Read Revised Akuapem Twi DC-KYERƐW KRONKRON Gyenesis 47 Bible Online

Gyenesis 47 - Revised Akuapem Twi DC-KYERƐW KRONKRON bible

Gyenesis 47

¹Na Yosef kɔka kyerɛɛ Farao sɛ: M'agya ne me nuanom ne wɔn nguan ne wɔn anantwi ne nea wɔwɔ nyinaa fi Kanaan asase so aba, na hwɛ, wɔwɔ Gosen asase so.

²Na ɔde ne nuanom mu baanum kogyinaa Farao anim.

³ Na Farao bisaa ne nuanom no sɛ: Mo adwuma ne dɛn? Na wɔka kyerɛɛ Farao sɛ: Wo nkoa yɛ mmoahwɛfo, yɛn ne yɛn agyanom nso.

⁴Na wɔka kyerɛɛ Farao bio sɛ: Yɛaba sɛ yɛrebɛtena asase yi so, efisɛ wo nkoa nnya adidibea mma wɔn nguan, efisɛ ɔkɔm no mu yɛ den wɔ Kanaan asase so. Enti afei yɛsrɛ wo, ma wo nkoa ntena Gosen asase so.

⁵Na Farao ka kyerɛɛ Yosef sɛ: W'agya ne wo nuanom aba wo nkyɛn.

⁶Misraim asase na ɛda w'anim yi, asase no mu nea eye no, ma w'agya ne wo nuanom ntena hɔ. Ma wɔntena Gosen asase so, na sɛ wunim sɛ wɔn mu bi yɛ nsiyɛfo a, fa wɔn si me mmoa a mewɔ so.

⁷Na Yosef de n'agya Yakob kogyinaa Farao anim. Na Yakob hyiraa Farao.

⁸Na Farao bisaa Yakob sɛ: Wo nkwa mu mfirihyia si ahe?

⁹ Na Yakob ka kyerɛɛ Farao sɛ: Me hɔhobea asetena mfirihyia mu nna yɛ mfe ɔha aduasa; me nkwa mfirihyia mu nna yɛ kakraa bi na amane nko, na ennu m'agyanom nkwa mfirihyia mu nna wɔ wɔn ahɔhobea asetena nna mu.

¹⁰Na Yakob hyiraa Farao, na ofii Farao anim kɔe.

¹¹Na Yosef maa n'agya ne ne nuanom tenabea, na ɔmaa wɔn asase wɔ Misraim wɔ nea asase no ye, wɔ Rameses asase so, sɛnea Farao hyɛe no.

¹² Na Yosef bɔɔ n'agya ne ne nuanom ne n'agya fifo nyinaa akɔnhama sɛnea abusua biara dodow te.

¹³Na aduan nni asase biara so, na ɔkɔm no mu yɛɛ den yiye maa Misraim asase ne Kanaan asase tɔɔ ɔkɔm no anim piti.

¹⁴Na Yosef boaboaa sika a ɛwɔ Misraim asase ne Kanaan asase so nyinaa wɔ aburow a wɔbɛtɔe no mu, na Yosef de sika no kɔɔ Farao fi.

¹⁵Na sika sae Misraimfo ne Kanaanfo ho asase so no, Misraimfo nyinaa baa Yosef nkyɛn sɛ: Ma yɛn aduan ɛ! Adɛn nti, na sɛ sika asa nti yenwuwu w'anim?

¹⁶Na Yosef se: Momfa mo mmoa mmra na sɛ mo sika asa a, mɛma mo bi magye mo mmoa.

¹⁷Na wɔde wɔn mmoa bae, na Yosef maa wɔn aduan gyigyee apɔnkɔ ne nguan ne anantwi ne mfurum, na ɔde aduan yɛn wɔn afirihyia no, ogyee wɔn mmoa nyinaa.

¹⁸Na afe no twaam no, afe a edi so no, wɔbaa ne nkyɛn bɛka kyerɛɛ no sɛ: Yɛremfa nhintaw me wura sɛ yɛn sika asa, na mmoa akuwakuw no yɛ me wura dea, na biribiara nkae wɔ me wura anim sɛ yɛn honam ne yɛn asase nko.

¹⁹Ɛdɛn nti na yɛn ne yɛn asase nwu w'anim? Tɔ yɛn ne yɛn asase, na ma yɛn aduan, na yɛde yɛn ho ne yɛn asase bɛsom Farao, na ma yɛn aduaba, na yɛntena ase, na yɛanwu amma asase yi anna mpan.

²⁰Na Yosef tɔɔ Misraim asase nyinaa maa Farao, na Misraimfo nyinaa tontɔn wɔn mfuw, efisɛ ɔkɔm no den wɔn, na asase no dan Farao dea.

²¹Na nkurɔfo no de ɔdan wɔn nkoa, efi Misraim hye so kosi afoforo ahye so.

²²Gyee asɔfo asase nko na wantɔ, efisɛ Farao ahyɛ kyɛfa bi ama asɔfo no, na wodi wɔn kyɛfa a Farao de ma wɔn no nti, wɔantɔn wɔn asase.

²³Na Yosef ka kyerɛɛ nkurɔfo no sɛ: Monhwɛ, nnɛ matɔ mo ne mo nsaase mama Farao, na hwɛ, mo aduaba a momfa nkodua asase no so ni.

²⁴Na nea ɛbɛsow no, momfa nkyɛm anum mu biako mma Farao, na emu abupɛn anan no nyɛ mo dea, na mode bi adua mo mfuw mu, na mode bi ayɛ mo ne mo fifo ne mo mma aduan.

²⁵Na wose: Woagye yɛn nkwa; ma yennya me wura anim dom ara, na yɛbɛyɛ Farao nkoa.

²⁶Na Yosef hyɛɛ eyi ho mmara wɔ Misraim a ɛwɔ hɔ de besi nnɛ, sɛ wɔmfa Misraim asase so ade biara nkyɛm anum mu biako mma Farao, gye asɔfo asase nko na anyɛ Farao dea.

²⁷ Na Israel tenaa Misraim asase a ɛwɔ Gosen no so, na wonyaa mu ade, wɔdɔe, na wɔn ase fɛee sɛ.

²⁸Na Yakob tenaa Misraim asase so mfe dunsɔn, na Yakob nna, ne nkwa mfirihyia, yɛ mfe ɔha aduanan asɔn.

²⁹ Na Israel nna dui sɛ ɔbɛkɔ ne nsamankyi, na ɔfrɛɛ ne ba Yosef ka kyerɛɛ no sɛ: Sɛ manya w'anim dom a, fa wo nsa ka m'asen mu, na yɛ me adɔe di me nokware, na nsie me Misraim!

³⁰ Na mɛda m'agyanom nkyɛn, na soa me fi Misraim kosie me wɔ wɔn asiebea. Na Yosef kae se: Mɛyɛ sɛnea woaka yi.

³¹Na Yakob kae se: Ka me ntam. Na ɔkaa no ntam. Na Israel bɔɔ ne mu ase kyerɛɛ mpa no atifi.