Read Rejang 2 PETRUS 2 Bible Online

2 PETRUS 2 - Rejang bible

2 PETRUS 2

¹Pado maso de bel'o neak antaro umat Allah bi timboa nebai-nebai palsu. Awei o kulo neak antaronu bakea timboa gu'au-gu'au palsu. Tobo'o bakea memasukan ajaran-ajaran de coa benea, de membinasakan tun. Ngen tobo'o bakea menyangkal Penguasa de sudo mbebas tobo'o. Ngen awei yo tobo'o mendatangkan kebinasaan das dirai suang, de bakea tejijai pado tobo'o ngen gacang.

²Kunyau awei o, dau tun bakea temotoa ca'o idup gu'au-gu'au palsu ngen hawa nafsu tobo'o. Ngen plep-plep tun mino Dalen Benea de temujau ngen Allah.

³Kerno serakahne gu'au-gu'au palsu o bakea beusaho mesoa utung kunei ko ngen nandei-nandei tobo'o. Tapi utuk plep tobo'o o ukuman bi an tesedio ngen kebinasaan coa bakea buye.

⁴Sebab amen Allah coa semayang malaikat-malaikat de menea duso tapi meting tobo'o moi lem nerako ngen awei yo semreakne moi lem guo-guo de kelem utuk maik tobo'o sapei Bilai Penghakiman.

⁵ Awei o kulo ngen dunio jaman bel'o, Allah coa munyaune telepas kunei ukuman. Allah menea banjir lai moi dunio tun-tun de jahat pado waktau o. Cuman Nuh besamo tujuak tun luyenne bae de selamat, kerno Nuh melei namen tetang idup berkenan ngen atei Allah.

⁶ Serai kulo halne ngen kota Sodom ngen Gomora: Allah mbem kota-kota o ngen opoi supayo jijai contoh tetang jano de bakea tejijai ngen tun-tun de jahat.

⁷ Tapi Lot senlamat, kerno si temurut kelok Allah; si kembiak saro kerno plep de coa benea kunei tun-tun jahat.

⁸Neak tengeak-tengeak tun-tun de awei'o Lot de baik o idup ngen batin tesikso, kerno tiep bilai si kemliak ngen temi'uk plep-plep tobo'o de kidek.

⁹Jijai, Tuhan namen awei ipe semlamat tun-tun de temurut kelok-Ne amen tobo'o madep cobaan-cobaan. Ngen Tuhan namen awei ipe menea tun-tun de jahat utuk senikso pado Bilai Pengadilan,

¹⁰khususne tun-tun de temurut kelok-kelok hawa nafsu tobo'o ngen de mino kuaso Allah. Kembiak binaine ngen sombongne gu'au-gu'au palsu o sehinggo tobo'o coa sesegan mino tobo makhluk de mulio neak surgo!

¹¹Malaikat-malaikat de uak lebiak kuet ngen bekuaso kunei gu'au-gu'au palsu o, coa temuduak tobo makhluk de mulio o ngen kecek-kecek penghinaan neak adep Tuhan.

¹²Tapi gu'au-gu'au o, luea biaso! Tobo'o awei benatang de laher utuk tenakep ngen nunuak bae. Tobo'o coa bepeker tapi cuma menea temurut naluri bae, sehinggo tobo'o semrang hal-hal de coa tobo'o ngertai ngen kecek-kecek hino. Sebab o, plep-plep tobo'o suang, tobo'o bakea benaso awei benatang-benatang buas.

¹³Sebagai ukuman das penderitaan de sudo tobo'o nea, tobo'o bakea meding saro. Bagiak tobo'o hal de semnang atei adeba menea jano bae pado kebilai guno mues kelok awok tobo'o. Amen tobo'o temot besamo-samo udi lem pesta kembuk, sikep tobo'o janjing kerno tobo'o mabuk ngen hawa nafsu.

¹⁴Tobo'o coa gegenyai menea duso, ngen kelok tobo'o adeba mandang selawei nakea. Ngen tun de blau pecayo ngen masiak ku'ang yakin, tobo'o mumbuk. Atei tobo'o bi tebiaso ngen serakah. Tobo'o adeba tun-tun tekutuk!

¹⁵ Kerno tobo'o coa lok temotoa dalen de lu'us, mako tobo'o seset. Tobo'o mok dalen tenotoa Bileam anok Beor bel'o. Bileam yo lok nien dapet caci kunei perbuatanne de coa baik.

¹⁶Tapi Bileam dapet peringatan keras te'adep kejahatanne o, ketiko keledaine miling ngen sa'ei manusio. Mako nebai o harus medan plepne de gilo o.

¹⁷Gu'au-gu'au palsu o adeba awei matai bioa de ke'ing ngen awei kabut de teniup angin badai. Allah bi semdio bagiak tobo'o sesuaktau penan de kembiak kelem.

¹⁸Tobo'o menea pernyataan-pernyataan de ba'es-ba'es ngen kosong; nafsu de cabul nakei tobo'o utuk semset tun-tun de tembei bae muloi bebas kunei lingkungan tun de idup seset.

¹⁹Gu'au-gu'au palsu o jemanjai kemerdekaan ngen tun-tun o, tapi tobo'o suang mbudok kebiasaan-kebiasaan de musak manusio. Sebab amen tun aleak ngen sesuaktau, mako si hamba kunei de maleakne o.

²⁰Tun de kemnal Tuhan ngen Penyelamat ite Yesus Kristus sudo bebas kunei kuaso-kuaso dunio de menea manusio jijai najis. Tapi amen sesudo'o si tejerat igai sehinggo aleak ngen kuaso-kuaso o, mako keadaan tun o pado akhirne lebiak kidek kunei ayokne.

²¹Lebiak baik tun-tun de awei'o coa perneak kemnal dalen benea kunei Allah kunei pado tobo'o kemnal ne, tapi sesudo'o coa lok temotoa periteak de nelei Allah ngen tobo'o.

²² Jano de tobo'o nea melei bukti kebenaran pribahasa yo, “Kuyuk bakea mbuk igai jano de sudo nuteak ne,” ngen “Ja'uak de sudo ndai, bakea ngubang neak lem luluk.”