano de baik de harus neane tapi coa kemerjone, tun o beduso.