Read Rejang YAKOBUS 5 Bible Online

YAKOBUS 5 - Rejang bible

YAKOBUS 5

¹Saudaro-saudaro, tun-tun kayo! Temi'ukba nasihat uku. Lokba udi ngindoi ngen ibo kerno udi bakea meding saro!

² Kekayaannu bi usuk. Keracoknu bi mbuk lepes.

³Mas ngen piroknu bi ka'et; ka'etne bakea jijai saksai melawen udi ngen bakea mbuk awoknu awei opoi. Udi bi melungguk hok pado zaman de gidong berakhir.

⁴ Udi coa masen upeak tun-tun de bekerjo neak kebunnu. Uyo temi'ukba keluhan tobo'o! Tun-tun de melungguk asea kebunnu, menggang minoi tulung ngen sa'eine bi sapei moi ti'uk Allah, Tuhan De Mahakuaso.

⁵Udi bi idup mewah ngen foya-foya neak dunio yo. Udi bi nea ateinu puas serai awei pado bilai penyembelihan.

⁶Udi mukum ngen munuak tun-tun de coa saleak, tobo'o coa melawen udi.

⁷Kerno'o, sabarba Saudaro-saudaroku, sapei Tuhan teko. Kemliakba awei ipe sabarne suang petani mbot taneakne melei asea de bego. Ngen sabar si mbot ujen musim gugua ngen ujen musim bungai.

⁸Lokba udi kulo sabar ngen riang, kerno tekone Tuhan bi pa'ok.

⁹Jibeakba gerunyam ngen saling nyaleak, supayo udi coa hukum Allah. Inget! Hakim bi pa'ok, siap utuk teko.

¹⁰Saudaro-saudaro, ingetba paro nebai de miling das gen Tuhan. Tobo'o sabar madep saro. Jijai, mokba tobo'o sebagai contoh.

¹¹ Tobo'o senbut bahagia sebab tobo'o sabar. Udi bi temi'uk tetang kesabaran Ayub, ngen udi namen awei ipe Tuhan pado akhirne memberkati si. Sebab Tuhan kembiak sayang ngen baik atei.

¹² De terutamo sekilai, adeba: Jibeakba besupeak, baik demi lenget, bumei, atau demi jano bae. Nadeakba bae “Au” amen maksudnu au, ngen “Coa” amen maksudnu coa; supayo udi jibeak nukum Allah.

¹³Amen ade neak antaronu gidong saro, lokba si bedu'o. Amen ade de riang, lokba si nyanyi mujai Allah.

¹⁴ Amen ade de bolon, lokba si menok pemipin-pemipin jemaat. Ngen lokba pemipin-pemipin o demu'o tun de bolon o, melomokne ngen minyok das gen Tuhan.

¹⁵Amen du'o tobo'o senapei ngen yakin, Tuhan bakea kema'en tun de bolon o, mapun duso-duso de sudo nea ne.

¹⁶Sebab o, lokba udi makau saleak ngen saling demu'o, supayo udi kenaen. Du'o tun de temurut kelok Allah, temuan kuaso de lai.

¹⁷ Elia ngen ite samo-samo manusio. Si bedu'o ngen sungguak-sungguak supayo ujen coa tu'un, mako ujen kulo coa tu'un selamo telau taun setengeak.

¹⁸ Sesudo'o si beduo igai, lajau lenget temuun ujen sehinggo pitok melei aseane kulo.

¹⁹Saudaro-saudaroku! Amen neak antaro udi ade suang de coa temotoa igai ajaran kunei Allah, lajau suang tun de luyen menea tun o belek igai ngen Allah,

²⁰ ingetba ayat yo: Tun de menea tun beduso nyimpang kunei dalenne de saleak, tun o semlamat jiwo tun de beduso o kunei matei ngen sembab dau tun duso napun. Hormat keme, Yakobus