Read Revised Akuapem Twi DC-KYERƐW KRONKRON Gyenesis 49 Bible Online

Gyenesis 49 - Revised Akuapem Twi DC-KYERƐW KRONKRON bible

Gyenesis 49

¹Na Yakob frɛɛ ne mma se: Mommoaboa mo ho ano, na menka mo nea ɛbɛyɛ mo, nna a edi akyiri no mu.

²Yakob mma, munhyia, na muntie; muntie mo agya Israel!

³ Ruben, m'abakan ne wo, m'ahoɔden ne me mmaninyɛ asefi. Wowɔ nidi a ɛkyɛn so, ne tumi a ɛkyɛn so.

⁴ Wuhinhim sɛ nsu, enti wo kanni befi wo nsa, efisɛ woforoo w'agya nnae. Ɛno mu na wuguu wo ho fi, me mpa na ɔforoe!

⁵Simeon ne Lewi yɛ anuanom. Wɔn nkrante yɛ anuɔden akode.

⁶ Me kra, nnkɔ wɔn agyina mu, na m'anuonyam, nkɔfra wɔn asafo mu. Efisɛ wɔn abufuw mu na wokum nnipa, na wɔn ahupoo mu na wɔsɛee anantwi.

⁷ Wɔadome wɔn abufuw, sɛ ɛso dodo, ne wɔn anibere, sɛ emu yɛ den. Mɛkyekyɛ wɔn mu wɔ Yakob mu, na mabɔ wɔn mapete Israel mu.

⁸ Yuda, wo na wo nuanom beyi wo ayɛ; wo nsa bɛhyɛ w'atamfo kɔn so; w'agya mma bɛkotow w'anim.

⁹ Ogyata ba ne Yuda; hanam so na wode anyin, me ba. Ɔkotow, obutuw sɛ gyata ne gyatabere; hena na ɔbɛhwanyan no?

¹⁰ Ahempoma remfi Yuda nsa, na mmarahyɛ poma remfi n'anan ntam, kosi sɛ ɛsodifo a aman bɛyɛ osetie ama no no bɛba.

¹¹ Ɔsa n'afurum ba wɔ bobe mu, ne n'afurummere ba wɔ bobe pa mu. Ɔhoro n'atade wɔ nsa mu, ne ne ntama wɔ bobe aba mogya mu.

¹²Bobesa bɛma n'ani ayɛ kɔɔ, na nufusu ama ne se ayɛ fitaa.

¹³ Sebulon tenabea bɛkyerɛ mpoano, na wahwɛ nea ahyɛn gyinagyina, na ɔne Sidon abɔ ɔhye.

¹⁴Isakar yɛ afurum hoɔdenfo, obutuw mmoaban ntam;

¹⁵na ohu sɛ ɔhomebea no ye, na asase no yɛ fɛ, na ɔbrɛ ne mmati ase de gye adesoa, na ɔde ɔsom adwuma ayi tow.

¹⁶ Dan bebu ne nkurɔfo atɛn sɛ Israel mmusuakuw mu biara.

¹⁷Dan bɛyɛ ɔkwan so wɔ, ɔtempɔn so ahurutoa. Ɔka ɔpɔnkɔ nantin, na ne so tenafo ahwe n'akyi.

¹⁸ AWURADE, wo nkwagye na mehwɛ no kwan.

¹⁹Gad, asafo bi retoa no, na ɔno nso atoa wɔn aka wɔn nantin.

²⁰ Aser aduan bɛyɛ sradeduan, na ɔbɛma ahennuan a ɛyɛ akɔnnɔ.

²¹ Naftali yɛ ɔforote a wɔato no sraha; ɔka adɛdɛsɛm.

²² Yosef yɛ dua a ɛsow aba baa, dua a ɛsow aba wɔ nsu aniwa so baa; n'abaa tratra ɔfasu.

²³Mmɛmmatofo hyɛɛ no yaw, wɔtotow no, na wɔtaa no.

²⁴Nanso na ne tadua kura no pintinn, na ne basa mu yɛɛ den. Efi Yakob tumfo no nsam, efi ɔhwɛfo a ɔyɛ Israel botan no mu.

²⁵Efi w'agya Nyankopɔn, ɔmmoa wo, na efi Tweaduampɔn hɔ, onhyira wo, ɔmfa ɔsorosoro nhyira, ne ebun a ɛtrɛtrɛw ase mu nhyira, ne nufu ne yafunu mu nhyira, nhyira wo.

²⁶ W'agya nhyira aboro m'agyanom nhyira so akodu tete nteredee nkoko no ahye so noho; ɛmmra Yosef atifi, nea woyii no fii ne nuanom mu no mpampam.

²⁷ Benyamin yɛ pataku a ɔtetew mmoa mu; odi hanam anɔpa, na anwummere nso ɔkyɛ asade mu.

²⁸Eyinom nyinaa ne Israel mmusuakuw dumien no, na eyi ne nea wɔn agya ka kyerɛɛ wɔn de hyiraa wɔn. Sɛnea wɔn nhyira te mmiako mmiako na ohyiraa wɔn.

²⁹Na ɔhyɛɛ wɔn ka kyerɛɛ wɔn sɛ: Wɔrebɛboaboa me akɔka me nkurɔfo ho. Munkosie me m'agyanom nkyɛn, wɔ ɔbodan a ɛwɔ Hetini Efron afuw mu no mu,

³⁰ɔbodan a ɛwɔ Makpela afuw so, wɔ Mamre ntentenso, wɔ Kanaan asase so, asase a Abraham tɔe wɔ Hetini Efron nkyɛn de yɛɛ asiebea no mu.

³¹ Ɛhɔ na wosiee Abraham ne ne yere Sara, ɛhɔ na wosiee Isak ne ne yere Rebeka, na ɛhɔ na misiee Lea.

³²Afuw no ne ɔbodan a ɛwɔ mu no, wɔtɔe wɔ Het mma nkyɛn.

³³Na Yakob hyɛɛ ne mma samansew wiei no, ɔboaa ne nan ano guu mpa no so, na oguu ahome a edi akyiri, na otiw ne nananom wɔ asamando.