Read Rejang 2 PETRUS 3 Bible Online

2 PETRUS 3 - Rejang bible

2 PETRUS 3

¹Saudaro-saudaro de tecito! Dioba su'et uku de keduai, de uku temulis ngen udi. Neak lem keduai su'et yo, uku berusaho midup igai pekeran-pekeran de sucai ngen udi.

²Uku meluak supayo udi minget ngen kecek-kecek de bel'o nadeak nebai-nebai Allah, ngen periteak kunei Tuhan, Rajo Penyelamat, de senapei ngen udi liwet rasul-rasul.

³ Pertamo-tamo, udi harus namen bahwo pado bilai-bilai terakhir, bakea timboa tun-tun de idupne kenuaso hawo nafsu tobo'o su'ang. Tobo'o bakea mino udi

⁴ngen madeak awei yo, “Nadeakne Tuhan janjai bakea teko! Uyo ipe Si? Bapak-bapak leluhur ite bi matei, tapi kekutene masiak serai bae awei waktau dunio yo ade.”

⁵ Tobo'o sengajo coa lok ngakau bahwo bel'o Allah jemijai lenget ngen bumai das firman-Ne. Bumai jenijai-Ne kunei bioa, ngen bioa;

⁶ ngen bioa kulo — adeba bio kunei banjir lai — bumai de bel'o bi benaso.

⁷Tapi lenget ngen bumai de ade uyo yo, senido firman Allah o kulo utuk nembem ngen opoi. Uyo lenget ngen bumai masiak senido sapei pado bilai tun-tun de jahat nukum ngen nunuak.

⁸ Tapi saudaro-saudaroku, do hal yo jibeakba udi coa tinget: bahwo neak adep Tuhan, do bilai coa ade bedane ngen seribau taun — keduaine serai bae bagiak-Ne.

⁹Tuhan coa cendok melei jano de sudo jenanjai-Ne kunyau ade de madeak awei yo. Sebelekne, Si sabar teadep udi, sebab Si coa lok su'ang tun kulo benaso. Si lok supayo kute tun tobat kunei duso-dusone.

¹⁰ Tapi Bilai tekone Tuhan bakea teko awei maling. Pado bilai o, lenget bakea nyep ngen sa'ei gutua, ngen benda-benda neak lenget bakea abis tekembem, bumai ngen kute de ade neak lemne bakea nyep.

¹¹Kerno kutene o bakea najua ngen ca'o de awei'o, awei ipe seharusne udi idup? Udi harus idup sucai ngen khusus utuk Allah,

¹²selamo udi mbot ngen indau tekone Bilai Allah. Pado bilai o lenget bakea abis tekembem, ngen kerno panesne, mako benda-benda neak lenget bakea ajua.

¹³ Tapi ite mbot jano de sudo jenanjai Allah, adeba lenget de belau ngen bumai de belau, neak ipe ade keadilan.

¹⁴Sebab o, saudaro-saudaro de tecito, sementaro udi mbot kutene o, berusahoba sungguak-sungguak utuk idup sucai ngen coa ade cacet neak adep Allah, neaba hubungan de baik ngen Allah.

¹⁵Anggapba kesabaran Tuhan ite sebagai kesepatan de nelei-Ne ngen udi supayo selamat. Paulus, saudaro ite de tecit'o, sudo temulis de awei'o kulo ngen udi. Si temulis o ngen kebijaksanaan de nelei Allah ngen si.

¹⁶Lem kute su'etne, Paulus bogoa temulis tetang hal o. Memang ade kekedau hal de saro tun ngertai lem su'et-su'et o. Bagian su'et o nutea ngen tun-tun de coa namen jejano, de coa kuet imenne. Hal o coa menea tun sele, kerno bagian-bagian luyen kunei Kiteb Sucai nea awei'o kulo ngen tobo'o. Jano de tobo'o nea o cuma menea tobo'o benaso.

¹⁷Tapi udi, saudaro-saudaro de tecito, bi namen tetang hal o. Sebab o, teateiba, jibeak sapei udi tekembin moi lem kesesatan tun-tun jahat sehinggo udi us kunei penan pelatnu de kuet.

¹⁸Lokba udi tambeak meding rahmat Yesus Kristus, Tuhan ngen Rajo Penyelamat ite, lokba udi kulo tambeak kemnal Si. Tepujaiba Si, uyo sapei selamo-lamone! Amin.