Read Rejang WAHYU 7 Bible Online

WAHYU 7 - Rejang bible

WAHYU 7

¹ Sesudo'o, uku kemliak pat tun malaikat je neak kepat penjuru bumai. Tobo'o temaen kepat angin neak bumai supayo jibeak ade ibut de kembus neak da'et atau neak laut, atau neak pun-pun.

²Lajau uku kemliak suang malaikat de luyen teko kunei peak timur. Si mbin segel kunei Allah de idup. Ngen sa'ei lek malaikat o menok kepat malaikat de sudo kenuaso kunei Allah utuk musak bumai ngen laut.

³ Malaikat o madeak, “Jibeak kileak musak bumai ngen laut, atau pun-pun amen keme ati melei tando segel neak ning hamba-hamba Allah ite.”

⁴Lajau uku nelei namen bahwo ade 144.000 tun de nelei tando segel kunei Allah neak ning tobo'o. Tobo'o nemok kunei keduai belas suku bangso Israel;

⁵kunei tiep suku 12.000 tun. Adeba kunei suku: Yehuda, Ruben, Gad,

⁶Asyer, Naftali, Manasye,

⁷Simeon, Lewi, Isakhar,

⁸Zebulon, Yusuf, ngen Benyamin.

⁹Sesudo'o uku kemliak igai, lajau keten tun dau de luea biaso daune — coa ade suang kulo de dapet mitung jumlahne. Tobo'o adeba tun-tun kunei tiep bangsa, suku, negara, ngen bahasa. Ngen makei jubah de putiak-putiak ngen megong dan-dan pun palem neak tangen, tun-tun dau o je madep takhta ngen madep Anok Bebirai o!

¹⁰Lajau ngen sa'ei lek tobo'o menggang, “Keselamatan ite tekone kunei Allah, de temot neak das takhta, ngen kunei Anok bebirai o!”

¹¹Kute malaikat je kemliling takhta ngen paro pemipin serto kepat makhluk o. Malaikat-malaikat o tukup neak adep takhta lajau nyembeak Allah.

¹²Tobo'o menggang, “Amin! Tepujaiba Allah ite de agung ngen bijaksana. Si patut dapet ucapan-ucapan syukur ngen hormat. Si bekuaso ngen kuet utuk selamo-lamone! Amin.”

¹³Suang kunei pemipin-pemipin o betanye ngen uku, “Tun-tun de makei jubah putiak yo, api tobo'o ngen kunei ipe tobo'o teko?”

¹⁴ “Uku coa namen, Tuan, Tuan suang de namen,” jawab uku. Mako si madeak ngen uku, “Dioba tun-tun de sudo ngen selamat kunei kesusahan de luea biaso. Tobo'o bi mpuk jubah tobo'o ngen meneane jijai putiak ngen daleak Anok Bebirai o.

¹⁵Do'oba sebabne tobo'o je neak adep takhta Allah. Ngen Si de temot neak das takhta o bakea teko ngen tobo'o utuk jemago tobo'o.

¹⁶ Tobo'o coa bakea meding nyemen atau haus; matai bilai atau panes coa igai bakea mbem tobo'o,

¹⁷ sebab Anok Bebirai de temot neak tengeak-tengeak takhta o bakea jijai gembala tobo'o. Si bakea mi'ing tobo'o moi sumber bioa de melei kehidupan. Ngen Allah bakea mapus kute bioa matai kunei matai tobo'o.”