Read Revised Akuapem Twi DC-KYERƐW KRONKRON Gyenesis 14 Bible Online

Gyenesis 14 - Revised Akuapem Twi DC-KYERƐW KRONKRON bible

Gyenesis 14

¹Na Sinear hene Amrafel, Elasar hene Ariok, Elam hene Kedorlaomer ne Goiim hene Tideal bere so,

² wɔne Sodom hene Bera ne Gomora hene Birsa, Adma hene Sinab ne Seboim hene Semeber ne Bela (a ɛne Soar) hene dii ako.

³Ahemfo yi nyinaa behyiae Sidim bon mu, (ɛno ne nkyene Po no).

⁴Mfirihyia dumien na wɔsom Kedorlaomer na afe a ɛto so dumiɛnsa no, wɔtew atua.

⁵Na afe a ɛto so dunan no, Kedorlaomer ne ahene a wɔkeka ne ho no bekum Refaim wɔ Asterot-karnaim, ne Susifo wɔ Ham, ne Emifo wɔ Kiriataim tataw so,

⁶ne Horifo wɔ wɔn bepɔw Seir so de kosii El-paran a ɛwɔ sare so no.

⁷Na wɔsan baa En-mispat, na wɔkaa Amalekfo asase nyinaa ne Amorifo nso a wɔte Hasesontamar no gui.

⁸Na Sodom, Gomora, Adma, Seboim ahemfo ne Bela (a ɛne Soar) hene fi bae.

⁹Na wɔne Elam hene Kedorlaomer, Goiim hene Tideal, Sinear hene Amrafel ne Elasar hene Ariok de bɛbɔɔ ani wɔ Sidim bon mu, ahene baanan a wɔreko atia baanum.

¹⁰Na Sidim bon mu yɛ ama amoamoa ara nko. Na Sodom ne Gomora ahemfo guanee. Na ebinom totɔɔ amena no mu, na wɔn a aka no guan kɔɔ bepɔw so.

¹¹Na wɔfaa Sodom ne Gomora nneɛma nyinaa ne wɔn nnuan nyinaa de siim kɔe.

¹² Na wɔfaa Abram ne nua ba Lot a ɔte Sodom ne n'ahode kɔe.

¹³Na oguanfo bi bɛka kyerɛɛ Hebrini Abram a ɔte Amorini Mamre, a ne nuanom ne Eskol ne Aner ne nua, pɔw mu; nso wɔne Abram wɔ apam.

¹⁴Na Abram tee sɛ wɔafa ne nua dommum no, ɔde ne mmarima a wɔawo wɔn wɔ ne fi ahasa dunwɔtwe tuu sa tiw wɔn koduu Dan.

¹⁵Na ɔne ne nkoa kyɛɛ wɔn ho mu baa wɔn so anadwo, na wɔbobɔɔ wɔn, na wɔtaa wɔn koduu Hoba a ɛda Damasko benkum so no.

¹⁶Na ɔde nneɛma no nyinaa ne ne nua Lot nso ne ne nneɛma ne mmea no nso ne nkurɔfo no san bae. Melkisedek hyira Abram.

¹⁷Na ɔsan fii Kedorlaomer ne ahemfo a ɛkeka ne ho no so nkonimdi no reba no, Sodom hene fi kohyiaa no wɔ Sawe bon mu.

¹⁸ Na Salem hene Melkisedek de abodoo ne bobesa brɛɛ no; na ɔyɛ ɔsorosoro Nyankopɔn sɔfo.

¹⁹Na ohyiraa no sɛ ɔsorosoro Nyankopɔn a ɔyɛ ɔsoro ne asase wura no nhyira nka Abram,

²⁰na nhyira ne ɔsorosoro Nyankopɔn a ɔde w'atamfo ahyɛ wo nsa. Na Abram maa no nneɛma no nyinaa mu ntotoso du du.

²¹Na Sodom hene ka kyerɛɛ Abram sɛ: Fa nnipa no ma me, na fa ahode no.

²²Na Abram ka kyerɛɛ Sodom hene no sɛ: Mema me nsa so mekyerɛ AWURADE, ɔsorosoro Nyankopɔn a ɔyɛ ɔsoro ne asase wura no,

²³sɛ efi asaawa so de kosi mpaboa hama so, meremfa biribiara a ɛyɛ wo de, na woanka sɛ: Me na mama Abram anya ne ho;

²⁴gye nea mmerante no adi no nko, ne mmarima a wɔne me kɔe no, Aner, Eskol ne Mamre nya wɔn kyɛfa.