Read Rejang 1 PETRUS 1 Bible Online

1 PETRUS 1 - Rejang bible

1 PETRUS 1

¹Saudaro-saudaro umat pilihan Allah, de teseba neak ratau neak daera Pontus, Galatia, Kapadokia, Asia, ngen Bitinia! Uku, Petrus, rasul Yesus Kristus, maʼep semoga Allah melei berkat, sejahtera ngen udi berlimpah-limpah. Udi niliak jijai umat Allah sesuoi ngen rencano Allah Bapa. Roh Allah bi jemijai udi umat de sucai, khusus utuk Allah, supayo udi taat ngen Yesus Kristus, senucai ngen daleak-Ne.

³Maroba ite bersyukur ngen Allah, Bapa Tuhan ite Yesus Kristus! Si kembiak mengasihi ite, do'o sebabne Si melei ngen ite idup de belau, midup igai Yesus Kristus kunei matei. Dio melei ite harapan de kuet.

⁴Ite maʼep utuk temuan berkat-berkat de seniap Allah utuk umat-Ne, adeba berkat-berkat de naik-Ne neak surgo, sehinggo coa dapet usak, jijai usuk atau luntur.

⁵Kutene o adeba utuknu, kerno udi pecayo ngen Allah. Mako udi jenago ngen kuaso Allah supayo udi temimo keselamatan de siap dinyatakan pado akhir zaman.

⁶Kerno o lokba udi riang atei, kunyau uyo utuk sementaro waktau udi harus jijai ibo kerno udi meding memecem cobaan.

⁷Tujuanne adeba utuk melei bukti jano udi sungguak-sungguak pecayo ngen Tuhan jano coa. Mas de dapet usak kulo, ntes ngen opoi. Nah, imen udi adeba lebiak bego kunei mas, jijai harus ntes kulo supayo jijai murni. Ngen awei o udi bakea nujai ngen hormat serto nelkat pado bilai Yesus Kristus teko igai.

⁸Udi mengasihi-Ne, kunyau bel'o udi coa kemliak-Ne. Udi pecayo ngen Si kunyau uyo udi coa kemliak-Ne. Do'o sebabne udi riang, meding riang de agung ngen coa nam madeakne.

⁹Sebab tujuan imennu tercapei, adeba keselamatan jiwonu.

¹⁰Keselamatan dioba de tenliti ngen senlidik paro nebai, tobo'o meramea tetang berkat de nelei Allah ngen udi.

¹¹Tobo'o semlidik awei ipe ngen tengen hal o bakea terjijai, maksudne adeba Roh Kristus de ade neak lem dirai tobo'o. Pado waktau o Roh-Ne berfirman ngen tobo'o tetang penderitaan-penderitaan de harus nding Kristus ngen tetang keagungan-Ne de bakea semsung sesudo o.

¹²Ngen nebai-nebai o Allah melei namen bahwo jano de tobo'o nea iso utuk kepetingan tobo'o, meluyen utuk udi; adeba hal-hal de uyo yo udi teni'uk ngen jelas kunei paro de semapei Bito Baik tetang Yesus Kristus. Tobo'o semapei hal-hal o ngen udi ngen kuaso Roh Allah de nembo-Ne kunei surgo. Bahkan malaikat-malaikat kulo lok namen bito de tobo'o melei namen o.

¹³Sebab o lokba udi siap. Teateiba ngen maʼepba sepenuakne pado berkat de bakea nelei ngen udi pado waktau Yesus Kristus teko igai.

¹⁴Taatba ngen Allah, jibeakba idup temurut keloknu de bel'o, pado waktau udi masiak ati kemnal Allah.

¹⁵Sebelekne, lokba udi sucai lem kute sesuaktau de udi nea, serai awei Allah de menok udi o sucai.

¹⁶ Lem Kiteb Sucai tetulis, “Lokba udi sucai, sebab Uku sucai.”

¹⁷Udi madeak Allah o Bapa pado waktau udi bedu'o ngen-Si. Nah, Allah do'oba de mukum api bae setimpal ngen perbuatan masing-masing. Sebab o selamo udi masiak ade neak dunio yo, lokba udi mengagungkan Allah lem idupnu.

¹⁸Udi namen jano de sudo nasen utuk mbebas udi kunei idup de sio-sio de nelei ninik puyangnu. Masenne iso sesuaktau de pacok usak awei pirok atau mas,

¹⁹meluyen sesuaktau de kembiak bego; adeba dirai Kristus suang, de jijai sebagai bebirai coa ade cacet ngen cela de kenorban ngen Allah.

²⁰Kristus niliak Allah ayok dunio jenijai. Tapi kerno udi, Si tembei madeak dirai-Ne pado akhir zaman. Si teko moi dunio supayo udi senlamat.

²¹Liwet Siba udi pecayo ngen Allah de sudo midup-Ne igai kunei matei ngen mengagungkan-Ne. Jijai, Allahba de udi pecayo ngen Allahba kulo udi mpek harapan.

²²Kerno udi taat ngen ajaran kunei Allah, mako udi semucai dirai ngen udi mengasihi tun-tun do imen seca'o ikhlas. Sebab o, lokba udi mengasihi do ngen de luyenne, sepenuak atei.

²³Sebab liwet Firman Allah de idup ngen de kekal o, udi sudo jenijai manusio belau de iso laher kunei manusio, meluyen kunei Bapa de kekal.

²⁴ Lem Kiteb Sucai tetulis awei yo, “Kute umat manusio awei dukut, ngen kute kebesaranne awei bungai dukut. Dukut lew, bungaine kulo gugua;

²⁵tapi firman Tuhan tep utuk selamo-lamone.” Firman o Bito Baik de sudo nelei namen ngen udi.