Read Rejang 1 YOHANES 3 Bible Online

1 YOHANES 3 - Rejang bible

1 YOHANES 3

¹ Kemliakba Allah kembiak mengasiak ite, sehinggo ite senbut anok-anok Allah. Memang ite adeba anok-anok Allah. Do'oba sebabne dunio de kidek yo coa kemnal ite, sebab dunio coa kemnal Allah.

²Saudaro-saudaro de tecito! Ite uyo adeba anok-anok Allah, tapi keadaan ite be ati jelas. Tapi ite namen bahwo amen Kristus teko, ite bakea jijai awei Si, sebab ite bakea kemliak Si lem keadaan-Ne de sebeneane.

³Kute tun de temuan harapan yo teadep Kristus, jemago diraine supayo sungguak-sungguak sucai, bersih kunei duso awei ipe Kristus kulo sucai.

⁴Tun de menea duso, melanggea ukum Allah; sebab duso adeba pelanggaran teadep ukum Allah.

⁵ Udi namen bahwo Kristus teko utuk mapus duso-duso manusio, ngen neak lem Si coa ade duso.

⁶Kute tun de idup jijai do ngen Kristus, coa menea duso igai. Tun de tep menea duso, coa perneak kemliak Kristus atau kemnal-Ne.

⁷Anok-anokku, jibeak meluak api bae semset udi. Tun de menea kelok Allah adeba Anok Allah serai awei Kristus adeba Anok Allah.

⁸Tapi tun de tep menea duso adeba anok Iblis, sebab Iblis beduso sejak mulone. Utuk dioba Anok Allah teko, adeba utuk benaso pekerjaan Iblis.

⁹Tun de sudo jijai Anok Allah, coa menea duso igai, sebab sifet Allah ade neak diraine. Ngen kerno Allah o Bapane, mako si coa dapet menea duso igai.

¹⁰Dioba bedane anok-anok Allah ngen anok-anok Iblis: api de coa menea kelok Allah, atau coa mengasiak saudarone, si iso Anok Allah.

¹¹ Sejak semulo bi senapei bito yo ngen udi: ite harus mengasiak do ngen deluyenne.

¹² Jibeakba ite awei Kain, de jijai anok Iblis ngen munuak pasuakne su'ang. Jano sebab Kain munuak pasuakne? Sebab hal-hal de neane adeba saleak, tapi hal-hal de nea pasuakne adeba benea.

¹³Sebab o, saudaro-saudaroku, jibeakba sele amen tun-tun dunio yo jengik ngen udi.

¹⁴ Ite namen bahwo ite bi keluea kunei matei, ngen baliak moi idup. Ite namen do'o, sebab ite mengasiak sesamo saudaro ite. Tun de coa mengasiak, taine masiak kenuaso kematian.

¹⁵Tun de jengik ngen saudarone adeba pembunuh, ngen udi namen bahwo su'ang pembunuh coa temuan hidup sejati ngen kekal.

¹⁶Ngen awei o ite namen ca'o mengasiak sesamo, Kristus bi semreak idup-Ne utuk ite. Sebab o, ite kulo harus semreak idup ite utuk saudaro-saudaro ite.

¹⁷Amen ade tun kayo kemliak saudarone peset, tapi coa lok temulung saudarone o, awei ipe tun o dapet madeak bahwo si mengasiak Allah?

¹⁸Anok-anokku, jibeakba ite mengasiak cuma neak bibia atau kecek bae. Lokba ite mengasiak ngen kasih de sejati neak lem perbuatan ite.

¹⁹Awei'oba ca'one ite namen bahwo ite asalne kunei anok-anok Allah de benea, ngen atei ite tenang neak adep Allah.

²⁰Ite namen, bahwo amen ite senaleak atei ite, Allah adeba lebiak lai kunei atei ite, Si namen kekutene.

²¹Jijai, saudaro-saudaroku de te cito, amen atei ite coa semaleak ite, ite dapet madep Allah ngen binai.

²²Ngen jano de ite minoi ngen Si, ite dapetne, kerno ite taat ngen periteak-periteak-Ne, menea jano de semnang atei-Ne.

²³ De Si periteak ngen ite adeba: Ite harus pecayo ngen Anok-Ne, adeba Yesus Kristus, ngen ite harus sesamo mengasiak, awei de sudo neriteak Kristus ngen ite.

²⁴Kute tun de taat ngen periteak-periteak Allah, hidup jijai do ngen Allah, ngen Allah jijai do ngen tobo'o. Ngen ite namen bahwo Allah hidup jijai do ngen ite, kerno Si bi melei Roh-Ne ngen ite.