Read Rejang WAHYU 1 Bible Online

WAHYU 1 - Rejang bible

WAHYU 1

¹Isai bukau yo tetang jano de nadeak Yesus Kristus tetang peristiwo-peristiwo de bakea tejijai. Allah melei namen ngen Kristus supayo Si kemten ngen hamba-hamba Allah jano de segro harus tejijai. Kristus mutus malaikat-Ne ngen Yohanes, hamba-Ne, utuk melei namen peristiwo-peristiwo o ngen si.

²Mako Yohanes kulo cemrito kute de kemliakne o; ngen dioba laporanne tetang pesen kunei Allah de kenuet Yesus Kristus liwet saksai-Ne.

³Riangba tun de mbaco ngen tun de temi'uk bito tetang bukau yo serto taat ngen jano de tetulis neak lemne. Sebab coa an igai kutene yo bakea tejijai.

⁴ Saudaro-saudaro de ade neak ketujuak jemaat neak daerah Asia! Uku, Yohanes, ma'ep udi nelei berkat ngen sejahtera kunei Allah — adeba Si de ade, de sudo ade, ngen de ade seterusne — ngen kulo kunei ketujuak roh de ade neak adep takhta Allah,

⁵ ngen kunei Yesus Kristus, saksai de setia. Siba de pertamo-tamo idup igai kunei matei ngen Siba penguaso das rajo-rajo dunio. Yesus mengasiak ite, ngen kematian-Ne Si bebas kunei duso-duso ite,

⁶ ngen jemijai ite bangso khusus imem-imem, de melayan Allah, Bapa-Ne. Yesus Kristus o ba de agung ngen bekuaso utuk selamo-lamone. Amin!

⁷ Keliak, si teko ngen embun-embun! Kute tun bakea kemliak Si, termasuk kulo tobo'o de sudo temikem-Ne. Kute bangso neak bumai bakea ibo kerno Si. Au, paset! Amin!

⁸ “Ukuba de pertamo ngen terakhir,” nadeak Tuhan Allah, de ade, de sudo ade, ngen de ade seterusne, De Mahakuaso.

⁹Uku Yohanes, saudaro udi de senasib ngen udi lem saro de nding tiep penotoa Kristus. Ite tabah saro sebagai umat-Ne. Uku nuang moi Pulau Patmes kerno uku melei namen pesan kunei Allah, de kenuet Yesus liwet saksai-Ne.

¹⁰Pado bilai Tuhan, uku kenuaso Roh Allah, lajau uku temi'uk sa'ei de lek — awei sa'ei trupet — sa'ei neak belakangku.

¹¹Sa'ei o madeak, “Tulisba jano de ko kemliak, ngen mboba bukau o ngen ketujuak jemaat yo: Efesus, Smirna, Pergamus, Tiatira, Sardis, Filadelfia, ngen Laodikia.”

¹²Uku kemliak moi belakang utuk kemliak api de o de miling ngen uku. Lajau uku kemliak tujuak kekea lapu kunei mas.

¹³ Neak tengeak-tengeak kekea-kekea lapu o je su'ang tun de ketenne awei Anok Manusio, makei jubah de panjangne sapei kekea. Neak dadone si makei bteng kunei mas.

¹⁴ Buk-Ne putiak awei bulau bebirai, putiak awei kapes, ngen matai-Ne awei opoi;

¹⁵ kekea-Ne mengkilet awei temagai nembem. Sa'ei-Ne awei sa'ei bioa tejun de lai.

¹⁶Tangen kanen-Ne megong tujuak bitang, ngen kunei bibia-Ne keluea debueak pedang tajem de bematai duai. Papea-Ne bersinar awei matai bilai pado tengeak bilai

¹⁷ Ketiko uku kemliak-Ne, uku tegulek neak adep-Ne awei tun matei. Tapi Si mpek tangen kanen-Ne moi dasku lajau madeak, “Jibeak saben! Ukuba de Pertamo ngen Terakhir.

¹⁸Ukuba Si de idup! Uku bi matei, tapi kemliakba, Uku idup utuk selamo-lamone. Uku bekuaso das matei, ngen das dunio tun matei.

¹⁹Sebab o, tulisba hal-hal de ko kemliak, adeba hal-hal de ade uyo, ngen hal-hal de bakea tejijai.

²⁰Dioba resio kunei tujuak bitang de udi kemliak neak tangen kanen-Ku, ngen kunei tujuak kekea lapu mas o: Tujuak bitang o adeba paro malaikat ketujuak jemaat, ngen tujuak kekea lapu o adeba ketujuak jemaat o.”