Read Rejang WAHYU 4 Bible Online

WAHYU 4 - Rejang bible

WAHYU 4

¹Sesudo'o uku dapet kemliak igai. Uku kemliak debueak bang tukok neak surgo. Sesudo'o teni'uk igai sa'ei de mulo-mulone bi miling ngen uku awei sa'ei trupet. Sa'ei o madeak, “Maro kenek mio. Uku bakea kemten ngen udi jano de bakea tejijai be.”

² Langsung bae uku kenuaso Roh Allah. Lajau uku kemliak neak surgo ade debueak takhta, ngen ade suang tun temot neak takhta o.

³Papea tun o bersinar awei permata baiduri pandan ngen permata delima. Do warno zamrud belikea neak takhta o.

⁴Lem betuk lingkaran sekeliling takhta o ade duai puluak pat takhta de luyen. Neak di temot duai puluak pat pemipin de makei keracok putiak, ngen makei mahkota mas.

⁵ Kunei takhta o terpancar cahayo glep ngen keluea sa'ei gutua de kembiak lai. Ngen neak adep takhta o ade tujuak obor de nyala; do'oba ketujuak Roh Allah.

⁶ Ade kulo neak adep takhta o sesuaktau de keten awei lautan kaco, bening awei kristal. Neak sekeliling takhta, tiep bidingne, ade pat makhluk, de rogok adep ngen rogok belakangne penuak ngen matai.

⁷Makhluk de pertamo keten awei singo. De keduai, awei sapai sebong. De ketelau temuan papea awei papea manusio. De kepat, keten awei burung rajawali de gidong tebang.

⁸ Kepat makhluk o, masing-masing temuan num sayep, sekelilingne ngen neak peak lemne penuak ngen matai. Lueng kelmen makhluk-makhluk o coa bedan-bedanne nyanyi, “Sucai, sucai, sucaiba Tuhan, Allah Mahakuaso; de ade, de sudo ade, ngen de ade seterusne.”

⁹Kepat makhluk o mbin legau pujian, hormat ngen syukur ngen Si de temot neak takhta o, adeba Si de idup utuk selamo-lamone. Ngen pado waktau makhluk-makhluk o nyanyi,

¹⁰keduai puluak pat pemipin o tukup neak adep tun de temot neak takhta o, lajau nyembeak Si de idup selamo-lamone. Sesudo'o tobo'o muang mahkota-mahkota tobo'o neak adep takhta o serto madeak,

¹¹“Ya Tuhan, ya Allah keme! Ko bae de layak temimo pujian, hormat ngen kuaso. Sebab Koba pencipta kute sesuaktau, ngen das kelok-Nu kulo kute sesuaktau o bi tejijai ngen idup.”