Read Revised Akuapem Twi DC-KYERƐW KRONKRON Gyenesis 24 Bible Online

Gyenesis 24 - Revised Akuapem Twi DC-KYERƐW KRONKRON bible

Gyenesis 24

¹ Na Abraham abɔ akwakoraa, na wadi nna pii, na AWURADE ahyira no ade nyinaa mu.

² Na Abraham ka kyerɛɛ ne somfo ne fie panyin a ɔhwɛ nea ɔwɔ nyinaa so sɛ: Fa wo nsa ka m'asen mu,

³ na mɛma woaka AWURADE, ɔsoro ne asase Nyankopɔn, ntam sɛ: Worenware Kanaanfo a mete wɔn mu yi mmabea mu bi mma me ba.

⁴Na kɔ me kurow ne m'abusua mu kɔware yere ma me ba Isak.

⁵Na ɔsomfo no ka kyerɛɛ no sɛ: Ebia ɔbea no rempɛ sɛ obedi m'akyi aba asase yi so: ɛnne memfa wo ba no mensan menkɔ asase a wufi so bae no so anaa?

⁶Na Abraham ka kyerɛɛ no sɛ: Hwɛ yiye, na woamfa me ba ansan ankɔ hɔ bio.

⁷ AWURADE, ɔsoro Nyankopɔn a ɔfaa me fii m'agya fi ne asase a wɔwoo me wɔ so no so, na ɔne me kasae, na ɔkaa ntam kyerɛɛ me sɛ: W'asefo na mede asase yi mɛma wɔn no, ɔbɛsoma ne bɔfo adi w'anim, na woakɔware yere afi hɔ abrɛ me ba.

⁸Na sɛ ɔbea no mpɛ sɛ odi w'akyi a, ɛnne wo ho afi me ntam yi mu, nanso mfa me ba nsan nkɔ hɔ bio.

⁹Na ɔsomfo no de ne nsa kaa ne wura Abraham asen mu, na ɔkaa no ntam wɔ asɛm no ho.

¹⁰ Na ɔsomfo no faa ne wura yoma mu du, na ɔkɔe, na okura ne wura nnepa ahorow nyinaa bi, na ɔsɔre siim kɔɔ Mesopotamia, Nahor kurow mu.

¹¹Na ɔmaa ne yoma no butuw kurow no kurotia wɔ asubura bi ho anwummere a mmea bɛsaw nsu.

¹²Na ɔbɔɔ mpae sɛ: AWURADE, me wura Abraham Nyankopɔn, mesrɛ wo, ma ensi me yiye nnɛ, na yɛ me wura Abraham adɔe.

¹³Hwɛ, migyina asubura yi so ha yi, na kurom hɔfo mmabea rebefi abɛsaw nsu yi,

¹⁴ma ɛmmra sɛ ababaa a mese no sɛ: Soɛ wo kuruwa ma mennom nsu no bi, na ɔbɛka sɛ: Nom, na mɛma wo yoma no anom bi no, ma ɔno ara nyɛ nea woayi no ama w'akoa Isak, na ɛno mu na mehu sɛ woayɛ me wura adɔe.

¹⁵ Na onnya nwiee kasa no, hwɛ, Rebeka a wɔwoo no maa Betuel a ɔyɛ Abraham ne nua Nahor yere Milka ba bae, na ne kuruwa si ne mmati so.

¹⁶Na ababaa no ho yɛ fɛ sɛ, ɔyɛ ɔbaabun a ɔbarima bi nhuu no da, na ɔkɔɔ asubura no mu kɔhyɛɛ ne kuruwa ma, na ɔbae.

¹⁷Na ɔsomfo no tuu mmirika kohyiaa no sɛ: Mesrɛ wo, ma memmɔ wo kuruwa yi mu nsu kakra hwirow.

¹⁸Na ose: Me wura, nom bi! Na ɔyɛɛ ntɛm soɛɛ ne kuruwa no sii ne nsam ma ɔnomee.

¹⁹Na ɔma ɔnom wiei no, ɔkae sɛ: Mɛkɔ makɔsaw bi mabrɛ wo yoma no nso akosi sɛ wobewie nom.

²⁰Na ɔyɛɛ ntɛm kohwiee ne kuruwa mu nsu no guu anomee hɔ, na otutuu mmirika kɔɔ abura no mu bio kɔsaw nsu, na ɔsaw maa ne yoma no nyinaa.

²¹Na ɔbarima no hwɛɛ no ara, na ɔyɛɛ komm sɛ obehu sɛ AWURADE ama ne kwankɔ no ayɛ dwoodwoo anaasɛ ɛnte sa.

²² Na yoma no wiee nsu no nom no, ɔbarima no yii sika hwene mu kaa a ano si dwetɛbona fa ne nsa so nkapo abien a ano si sikabona du de hyɛɛ no,

²³na ɔkae sɛ: Hena ba ne wo? Mesrɛ wo, kyerɛ me! So yebenya dabere wɔ w'agya fi anaa?

²⁴Na ɔka kyerɛɛ no sɛ: Betuel, Milka ba a ɔwoo no maa Nahor no ba ne me.

²⁵Na ɔka kyerɛɛ no sɛ: Yɛwɔ sare ne mmoa aduan pii ne nea mobɛda.

²⁶Na ɔbarima no bɔɔ ne mu ase sɔree AWURADE,

²⁷na ɔkae sɛ: Nhyira nka AWURADE, me wura Abraham Nyankopɔn a wamma n'adɔe ne ne nokware ammɔ me wura. Na me nso, AWURADE akyerɛ me me wura ne nuanom fi kwan.

²⁸Na ababaa no tuu mmirika kɔkaa saa nsɛm yi kyerɛɛ ne na fifo.

²⁹Na Rebeka wɔ onuabarima bi a ne din de Laban. Na Laban de mmirika fii adi kɔɔ ɔbarima no nkyɛn wɔ asubura no ho.

³⁰Na ohuu hwene mu kaa ne ne nua nsa so nkapo no, na ɔtee ne nua Rebeka nsɛm no sɛ: Sɛnea ɔbarima no kasa kyerɛɛ me ni, no, ɔbaa ɔbarima no nkyɛn, na hwɛ, ogyina yoma no nkyɛn, asubura no ho.

³¹Na ose: Wo a AWURADE ahyira wo, bra, ɛdɛn nti na wugyina kurotia? Na masiesie ɔdan mu ne baabi nso mama yoma no.

³²Na ɔbarima no kɔɔ ofie, na oyii yoma no so nneɛma, na ɔmaa yoma no sare ne aduan, na ɔmaa ɔno ne nnipa a wɔka ne ho no nsu sɛ wɔnhohoro wɔn anan ase.

³³Na wɔde aduan besii n'anim sɛ onni; na ose: Merennidi gye sɛ mabɔ m'amanneɛ ansa. Na ose: Bɔ na yentie ɛ!

³⁴Na ose: Abraham somfo ne me.

³⁵Na AWURADE ahyira me wura pii, na wayɛ ɔkɛse, na wama no nguan ne anantwi, ne dwetɛ ne sika, ne nkoa ne mfenaa, ne yoma ne mfurum.

³⁶Na me wura yere Sara awo ɔba wɔ ne mmerewabere mu ama me wura, na ɔde nea ɔwɔ nyinaa ama no.

³⁷Na me wura ama maka ntam se: Nware Kanaanfo a mete wɔn asase so yi mmabea mu bi mma me ba,

³⁸na mmom kɔ m'agya fi ne m'abusua mu kɔware yere brɛ me ba.

³⁹Na misee me wura sɛ: Na sɛ ɔbea no anni m'akyi ɛ?

⁴⁰ Na ɔka kyerɛɛ me sɛ: AWURADE a menam n'anim no bɛsoma ne bɔfo aka wo ho, na wama wo kwan so ayɛ dwoodwoo, na woakɔware yere wɔ m'abusua mu ne m'agya fi abrɛ me ba.

⁴¹Ɛno ansa na sɛ wokɔ m'abusua mu a, wo ho befi me ntam no mu, na sɛ wɔamma wo bi a, ɛnne na wo ho afi me ntam no mu.

⁴²Na mebaa asubura no ho nnɛ kae sɛ: AWURADE, me wura Abraham Nyankopɔn, sɛ wo ara worema me kwan a mitu yi ayɛ dwoodwoo a,

⁴³hwɛ, migyina asubura yi ho, na ma ɛmmra mu sɛ ababaa a obefi abɛsaw nsu, na mese no sɛ: Mesrɛ wo, ma me wo kuruwa yi mu nsu kakra mennom,

⁴⁴na ɔbɛka akyerɛ me sɛ: Nom, na menkɔsaw bi memmrɛ wo yoma no nso no, ma ɔno ara nyɛ ɔbea a AWURADE ayi no ama me wura ba.

⁴⁵Na minnya minwiee me koma mu kasa no, hwɛ, Rebeka fii adi bae a kuruwa si ne mmati so, na ɔkɔɔ abura no mu kɔsaw nsu. Na misee no sɛ Mesrɛ wo, ma me bi mennom.

⁴⁶Na ɔyɛɛ ntɛm soɛɛ ne kuruwa no kae sɛ: Nom, na mɛma wo yoma no nso bi anom. Na menomee, na ɔmaa yoma no nso bi nomee.

⁴⁷ Na mibisaa no sɛ: Hena ba ne wo? Na ose: Betuel, Nahor ba a Milka wo maa no no ba ne me. Na mede hwene mu kaa no mesɛn ne hwenem, na mede nkapo no mehyehyɛɛ ne nsa,

⁴⁸na mebɔɔ me mu ase mesɔree AWURADE, na mihyiraa AWURADE, me wura Abraham Nyankopɔn a ɔkyerɛɛ me nokware kwan sɛ menkɔware me wura ne nua ba memma ne ba no.

⁴⁹Na afei sɛ mo ara moreyɛ me wura adɔe adi no nokware a, monka nkyerɛ me; na sɛ ɛnte saa a, monka nkyerɛ me, na mennan memfa nifa anaa benkum.

⁵⁰Ɛnna Laban ne Betuel buae sɛ: AWURADE na asɛm yi fi no, yɛrentumi nka no papa anaa bɔne nkyerɛ wo.

⁵¹Hwɛ, Rebeka na ogyina w'anim yi, fa no kɔ ma ɔnkɔyɛ wo wura ba yere, sɛnea AWURADE aka no.

⁵²Na Abraham somfo no tee wɔn nsɛm no, ɔkotow fam sɔree AWURADE.

⁵³Na ɔsomfo no yii dwetɛ nnwinne ne sika nnwinne ne ntade de maa Rebeka; na ɔde nneɛma a ɛsom bo maa ne nuammarima ne ne na.

⁵⁴Na ɔne nnipa a wɔka ne ho no didii, na wɔnomee, na wɔdaa hɔ. Na wɔsɔree anɔpa no, ɔkae sɛ: Munnya me kwan, na menkɔ me wura nkyɛn.

⁵⁵Na ne nua ne ne na kae sɛ: Ma ababaa no ntena yɛn nkyɛn da tiaa bi sɛ dadu ansa na woakɔ.

⁵⁶Na ɔka kyerɛɛ wɔn sɛ: Munnsianka me, efisɛ AWURADE ama m'akwantu no asi me yiye. Munnya me kwan mma menkɔ me wura nkyɛn.

⁵⁷Na wose: Ma yɛmfrɛ ababaa no mmisa n'ankasa.

⁵⁸Na wɔfrɛɛ Rebeka ka kyerɛɛ no sɛ: Wo ne ɔbarima yi bɛkɔ anaa? Na ose: Mɛkɔ.

⁵⁹Na wogyaa wɔn nua Rebeka ne ne gyigyefo ne Abraham somfo no ne ne nnipa no kwan.

⁶⁰ Na wohyiraa Rebeka see no sɛ: Yɛn nuabea, dan ɔpedu ahorow mpem, na w'asefo mfa wɔn atamfo apon nni.

⁶¹Na Rebeka ne ne mmaawa sɔree, na wɔtenatenaa yoma no so dii ɔbarima no akyi, na ɔsomfo no de Rebeka sii kwan so.

⁶² Na Isak fi Lahairoi abura ho bae, efisɛ ɔte negeb asase so.

⁶³Na Isak fii adi kɔɔ wuram anwummere kɔdwennwenee ne nsɛm ho. Na ɔmaa n'ani so hwɛɛ, na hwɛ, yoma reba.

⁶⁴Na Rebeka maa n'ani so, na ohuu Isak no, ofii yoma no so sii fam,

⁶⁵na ɔka kyerɛɛ ɔsomfo no sɛ: Ɔbarima bɛn na ɔnam wura mu rebehyia yɛn yi? Na ɔsomfo no se, ɛyɛ me wura. Na ɔfaa ne nkataanim de kataa n'anim.

⁶⁶Na ɔsomfo no kaa nea ɔyɛe no nyinaa kyerɛɛ Isak.

⁶⁷ Na Isak de no kɔɔ ne na Sara ntamadan mu, na ɔwaree Rebeka, na ɔyɛɛ ne yere, na ɔdɔ no, na Isak werɛkyekyee ne na wu akyi.