Read Revised Akuapem Twi DC-KYERƐW KRONKRON Gyenesis 13 Bible Online

Gyenesis 13 - Revised Akuapem Twi DC-KYERƐW KRONKRON bible

Gyenesis 13

¹Na Abram fii Misraim, ɔno ne ne yere ne nea ɔwɔ nyinaa, ne Lot nso, baa negeb.

² Na Abram anya ne ho sɛ, mmoa ne dwetɛ ne sika mu.

³Na odii atutena fi negeb koduu Betel, nea kan ne ntamadan si no, wɔ Betel ne Ai ntam,

⁴ nea afɔremuka a osii kan no wɔ hɔ. Na Abram sɔree AWURADE wɔ hɔ.

⁵Na Lot nso a ɔne Abram nam no wɔ nguan ne anantwi ne ntamadan.

⁶Na asase no nso mma wɔn sɛ wɔbɛtena faako, efisɛ wɔn ahode dɔɔso sɛ, enti wɔantumi antena faako.

⁷Na akasakasa baa Abram mmoahwɛfo ne Lot mmoahwɛfo ntam. Na bere no mu na Kanaanfo ne Perisifo tete asase no so.

⁸ Na Abram ka kyerɛɛ Lot sɛ mesrɛ wo, mma akasakasa mmma me ne wo ntam, ne me mmoahwɛfo ne wo mmoahwɛfo ntam, na yɛyɛ anuanom.

⁹Ɛnyɛ asase no nyinaa na ɛda w'anim yi? Mesrɛ wo, twe wo ho fi me ho, sɛ wofa benkum a, mɛfa nifa, na sɛ wofa nifa a, mɛfa benkum.

¹⁰Na Lot maa n'ani so hwɛɛ Yordan nyinaa de kosi Soar huu sɛ ne nyinaa so wɔ nsu te sɛ AWURADE turo no te sɛ Misraim, ansa na AWURADE resɛe Sodom ne Gomora no.

¹¹Na Lot paw Yordan dantaban no nyinaa, na otutu faa apuei fam; na anuanom no dii mpaepaemu.

¹²Abram tenaa Kanaan asase so, na Lot de, ɔtenaa Yordan dantaban no nkurow mu, na otutuu ne ntamadan ara de koduu Sodom.

¹³ Nso Sodomfo yɛ awudifo ne nnebɔneyɛfo akɛse AWURADE anim.

¹⁴Na Lot tew ne ho fii Abram ho no, AWURADE ka kyerɛɛ Abram sɛ: Ma w'ani so, na fi nea wowɔ hɔ hwɛ atifi fam ne anafo fam ne apuei ne atɔe.

¹⁵ Na asase a wuhu yi nyinaa, wo ne w'asefo na mede mɛma mo daa.

¹⁶ Na mɛma w'asefo adɔɔso sɛ asase so mfutuma, na sɛ obi tumi kan asase so mfutuma a, ɛnne na obetumi akan w'asefo nso.

¹⁷Sɔre, fa asase no tenten ne ne tɛtrɛtɛ mu, na wo na mede mɛma wo.

¹⁸ Na Abram tutuu ne ntamadan, na ɔbɛtenaa Mamre pɔw a ɛwɔ Hebron no ho, na osii afɔremuka maa AWURADE wɔ hɔ.