Read Rejang 2 YOHANES 1 Bible Online

2 YOHANES 1 - Rejang bible

2 YOHANES 1

¹Ngen jemaat de niliak Allah, ngen anggota-anggotane. Su'et yo kunei uku, pemipin jemaat de sungguak-sungguak cito ngen udi. Iso cuma uku, tapi kute tun de kemnal Allah de benea, cito udi kulo.

²Sebab Allah tinggea neak lem atei ite, ngen de bakea semerto ite sapei selamo-lamone.

³Kasih karunia, rahmat ngen damai sejahtera kunei Allah Bapa, ngen kunei Yesus Kristus, Anok Bapa, bakea semerto ite lem kebenaran ngen kasih.

⁴Uku kemliak riang, namen bahwo pa'o kunei anok-anoknu idup lem kebenaran sesuai ngen periteak de sudo ite temimo kunei Bapa.

⁵ Kerno o, uku minoi nien supayo ite kute samo-samo mengasiak. De uku madeak yo iso suaktau periteak de belau; periteak yo sudo nelei ngen ite sejak ite muloi pecayo.

⁶Mengasihi taine idup temurut periteak-periteak Allah. Ngen periteak de udi sudo teni'uk sejak semulo adeba bahwo udi harus hidup ngen mengasiak do ngen de luyenne.

⁷Dau penyesat bi teko ngen lalau moi kute dunio, tobo'o adeba tun-tun de coa makau bahwo Yesus Kristus teko moi dunio sebagai su'ang manusio. Tun de awei o adeba penyesat, ngen musuak Kristus.

⁸Atei-ateiba supayo jibeak sapei nyep jano de sudo keme nea utuk udi, tapi supayo udi dapet upeak kutene.

⁹Tun de coa bepegong ngen ajaran Kristus, tapi nyipang kunei jano de najea Kristus, tun o coa temuan Allah. Tun de tep ade neak lem ajaran Kristus, taine temuan Allah Bapa atau Anok.

¹⁰Kerno o, amen ade tun teko, melei namen ngen udi ajaran de coa najea Kristus, jibeakba temimo tun o neak lem umeaknu atau melei salam ngen si.

¹¹Sebab tun de melei salam ngen tun de awei o, si temasuk kulo besamo tun o lem menea plep kidek.

¹²Dau nien de harus uku melei namen ngen udi, tapi lebiak baik jibeak liwet su'et. Uku ma'ep dapet semulau ngen miling su'ang ngen udi, supayo atei ite sungguak-sungguak riang.

¹³Salam ngen udi kunei anok-anok saudaro udi de terpilih.