Read Rejang YUDAS 1 Bible Online

YUDAS 1 - Rejang bible

YUDAS 1

¹ Saudaro-saudaro de sudo nok ngen de kembiak Allah Bapa kasihi, serto jenagai utuk Yesus Kristus. Sebagai hamba Yesus Kristus, uku — Yudas — saudaro kunei Yakobus,

²ma'ep: Semoga Allah melei ngen udi berkat, rahmat, sejahtera ngen berlimpah-limpah.

³Saudaro-saudaro de tecito! Uku sungguak-sungguak berusaho temulis su'et ngen udi tetang keselamatan de samo-samo ite meding. Tapi uyo uku meraso harus melei nasihat ngen temulis su'et yo utuk udi, supayo udi tep berjuang utuk imen de sudo nelei Allah utuk selamo-lamone ngen umat-Ne.

⁴Sebab seca'o coa sadar ade tun-tun de seca'o de diem bi masuk moi tengeak-tengeak ite. Tobo'o tun-tun bejat de semaleak bito tetang rahmat Allah ite, utuk dapet kesepatan utuk melampiaskan hawa nafsu tobo'o. Ngen tobo'o coa lok temimo Yesus Kristus, do-done Penguaso ngen Tuhan ite. Sejak bel'o ukuman utuk tobo'o sudo tentau lem Kiteb Sucai

⁵ Kutene o sudo udi namen, tapi uku lok minget udi tetang awei ipe Tuhan semelamat umat-Ne kunei Mesir, tapi sesudo'o benaso tun-tun de coa pecayo.

⁶Tingetba kulo tobo malaikat de coa taat ngen liwet batas-batas kuaso tobo'o, sehinggo lalau teminggea penan tinggea tobo'o. Allah meket malaikat-malaikat o ngen ratoi abadi, neak lem penan de kelem neak beak bumai. Neak di tobo'o nukum trus sapei tobo'o nelei ukuman pado bilai lai.

⁷ Tingetba kulo kota Sodom ngen Gomora serto kota-kota neak sekitarne, de pendudukne menea hal-hal awei de nea malaikat-malaikat o. Tobo'o menea hal-hal de cabul ngen bejat, sehinggo tobo'o senikso ngen ukuman opoi de kekal, utuk jijai peringatan utuk kute tun

⁸Awei o kulo tun-tun o berhayal sapei tobo'o menea duso teadep awok tobo'o suang. Tobo'o manggap rendeak kuaso Allah ngen mino makhluk-makhluk de mulio neak surgo.

⁹ Mikhael suang de jijai pemipin malaikat-malaikat, coa perneak menea awei o. Waktau si tekea ngen Iblis lem selisiak tetang api de bakea dapet mayit Musa, Mikhael coa binai mukum Iblis ngen kecek-kecek de coa baik. Mikhael cuma madeak, “Tuhan bakea mengiak ngen ko!”

¹⁰Tapi tobo'o mino kute sesuaktau de coa tobo'o ngertai. Tobo'o serai awei benatang-benatang de coa temuan akea, de namen hal-hal ngen nalurine bae. Tapi justru hal-hal'oba de jijai sebab kehancuran tobo'o.

¹¹ Celakoba tobo'o! Tobo'o bi motoa dalen Kain. Kunyau dapet caci, tobo'o mbin diraine moi lem kesesatan, serai awei Bileam. Tobo'o benaso kerno brutak awei Korah.

¹²Pado waktau udi menea pesta, sikep tun-tun o menea udi muak. Sebab tobo'o kembiak jelen mukmei, coa selek-selek, cuma meting diraine suang. Tobo'o awei embun de kembus angin, tapi coa temu'un ujen. Tobo'o kulo awei pun de coa ade bueakne kunyau musim bueak; pun-pun de sudo cenabut baletne ngen de sudo matei.

¹³Serai awei ombak lai neak laut menimbulkan ukuak, awei o kulo tobo'o mukuak plep-plep kidek. Tobo'o adeba awei bitang-bitang de sudo Allah seniap penanne neak lem kegelapan utuk selamo-lamone.

¹⁴ Henokh, keturunan ketujuak kunei Adam, bel'o perneak bernubuat tetang tun-tun o. Henokh madeak, “Keliak, Tuhan bakea teko ngen beribau-ribau malaikat-Ne de sucai,

¹⁵utuk makim kute tun. Tuhan bakea mukum tun-tun jahat kerno plep-plep tobo'o de bejat. Si bakea mukum tun beduso ngen durhako kerno kute kecek mino de nedeakne.”

¹⁶Tun-tun o bogoa bae menggerutu ngen semaleak tun luyen. Tobo'o idup temurut klok-klok tobo'o de beduso. Tobo'o ngerunyam tetang dirai suang, jemilet tun supayo dapet utung.

¹⁷Tapi Saudaro-saudaroku de tecito, ingetba bakea jano de bel'o de nadeak rasul-rasul Tuhan ite Yesus Kristus.

¹⁸ Tobo'o melei namen telebiak dute ngennu bahwo menjelang akhir zaman bakea timboa tun-tun de bakea mino udi, adeba tun-tun de idup temurut klok-klok tobo'o de beduso.

¹⁹Tobo'o dioba tun-tun de menimbulkan pepecuak. Tobo'o coa kenuaso Roh Allah, tapi klok-klok tabiat duniawi.

²⁰Tapi udi, Saudaro-saudaroku, binaba terus idupnu bedasar pecayonu ngen Yesus Kristus. Imennu o kembiak sucai. Sementaro o bedu'oba ngen kuaso Roh Allah,

²¹ngen idupba terus neak lem naungan kasih Allah selamo udi mbot rahmat Yesus Kristus Tuhan ite, de bakea melei ngennu idup sejati ngen kekal.

²²Te'adep tun-tun de ragau ateine, lokba udi temunjuk belas kasih.

²³Tarikba tun keluea kunei lem opoi utuk semlamat tobo'o. Te'adep tun-tun luyenne lokba udi temunjuk belas kasih senerto perasaan saben, tapi jengikba bahkan keracok tobo'o kulo de bi nelngei ngen klok tobo'o de beduso.

²⁴Allah, de sanggup jemago supayo udi coa us, ngen de sanggup mbinnu moi hadirat-Ne de mulio ngen sukocito ngen coa ade cacet,

²⁵Siba dedone Allah, Penyelamat ite liwet Yesus Kristus Tuhan ite. Siba Allah de mulio, agung, bekuaso ngen bewibawa sejak bel'o nien sapei uyo ngen utuk selamo-lamone! Amin.