Read Rejang 1 YOHANES 4 Bible Online

1 YOHANES 4 - Rejang bible

1 YOHANES 4

¹Saudaro-saudaro de tecito! Jibeakba pecayo ngen kute tun de makau temuan Roh Allah, tapi ntesba kileak tobo'o utuk namen jano roh de ade ngen tobo'o asalne kunei Allah atau iso. Sebab dau nebai palsu bi teko moi kute dunio.

²Awei'oba ca'one udi namen jano do'o Roh Allah atau iso: Tun de makau bahwo Yesus Kristus teko moi dunio sebagai manusio, tun o temuan Roh de teko kunei Allah.

³Tapi tun de coa makau hal yo tetang Yesus, coa temuan Roh Allah. Tun o temuan roh kunei musuak Kristus. Saudaro bi temi'uk bahwo roh o bakea teko, ngen uyo si bi ade neak lem dunio yo.

⁴Tapi anok-anokku, udi de Allah temuan. Udi bi maleak nebai-nebai palsu, sebab de ade ngen udi lebiak bekuaso kunei roh de ade ngen tun-tun de temuan dunio yo.

⁵Nebai-nebai palsu o miling tetang dunio, ngen dunio temi'uk kecek tobo'o, sebab tobo'o de dunio temuan.

⁶Tapi ite adeba anok-anok Allah; ngen tun de kemnal Allah, temi'uk kecek ite. Tun de iso de Allah temuan, coa temi'uk kecek ite. Awei'oba ca'one ite namen perbedaan Roh de melei ajaran de benea, ngen roh de menea seset.

⁷Saudaro-saudaro de tecito! Maroba ite mengasiak do ngen de luyenne, sebab kasih asalne kunei Allah. Tun de mengasiak, adeba Anok Allah ngen si kemnal Allah.

⁸Tun de coa mengasiak, coa kemnal Allah; sebab Allah adeba kasih.

⁹Allah madeak bahwo Si mengasiak ite ngen mutus Anok-Ne de tunggea moi lem dunio supayo ite dapet idup liwet Anok-Ne o.

¹⁰Dioba kasih o: Iso ite de sudo mengasiak Allah, tapi Allah de mengasiak ite ngen mutus Anok-Ne supayo liwet Si ite dapet pengampunan das duso-duso ite.

¹¹Saudaro-saudaro de tecito, amen Allah kembiak mengasiak ite, ite kulo harus mengasiak do ngen de luyenne.

¹² Coa ade suang kulo de perneak kemliak Allah, tapi amen ite samo-samo mengasiak, Allah jijai do ngen ite, kasih-Ne jijai sempurno lem dirai ite.

¹³Kerno Allah bi melei Roh-Ne ngen ite, mako ite namen bahwo ite bi idup jijai do ngen Allah, ngen Allah idup jijai do ngen ite.

¹⁴Keme suang bi kemliak Anok Allah, ngen keme melei namen bahwo Si nutus Bapa utuk jijai Rajo Penyelamat dunio yo.

¹⁵Api makau bahwo Yesus o Anok Allah, Allah idup jijai do ngen tun o, ngen tun o kulo idup jijai do ngen Allah.

¹⁶Ite suang namen ngen pecayo kasih Allah ngen ite. Allah o kasih. Tun de idupne kenuaso kasih, tun o jijai do ngen Allah, ngen Allah jijai do ngen si.

¹⁷Kasih neane jijai sempurno lem dirai ite, kunyau supayo ite temuan keberanian neak Bilai Penghakiman. Ite bakea temuan keberanian, sebab idup ite neak dunio yo serai awei idup Kristus.

¹⁸Tun de meding kasih Allah, coa namen ngen saben; sebab kasih de sempurno menyep kute asai saben. Jijai nyatoba bahwo tun ati meding kasih Allah ngen sempurno amen tun o saben madep Bilai Penghakiman.

¹⁹Ite mengasiak, sebab Allah lebiak dute mengasiak ite.

²⁰Amen suang tun madeak, “Uku mengasiak Allah,” tapi si coa mengasiak saudarone, tun o pendusta. Sebab tun de coa mengasiak saudarone de kemliakne, coa mukin dapet mengasiak Allah de coa kemliakne.

²¹Sebab o, dioba periteak de nelei Kristus ngen ite: Api mengasiak Allah harus mengasiak saudarone kulo.