Read Revised Akuapem Twi DC-KYERƐW KRONKRON 2 Samuel 7 Bible Online

2 Samuel 7 - Revised Akuapem Twi DC-KYERƐW KRONKRON bible

2 Samuel 7

¹Bere a ɔhene te ne fi na AWURADE ama no ɔhome afi n’atamfo nyinaa ho ahyia no,

²ɔhene ka kyerɛɛ Odiyifo Natan sɛ: Hwɛ, me de, mete kyeneduru dan mu, na Onyankopɔn adaka no si ntamadan mu.

³Na Natan ka kyerɛɛ ɔhene sɛ: Nea ɛwɔ wo koma mu nyinaa kɔyɛ, na AWURADE di w’akyi.

⁴Na anadwo no ara AWURADE asɛm baa Natan nkyɛn sɛ:

⁵Kɔ na kɔka kyerɛ m’akoa Dawid sɛ: Sɛ AWURADE se ni. So wo na wubesi dan ama matena mu?

⁶ Na efi da a miyii Israelfo fii Misraim bae de bedu nnɛ yi, mentenaa ofi mu da na mmom menam ntamadan tenabea mu.

⁷Bere a me ne Israelfo nyinaa nantewee no nyinaa mu no, so maka asɛm bi makyerɛ Israel abusuakuw biara a mahyɛ wɔn sɛ wɔnyɛn me man Israel sɛ: Ɛdɛn nti na munsi kyeneduru dan mma me?

⁸ Na afei kɔka kyerɛ m’akoa Dawid sɛ: Sɛ asafo AWURADE se ni. Me na mefaa wo mifii nguan hwɛbea, fii nguan akyi, sɛ bɛyɛ me man Israel so panyin.

⁹Na midii w’akyi baabiara a wokɔe na matwitwa w’atamfo nyinaa afi w’anim, na mɛma woanya din kɛse sɛ asase so nnipa akɛse din.

¹⁰Na mesiesie tenabea mama me man Israel, na medua wɔn na wɔatena wɔn tenabea, na wɔanhwanyan wɔn bio, na amumɔyɛ mma anhaw wɔn bio sɛ kan no,

¹¹ne bere a mehyɛɛ akannifo sɛ wonni me man Israel so no; na mɛma woahome afi w’atamfo nyinaa ho. Na AWURADE aka akyerɛ wo sɛ AWURADE na ɔbɛkyekye ofi ama wo.

¹² Sɛ wo nna wie du, na wo ne w’agyanom kɔda wɔ asaman a, mɛma w’aseni a ofi wo yam so, w’akyi na mɛma n’ahenni atim.

¹³ Ɔno na obesi dan ama me din na mɛma n’ahenni agua atim akosi daa.

¹⁴ Me na mɛyɛ no agya na ɔno nso ayɛ me ɔba, na sɛ ɔfom a, mede nnipa poma ne nnipa mma mmaa mɛteɛ no so.

¹⁵ Na m’adɔe remfi ne ho sɛnea efii Saul a mituu no w’anim no ho no.

¹⁶ Na wo fi ne w’ahenni betim akosi daa m’anim, w’ahengua besi pintinn akosi daa.

¹⁷Sɛ nsɛm yi nyinaa ne anisoadehu yi nyinaa te no, saa ara na Natan ka kyerɛɛ Dawid.

¹⁸ Ɛnna ɔhene Dawid bae bɛtenaa AWURADE anim na ɔkae sɛ: Hena ne me, AWURADE Nyankopɔn, na me fi ne dɛn sɛ wode me abedu sesɛɛ yi?

¹⁹Nanso eyi da so yɛ w’ani so ketewa, O AWURADE Nyankopɔn, na woaka daakye a ɛwɔ akyirikyiri ho asɛm nso akyerɛ w’akoa fi, na woakyerɛ me awo ntoatoaso a ɛbɛba, O Awurade Nyankopɔn.

²⁰Na ɛdɛn na Dawid nkɔ so nka nkyerɛ wo bio? Na wo na wunim w’akoa, O Awurade Nyankopɔn.

²¹W’asɛm nti ne sɛ wo koma te no na woayɛ ade akɛse yi, sɛ wobɛma w’akoa ahu.

²²Enti woso kokuroo, O AWURADE Nyankopɔn na obiara nni hɔ a ɔte sɛ wo, onyame biara nso nni w’akyi, sɛ nsɛm a yɛde yɛn aso ate no nyinaa te no.

²³ Na ɔman biako bɛn na ɛwɔ asase so a ɛte sɛ wo man, sɛ Israel a Onyankopɔn akogye wɔn afa ayɛ ɔman de agye din na wayɛ ade akɛse ne ade a ɛyɛ hu ama mo, ama w’asase, wo man a wugyee wɔn fae fii Misraim, amanaman ne wɔn anyame nsam no anim?

²⁴Na woasiesie wo man Israel afa de wɔn ayɛ wo man akosi daa, na wo AWURADE, woayɛ wɔn Onyankopɔn.

²⁵Na afei, O AWURADE Nyankopɔn, asɛm a woaka w’akoa ne ne fi ho no, ma ennyina nkosi daa na yɛ sɛnea woaka no.

²⁶Na ma wo din nso nkosi daa sɛ: Asafo AWURADE ne Israel so Nyankopɔn. Na ma w’akoa Dawid fi nnyina w’anim pintinn.

²⁷ Na wo, O Asafo AWURADE, Israel Nyankopɔn, woayi w’akoa asotiw sɛ: Mɛkyekye ofi mama wo, enti na w’akoa asi ne bo rebɔ wo sɛɛ mpae yi.

²⁸ Na afei, O AWURADE Nyankopɔn, wo ara ne Onyankopɔn, na wo nsɛm yɛ nokware, na wode adepa yi ahyɛ w’akoa bɔ,

²⁹na afei ma ɛnyɛ wo fɛ sɛ wubehyira w’akoa fi na agyina w’anim. Na wo, AWURADE Nyankopɔn na woaka na wo nhyira mu na wobehyira w’akoa fi daa.