Read Rejang WAHYU 19 Bible Online

WAHYU 19 - Rejang bible

WAHYU 19

¹Sesudo'o uku temi'uk sa'ei awei sa'ei tun dau gidong nyanyi kunei surgo de menggang, “Pujaiba Allah! Allah ite adeba Allah de semlamat; Si Allah de agung ngen bekuaso!

² Hukuman-Ne adea ngen bijaksana! Si bi melei ukuman ngen selawei nakea de lai, de musak dunio ngen perzinahanne. Allah sudo mukum selawei nakea o, sebab si munuak hamba-hamba Allah.”

³ Lajau sa'ei tun dau o menggang igai, “Pujaiba Allah! Asep kunei opoi de mbem kota lai o bakea ngebuk coa pakei sudo!”

⁴Mako keduai puluak pat pemipin ngen kepat makhluk de neak sekeliling takhta o tukup ngen nyembeak Allah de temot neak das takhta. Tobo'o madeak, “Amin! Pujaiba Allah!”

⁵ Lajau teni'uk kunei takhta o sa'ei de madeak, “Pujaiba Allah, hai kute hamba Allah, ngen kute tun — lai titik — de nyembeak Allah!”

⁶ Sesudo'o uku temi'uk sa'ei awei sa'ei sekelopok tun dau nien; sa'eine awei umbok lai ngen awei gutua gemruduk. Uku temi'uk tobo'o madeak, “Pujaiba Allah! Sebab Tuhan, Allah ite De Mahakuaso o uyo meriteak!

⁷Maroba ite beriang-riang ngen sukacito; maroba ite mujai kebesaran-Ne! Sebab bi sapei bilai pernikahan Anok Bebirai o, ngen pengaten selawei-Ne bi siap utuk nikeak.

⁸Keracok linen de kilet sudo nelei ngen si utuk nakei.” (Keracok linen o adeba plep-plep baik de nea umat Allah.)

⁹ Lajau malaikat o madeak ngen uku, “Tulisba dio: ‘Riangba tun de nundang moi pesta nikeak Anok Bebirai o.’ ” Sesudo'o malaikat o temambeak kulo, “Dioba bito benea kunei Allah.”

¹⁰Uku tukup neak adep malaikat o lok nyembeakne, tapi si madeak ngen uku, “Jibeak! Jibeak nyembeak uku, sembeakba Allah! Sebab uku kulo hamba serai awei ko ngen awei kute saudaronu de bepegong teguh ngen saksai Yesus!” Sebab saksai Yesus do'oba de jijai menea tun-tun de bernubuat.

¹¹ Sesudo'o uku kemliak surgo tukok, lajau keten dikup kudo putiak. Gen de mbinne adeba De Setia ngen De Benea. Si adea lem mok keputusan ukuman ngen lem peperangan de nea-Ne.

¹² Matai-Ne awei opoi ngen neak ulau-Ne Si makei dau mahkota. Neak dirai-Ne tetulis do gen; ngen cuma Si su'ang de namen gen o.

¹³Jubah de nakei-Ne bi ndem lem daleak. Ngen Si de senbut “Firman Allah”.

¹⁴Pasukan perang de neak surgo temotoa Si ngen kemnek kudo-kudo putiak, ngen makei keracok linen de putiak bersih.

¹⁵ Kunei bibia-Ne keluea debuak pedang de tajem ngen pedang o Si bakea maleak bangsa-bangsa, ngen Si bakea meriteak tobo'o ngen tokot besai. Si bakea miyuak anggur neak lem alat utuk miyuak anggur murka Allah De Mahakuaso.

¹⁶Neak jubah-Ne ngen neak balung-Ne tetulis do gen, “Rajo kute rajo, ngen Tuhan kute tuan.”

¹⁷ Lajau uku kemliak su'ang malaikat je neak das matai bilai. Ngen sa'ei de lek si menggang ngen kute burung de tebang neak udaro, “Maroba bekopoa utuk moi lem perjamuan Allah, perjamuan de lai.

¹⁸Maroba mbuk daging rajo-rajo, daging panglima-panglima ngen daging pahlawan-pahlawan; maroba mbuk daging tun-tun de mbin kudo ngen daging kudo-kudone ngen daging kute umat manusio, lai ngen titik, hamba ngen tun bebas!”

¹⁹Sesudo'o uku kemliak benatang o, ngen rajo-rajo bumai ngen tentra-tentra tobo'o, bekopoa utuk tepur melawen Si de mbin kudo putiak ngen tentra-Ne

²⁰ Mako benatang o takep besamo-samo ngen nebai palsu de sudo menea keajaiban-keajaiban neak adep benatang o. (Ngen keajaiban-keajaiban o ba benatang o mikea tun-tun de temuan tando benatang o, ngen tun-tun de nyembeak patung benatang o.) Lajau benatang o ngen nebai palsu o nuang idup-idup moi lem lautan opoi ngen bli'ang.

²¹Ngen tentra perang tobo'o nunuak ngen pedang de keluea kunei bibia penungang kudo putiak o. Mako burung-burung kulo teko mbuk daging tobo'o de nunuak o.