Read Revised Akuapem Twi DC-KYERƐW KRONKRON Gyenesis 45 Bible Online

Gyenesis 45 - Revised Akuapem Twi DC-KYERƐW KRONKRON bible

Gyenesis 45

¹Na afei Yosef ntumi nhyɛ ne ho so wɔ wɔn a wogyinagyina ne ho no nyinaa anim, na ɔteɛɛm sɛ: Momma nnipa nyinaa mfi me ho mfi adi. Na Yosef reyi ne ho adi akyerɛ ne nuanom no, na onipa biara nnyina ne nkyɛn.

²Na ɔmaa ne nne so sui, na Misraimfo no ne Farao fifo tee.

³Na Yosef ka kyerɛɛ ne nuanom sɛ: Mene Yosef, m'agya da so te ase anaa? Na ne nuanom no antumi ammua no, na mmom wɔn ho dwiriw wɔn wɔ n'anim.

⁴ Na Yosef ka kyerɛɛ ne nuanom sɛ: Muntwiw mmɛn me. Na wotwiw bɛn no. Na ose: Mene mo nua Yosef a motɔn no baa Misraim no.

⁵ Na afei mommma ɛnnyɛ mo yaw, nso mo bo mmfuw mo ho mo ho sɛ motɔn me baa ha, efisɛ nkwagye nti na Onyankopɔn somaa me dii mo anim.

⁶Na mfe abien ni a ɔkɔm baa asase yi so, na aka mfe anum bio a ɔfɛtɛw ne otwa nni mu.

⁷Na Onyankopɔn somaa me dii mo anim sɛ memma munnya nkae wɔ asase so, na minnye mo nkwa a ɛbɛma dodow no ara afi mu afi.

⁸ Na afei ɛnyɛ mo na mosomaa me baa ha, na mmom Onyankopɔn na ɔde me abɛyɛ sɛ Farao n'agya ne ne fi nyinaa wura ne Misraim asase nyinaa sodifo.

⁹Monyɛ ntɛm nkɔ m'agya nkyɛn nkɔka nkyerɛ no sɛ: Sɛ wo ba Yosef se ni: Onyankopɔn de me ayɛ Misraim nyinaa so wura. Sian bra me nkyɛn. Nkyɛ!

¹⁰Na bɛtena Gosen asase so, na woabɛn me, wo ne wo mma ne wo nenanom ne wo nguan ne w'anantwi ne nea wowɔ nyinaa,

¹¹na mɛhwɛ wo wɔ hɔ, efisɛ mfe anum kɔm da so reba, na ohia anhia wo ne wo fifo ne nea wowɔ nyinaa.

¹²Na hwɛ, mo ani ahu na me nua Benyamin nso ani ahu, sɛ m'ano na mede mekasa mekyerɛ mo yi.

¹³Na monka m'anuonyam a mewɔ wɔ Misraim nyinaa nkyerɛ m'agya ne nea moahu nyinaa, na monyɛ ntɛm mfa m'agya nsian mmra ha.

¹⁴Ɛnna osoo ne nua Benyamin kɔn mu na osui; na Benyamin nso sui wɔ ne kɔn ho.

¹⁵Na ofifew ne nuanom nyinaa ano, na osui wɔ wɔn so, na ɛno akyi no ne nuanom no ne no kasae.

¹⁶Na wɔtee nka wɔ Farao fi sɛ Yosef ne nuanom aba. Na ɛsɔɔ Farao ne ne nkoa ani.

¹⁷Na Farao ka kyerɛɛ Yosef sɛ: Ka kyerɛ wo nuanom sɛ: Eyi na monyɛ: Momfa nneɛma nsoasoa mo mmoa no, na monkɔ Kanaan asase so

¹⁸nkɔfa mo agya ne mo fifo mmra me nkyɛn, na mɛma mo Misraim asase so nea eye, na moadi asase no srade.

¹⁹Ka kyerɛ wɔn sɛ: Eyi na monyɛ: Momfa nteaseɛnam mfi Misraim asase so nkɔma mo mma ne mo yerenom, na monkɔfa mo agya mmra.

²⁰Na mo nso munnnwinnwen mo nneɛma ho, na Misraim asase nyinaa so nea eye yɛ mo dea.

²¹Na Israel mma yɛɛ sa. Na Yosef maa wɔn nteaseɛnam sɛnea Farao anom asɛm se, na ɔmaa wɔn akwansoduan.

²²Ɔmaa wɔn nyinaa ntade nsakraho mmiako mmiako, na Benyamin de, ɔmaa no nnwetɛbona ahasa ne ntade nsakraho anum.

²³Na nea ɔde kɔmaa n'agya nso ni: Mfurum du a wɔsoso Misraim nnepa no bi ne mfurummere du a wɔsoso aburow ne abodoo ne aduan a ɛbɛyɛ n'agya akwansoduan.

²⁴ Na ogyaa ne nuanom kwan ma wɔkɔe. Na ɔka kyerɛɛ wɔn sɛ: Mo bo nnkofuw mo ho mo ho wɔ ɔkwan so oo!

²⁵Ɛnna wofii Misraim foro kɔɔ Kanaan asase so wɔn agya Yakob nkyɛn,

²⁶na wɔka kyerɛɛ no sɛ: Yosef da so te ase, na odi Misraim asase nyinaa so. Na ne komam yɛɛ no naa, efisɛ onnye wɔn nni.

²⁷Na wɔkaa nsɛm a Yosef aka akyerɛ wɔn no nyinaa kyerɛɛ no, na ohuu nteaseɛnam a Yosef asoma de rebɛfa no no, wɔn agya Yakob honhom ho san no.

²⁸ Na Israel kae sɛ: Ɛdɔɔso, me ba Yosef da so te ase. Mɛkɔ makohu no ansa na mawu.