Read Revised Akuapem Twi DC-KYERƐW KRONKRON Gyenesis 2 Bible Online

Gyenesis 2 - Revised Akuapem Twi DC-KYERƐW KRONKRON bible

Gyenesis 2

¹Na wowiee ɔsoro ne asase ne nea ɛwɔ mu nyinaa.

² Na da a ɛto so ason no, Onyankopɔn wiee n'adwuma a ɔyɛe no, na da a ɛto so ason no, ɔhome fii n'adwuma a ɔyɛe nyinaa ho.

³ Na Onyankopɔn hyiraa da a ɛto so ason no, na ɔtew ho, efisɛ ɛno mu na Onyankopɔn home fii n'adwuma a ɔbɔe na ɔyɛe nyinaa ho.

⁴Eyi ne sɛnea Awurade Nyankopɔn bɔɔ ɔsoro ne asase.

⁵Na afuw mu nnua nyinaa nnya mmaa asase so, na afuw mu nhaban nyinaa nnya mfifii, efisɛ AWURADE Nyankopɔn nnya ntɔɔ osu nguu asase so ɛ, na onipa a ɔbɛdɔw asase nni hɔ.

⁶Na nsu fi asase so foroe, na ɛfɔw asase ani nyinaa.

⁷ Na AWURADE Nyankopɔn de fam dɔte nwenee onipa, na ohuw nkwa home guu ne hwene mu, na onipa yɛɛ ɔkra teasefo.

⁸Na AWURADE Nyankopɔn yɛɛ turo bi wɔ Eden a ɛwɔ apuei fam, na ɔde onipa a ɔnwenee no, tenaa hɔ.

⁹ Na AWURADE Nyankopɔn maa nnua ahorow nyinaa a wɔhwɛ a, ɛyɛ fɛ, na eye sɛ wodi asase no so, ne nkwa dua a esi turo no mfinimfini, ne papa ne bɔne hu dua fifii asase so.

¹⁰Na asu bi fi Eden bɛfɔw turo no, na efi hɔ ara na emu paepae yɛɛ nsuti anan.

¹¹Nea edi kan no din de Pison, ɛno na ɛkɔntɔn twa Hawila asase a sika wɔ so no nyinaa ho hyia;

¹²na asase no so sika ye; ɛhɔ na bedola ne apopobibiribo wɔ.

¹³Na asu a ɛto so abien no din de Gihon, ɛno na ɛkɔntɔn twa Kus asase nyinaa ho hyia.

¹⁴Na asu a ɛto so abiɛsa ne Tigri, ɛno na ɛsen wɔ Asaria apuei. Na asu a ɛto so anan ne Eufrate.

¹⁵Na AWURADE Nyankopɔn de onipa no kɔtenaa Eden turom sɛ ɔnnɔw na ɔnwɛn hɔ.

¹⁶Na ɔhyɛɛ onipa no sɛ: Turom ha nnua nyinaa, di bi.

¹⁷ Na papa ne bɔne hu dua no de, nni, efisɛ da a wubedi bi no, owu na wubewu.

¹⁸ Na AWURADE Nyankopɔn kae sɛ: Enye sɛ onipa nko tena, mɛyɛ ne sɛso boafo mama no.

¹⁹Na AWURADE Nyankopɔn de dɔte nwenee wuram mmoadoma nyinaa ne wim nnomaa nyinaa, na ɔde wɔn baa onipa no nkyɛn sɛ obehu sɛnea ɔbɛfrɛ wɔn. Na nea onipa de frɛɛ abɔde a ɛte ase biara no, ɛno ara ne ne din.

²⁰Na onipa totoo afieboa nyinaa ne wim nnomaa ne wuram mmoadoma nyinaa din. Nanso onipa de, wɔannya ne sɛso boafo amma no.

²¹Na AWURADE Nyankopɔn maa nnahɔɔ tɔɔ onipa no so, na ɔdae, na oyii ne mfe pare mu biako, na ɔde nam tuaa anan mu.

²² Na AWURADE Nyankopɔn de mfe pare a oyi fii onipa no mu no yɛɛ ɔbea, na ɔde no brɛɛ onipa no.

²³Na onipa no kae sɛ: Ampa ara me nnompe mu dompe ne me honam mu nam ankasa ni. Oyi na wɔbɛfrɛ no ɔbea, efisɛ ɔbarima mu na woyii no fii.

²⁴ Ne saa nti na ɔbarima begyaw ne na ne n'agya, na ɔde ne ho akɔbata ne yere ho, na wɔayɛ ɔhonam koro.

²⁵Na wɔn baanu no deda adagyaw, ɔbarima no ne ne yere, na wɔn ani nwu.