Read Rejang WAHYU 14 Bible Online

WAHYU 14 - Rejang bible

WAHYU 14

¹ Sesudo'o uku kemliak, lajau keten Anok Bebirai o je neak das Tebo Sion. Besamo Si ade sotos pat puluak pat ribau tun ngen neak ning tobo'o tetulis gen-Ne ngen gen Bapa-Ne.

²Lajau uku temi'uk sa'ei kunei lenget aw'ei sa'ei bioa tejun delai ngen awei gutua de lai. Sa'ei o teni'uk awei sa'ei musik kunei pemain-pemain kecapi de gidong main kecapine.

³Neak adep takhta ngen kepat makhluk serto paro pemipin neak sekeliling takhtane o, sotos pat puluak pat ribau tun o embin legau de blau. Coa su'ang tun kulo dapet belajea legau o seluyen kunei sotos pat puluak pat riba tun de sudo bebas kunei bumai o.

⁴Tobo'o tun-tun de tep sucai awei perawan, kerno coa menea hubungan ngen selawei. Tobo'o temotoa Anok Bebirai o moi ipe bae si lalau. Kunei antaro umat manusio, tobo'oba de sudo bebas sebagai persembahan de pertamo ngen Allah ngen Anok Bebirai.

⁵ Coa perneak tobo'o mengike; ngen coa ade cacet ngen tobo'o.

⁶Lajau uku kemliak suang malaikat luyen de tebang lekat neak lenget. Malaikat o mbin bito tetang Bito Baik de abadi utuk senapei ngen manusio neak bumai adeba ngen kute bangsa, suku, bahaso ngen negara.

⁷Malaikat o menggang ngen sa'ei de lek, “Sabenba ngen Allah, ngen pujaiba kebesaran-Ne! Sebab bi waktaune Allah mukum manusio. Sembeakba Si de jemijai lenget, bumai, laut ngen kute matai bioa!”

⁸ Malaikat keduai motoa malaikat de pertamo samo menggang, “Bi us! Kota Babel de lai bi ajua! Si sudo menea kute bangsa jijai mabuk bioa anggur — adeba anggur kunei hawa nafsu zinahne!”

⁹Su'ang malaikat ketelau motoa duai malaikat o, samo menggang ngen sa'ei de lek, “Tun de nyembeak benatang o ngen patungne, ngen temimo tando neak ningne atau tangenne,

¹⁰ tun o bakea menem anggur Allah, adeba anggur murka Allah de sudo mpek lem penanne, coa ade ku'ang didik kulo! Kute tun o bakea senikso neak lem opoi ngen bli'ang neak adep malaikat-malaikat sucai ngen neak adep Anok Bebirai o.

¹¹ Asep ngen opoi de semikso tun o bakea kasep terus utuk selamo-lamone. Lueng kelmen coa ade bedan-bedanne tobo'o tesikso, adeba tobo'o de nyembeak benatang o ngen patungne, kute tun de temuan tando gen benatang o.”

¹²Lem hal yo umat Allah de taat ngen periteak-periteak Allah de setia ngen Yesus, perlu jijai tabah.

¹³Lajau uku temi'uk sa'ei kunei surgo madek, “Tulisba dio: Muloi uyo, riangba tun-tun de matei waktau dong melayan Tuhan!” “Benea!” jawab Roh Allah. “Tobo'o bakea bedan kerjo keras, kerno asea pelayanan tobo'o bakea semerto tobo'o.”

¹⁴ Sesudo'o uku kemliak, mako keten mbun de putiak. Neak das mbun o temot su'ang de ketenne awei manusio. Neak ulau-Ne ade debuak mahkota mas, ngen neak tangen-Ne ade debuak sabit de tajem.

¹⁵ Sesudo'o su'ang malaikat luyen keluea kunei Bait Sucai Allah. Ngen sa'ei de lek, si menggang ngen Si de temot neak das mbun o, “Nanyunba sabit-Nu o ngen panenba uyo, sebab bi waktaune utuk panen; panen neak bumai bi mesok!”

¹⁶Lajau Si de temot neak das awan o nanyun sabit-Ne moi bumai, mako bumai bi panen.

¹⁷Sesudo'o uku kemliak su'ang malaikat luyen igai keluea kunei Bait Sucai neak surgo. Si kulo megong de bueak sabit de tajem.

¹⁸Sesudo'o, su'ang malaikat luyen, de bekuaso das opoi, teko kunei mezbah. Ngen sa'ei de lek si menggang ngen malaikat de megong sabit de tajem o, “Nanyunba sabit nu o ngen temuun buak-buak pun anggur neak bumai, kerno buak-buakne bi mesok!”

¹⁹Mako malaikat o manyun sabitne moi bumai ngen temtok bueak-bueak anggur kunei punne, lajau mpekne moi lem Alat miyuak anggur, adeba murka Allah.

²⁰ Bueak-bueak anggur o niyuak neak luea kota, ngen kunei alat miyuak anggur o kelueaba daleak awei bioa de'es, uakne telau otos kilometer, ngen lemne hampir duai meter.