Read Revised Akuapem Twi DC-KYERƐW KRONKRON Gyenesis 15 Bible Online

Gyenesis 15 - Revised Akuapem Twi DC-KYERƐW KRONKRON bible

Gyenesis 15

¹ Nsɛm yi akyi no, AWURADE asɛm baa Abram nkyɛn anisoadehu mu sɛ: Nsuro, Abram, mene wo kyɛm, na w'akatua bɛdɔɔso pii.

²Na Abram se: AWURADE Nyankopɔn, ɛdɛn na wode bɛma me? Minni ba na menam, so nea obedi m'ade ne Damaskoni Eliesa anaa?

³Na Abram kae se: Ao, me de, woamma me asefo, na hwɛ, me fienipa na obedi m'ade.

⁴Na AWURADE asɛm baa ne nkyɛn sɛ: Ɛnyɛ oyi na obedi w'ade, na nea obefi wo ankasa asen mu no na obedi w'ade.

⁵ Na ɔde no fii adi kae sɛ: Hwɛ ɔsoro ɛ, na kan nsoromma sɛ wubetumi akan anaa? Na ɔka kyerɛɛ no sɛ: Sɛ w'asefo bɛyɛ nen.

⁶ Na Abram gyee AWURADE dii, na obuu eyi sɛ trenee maa no.

⁷ Na Awurade ka kyerɛɛ no sɛ Mene AWURADE a ɔde wo fii Ur a ɛwɔ Kaldea sɛ mede asase yi mɛma wo sɛ awunnyade.

⁸ Na ose. AWURADE Nyankopɔn, ɛdɛn na mede mehu sɛ menya?

⁹Na AWURADE ka kyerɛɛ no sɛ: Fa nantwi ba a wadi mfe abiɛsa ne abirekyi a wadi mfe abiɛsa ne odwennini a wadi mfe abiɛsa ne aturukuku ne aborɔnoma ba brɛ me.

¹⁰ Na ɔde eyi nyinaa brɛɛ no, na ɔpaepaee wɔn mu abien abien, na ɔde afaafa no kyerɛkyerɛɛ anim totoo hɔ; na nnomaa no de, wampaepae wɔn mu.

¹¹Na nnomaa a wodi nam besisii mmoa afunu no so, na Abram pam wɔn.

¹² Na owia reyɛ akɔtɔ no, Abram daa nnahɔɔ, na hwɛ, ehu ne esum kabii duruu no so.

¹³ Na AWURADE ka kyerɛɛ Abram sɛ: Ohu na hu sɛ w'asefo bɛyɛ ahɔho asase a ɛnyɛ wɔn de so, na wɔasom wɔn, na wɔbɛhaw wɔn mfirihyia ahannan.

¹⁴ Na ɔman a wɔbɛsom wɔn no, mebu wɔn atɛn, na akyiri no, wɔde ahode pii befi hɔ akɔ.

¹⁵Na wo de, wobɛkɔ w'agyanom nkyɛn asomdwoe mu, na wɔasie wo nkwakorabere pa mu.

¹⁶Na awo ntoatoaso anan mu na wɔbɛsan aba ha, efisɛ Amorifo amumɔyɛ nnya nnui ɛ.

¹⁷Na owia tɔe na esum kusuu durui no, hwɛ, biribi a ɛte se gyaframa a efi wusiw ne gyatɛn a ɛdɛw bɛfaa afaafa no ntam.

¹⁸ Da no ara na AWURADE ne Abram pamee sɛ: W'asefo na mede asase yi mama wɔn, efi Misraim asubɔnten ho de kosi asubɔnten kɛse, Eufrate asubɔnten, no so:

¹⁹ Kenifo, Kenisifo, Kadmonifo,

²⁰ Hetifo, Perisifo, Refaimfo,

²¹Amorifo, Kanaanfo, Girgasifo, ne Yebusifo.