Read Rejang 1 PETRUS 2 Bible Online

1 PETRUS 2 - Rejang bible

1 PETRUS 2

¹Kerno o, nuangba kunei dirainu kute de jahat; jibeak igai mike, jibeak pura-pura. Jibeak iri atei, jibeak mino tun luyen.

²Lokba udi jijai awei cupik de pei laher, bogoa aus lok mbuk bioa susu de murni ngen de rohani. Ngen awei o udi bakea idup ngen selamat.

³ Neak lem Kiteb Sucai tetulis awei yo, “Udi bi meding su'ang padeak baikne Tuhan.”

⁴Kerno o, tekoba ngen Tuhan. Si awei butau de idup, butau de nuang manusio kerno nanggap coa beguno; tapi de niliak Allah sebagai butau de bego.

⁵Udi awei butau-butau de idup. Kerno o lokba udi nakeine utuk temgok Umeak Allah de rohani. Ngen awei o udi jijai imem-imem, de idup khusus utuk Allah, de liwet Yesus Kristus melei persembahan ngen Allah, kurban rohani de sesuai neak atei Allah.

⁶ Kerno neak lem Kiteb Sucai tetulis awei yo, “Uku bi miliak de bueak butau bego, de Uku mpek neak Sion sebagai butau utamo; ngen tun de pecayo ngen Si coa bakea keciwo.”

⁷ Butau o kembiak bego utuk udi de pecayo. Tapi utuk tun-tun de coa pecayo, ade ayat-ayat Kiteb Sucai awei yo, “Butau de coa nakei ngen tukang-tukang bangunan o ternyato jijai butau de utamo,”

⁸ ngen “Do'oba butau de menea tun tatuk, butau de menea tobo'o us.” Tobo'o tatuk kerno tobo'o coa pecayo ngen kecek Allah. Awei'oba sudo tentau Allah tetang tobo'o.

⁹ Tapi udi adeba bangso de tepiliak, imem-imem de melayan rajo, bangso de sucai, khusus utuk Allah, umat Allah su'ang. Allah miliak udi ngen menok udi kelua kunei kegelapan utuk masuk moi lem te'ang-Ne de ajaib, maksudne supayo udi melei namen bito tetang perbuatan-perbuatan-Ne de luea biaso.

¹⁰ Bel'o udi iso umat Allah, tapi uyo udi adeba umat Allah. Bel'o udi coa kenasiak Allah, tapi uyo udi temimo belas kasihan-Ne.

¹¹Saudaro-saudaro de tecito! Udi adeba tun asing ngen perantau neak dunio yo. Kerno o uku minoi nien supayo udi jibeak temotoa hawa nafsu manusio de bogoa perang melawen jiwo.

¹²Perbuatannu neak antaro tun de coa kemnal Tuhan harusba kembiak baik, sehinggo amen tobo'o fitneak udi sebagai tun jahat, tobo'o pulo harus ngakau perbuatannu de baik, sehinggo tobo'o bakea mujai Allah pado waktau Si teko.

¹³Demi Tuhan lokba udi tunduk ngen tiep penguaso dunio: baik ngen Kaisar de jijai penguaso de utamo,

¹⁴atau ngen gubernur de tenunjuk Kaisar utuk mukum tun de menea jahat ngen utuk hormat tun de menea baik.

¹⁵Kerno Allah lok supayo ngen perbuatan-perbuatannu de baik udi temutup bibia tun de miling bodong.

¹⁶Lokba udi idup sebagai tun bebas, tapi jibeakba makei kebebasannu o utuk temutup kejahatan, meluyen idupba sebagai hamba Allah.

¹⁷Hormatba kute tun, citoba saudaro-saudaronu sesamo Kristen. Sabenba ngen Allah, hormatba ngen Kaisar.

¹⁸Saudaro-saudaro de jijai pelayan, tundukba ngen majikannu seca o hormat; iso cuma ngen tobo'o de baik atei ngen rama, tapi kulo ngen tobo'o de kejam.

¹⁹Allah bakea melei berkat udi, amen udi kerno sadar ngen kelok Allah, sabar saro amen tun menea udi ngen coa adea.

²⁰Sebab jano istimewane amen udi sabar saro hukuman de seharusne udi temanggung kerno saleak? Tapi amen udi sabar temanggung saro kerno menea de baik, mako Allah bakea memberkatinu.

²¹Utuk do'oba Allah menok udi. Kerno Kristus su'ang bi menderito utuknu, ngen o Si melei ngen udi suaktau contoh, supayo udi temotoa jejak-Ne

²² Si coa perneak menea duso, ngen coa perneak su'ang tun kulo temi'uk Si mike.

²³ Pado waktau Si nino, Si coa males ngen mino. Waktau Si menderito, Si coa macem; Si cuma semreak pekaro-Ne ngen Allah, Hakim de adea o.

²⁴ Kristus su'ang musung duso-duso ite pado dirai-Ne neak das kieu salib, supayo ite bebas kunei kuaso duso, idup temurut kelok Allah. Sileak-sileak Kristusba de kema'en udi.

²⁵Bel'o udi awei bebirai de seset, tapi uyo udi bi nembin igai utuk temotoa Gembala ngen Pemelihara jiwonu.