Read Revised Akuapem Twi DC-KYERƐW KRONKRON Gyenesis 28 Bible Online

Gyenesis 28 - Revised Akuapem Twi DC-KYERƐW KRONKRON bible

Gyenesis 28

¹ Na Isak frɛɛ Yakob, na ohyiraa no hyɛɛ no sɛ: Nware Kanaan mmabea mu yere.

² Sɔre kɔ Mesopotamia, kɔ wo na n'agya Betuel fi, na kɔware wo na ne nua Laban mmabea no bi.

³Na Onyankopɔn Tweaduampɔn nhyira wo, na ɔmma wonnɔ, na ɔmma wonyɛ bebree, na woayɛ aman asafo;

⁴ na ɔmfa Abraham nhyira, nhyira wo, wo ne w'asefo a wɔka wo ho, na woanya asase a woyɛ so hɔho a Onyankopɔn de ama Abraham yi.

⁵Na Isak gyaa Yakob kwan, na ɔkɔɔ Mesopotamia wɔ Aramni Betuel ba Laban a ɔyɛ Yakob ne Esau na Rebeka nuammarima no nkyɛn.

⁶Na Esau hui sɛ Isak ahyira Yakob, na wagya no kwan sɛ ɔnkɔ Mesopotamia nkɔware yere wɔ hɔ, na ohyiraa no, na ɔhyɛɛ no sɛ: Nware Kanaan mmabea mu yere,

⁷na Yakob atie n'agya ne ne na, na ɔkɔ Mesopotamia,

⁸na Esau hui sɛ Kanaan mmabea nye n'agya Isak ani so no,

⁹ Esau siim kɔɔ Ismael nkyɛn kɔwaree Abraham ba Ismael babea, Nebaiot nuabea Mahalat kaa ne yerenom no ho.

¹⁰Na Yakob fi Beer-seba siim kɔɔ Haran.

¹¹Na oduu baabi, na ɔsoɛɛ hɔ anadwo no, efisɛ owia akɔtɔ, na ɔfaa hɔ abo no bi sumii, na ɔdaa hɔ.

¹² Na ɔsoo dae, na hwɛ, antweri bi si fam a atifi pem soro, na hwɛ, Onyankopɔn abɔfo di so aforosian.

¹³ Na hwɛ, AWURADE gyina atifi, na ose: Mene AWURADE, w'agya Abraham Nyankopɔn ne Isak Nyankopɔn, asase a woda so yi, mede mɛma wo ne w'asefo.

¹⁴ Na w'asefo bɛyɛ sɛ asase so mfutuma, na woatrɛw akɔ atɔe ne apuei, atifi fam ne anafo fam, na wo ne w'asefo mu na wobehyira wiase mmusuakuw nyinaa.

¹⁵Na hwɛ, medi w'akyi, na mahwɛ wo so baabiara a wobɛkɔ, na mama woasan aba asase yi so, na merennyaw wo de bɛkɔ akosi sɛ mɛma nea maka makyerɛ wo yi aba mu.

¹⁶Na Yakob nyan fii ne nna mu no, ɔkae sɛ: Ampa ara, AWURADE wɔ ha yi, nanso me de, manhu.

¹⁷ Na osuroe, na ose: ɛha yi yɛ hu ampa. Ɛha nyɛ baabiara sɛ: Onyankopɔn fi, na ɛha ne ɔsoro abobow ano.

¹⁸Na Yakob sɔree anɔpatutu, na ɔfaa ɔbo a osumii no de yɛɛ odum sii hɔ, na ohwiee ngo guu so.

¹⁹ Na ɔfrɛɛ hɔ Betel ase ne: Onyankopɔn fi, nanso kan no na kurow no din de Lus.

²⁰Na Yakob boaa aboade kae sɛ: Sɛ AWURADE Nyankopɔn bedi m'akyi ahwɛ me so ɔkwan a meretu yi mu, na wama me aduan madi ne atade mahyɛ,

²¹na wasan me asomdwoe mu de me aba m'agya fi a, ɛnne AWURADE bɛyɛ me Nyankopɔn.

²² Na ɔbo yi a mede mayɛ odum masi hɔ yi bɛyɛ Onyankopɔn fi. Na nea wobɛma me nyinaa, mɛma wo so ntotoso du du.