Read Rejang WAHYU 10 Bible Online

WAHYU 10 - Rejang bible

WAHYU 10

¹Lajau uku kemliak suang malaikat perkasa de luyen tu'un kunei surgo. Si tenutup embun, ngen pelangi melikea neak ulaune. Papeane bersinar awei matai bilai, kekeane awei tiang opoi.

²Neak tangenne ade debueak gulungan kiteb titik de tukok. Si mpek kekea kanenne neak laut ngen kekea kideune neak da'et.

³Lajau si menggang ngen lek awei sa'ei singo.

⁴Sesudo ketujuak gutua o miling, uku lok temulisne, tapi uku temi'uk sa'ei kunei surgo madeak, “Neresioba jano de nadeak tujuak gutua o; jibeak temulisne!”

⁵ Lajau malaikat de uku kemliak je neak das laut ngen bumai, maket tangen kanenne moi lenget.

⁶Si supeak demi Allah de idup selamo-lamone, de jemijai lenget, bumai ngen laut serto kute de ade neak lemne. Malaikat o madeak, “Waktaune coa bakea mondor igai!

⁷Tapi amen malaikat ketujuak kembus trupetne, Allah bakea menea rencano resio-Ne, awei bi Si madeak ngen hamba-hamba-Ne, adeba paro nebai.”

⁸ Sesudo'o sa'ei de uku temi'uk kunei surgo o, miling igai ngen uku. Si madeak, “Lalauba mok gulungan kiteb de tukok neak tangen malaikat de je neak laut ngen bumai o.”

⁹Lajau uku lalau magea malaikat o ngen minoi supayo si melei gulungan kiteb titik o ngen uku. Si madeak, “Mokba ngen mbukba dio. Neak lem teneinu si bakea jijai pet, tapi neak lem bibianu si mis awei mis medau.”

¹⁰Uku mok gulungan kiteb titik o kunei tangenne lajau mbukne. Neak bibia asaine awei mis medau, tapi sesudo uku temlenne, neak lem tenei si jijai pet.

¹¹Sesudo'o uku nelei periteak, “Melei namenba debat igai bito Allah tetang bangsa-bangsa, negara-negara, bahaso-bahaso, ngen rajo-rajo.”