Read Revised Akuapem Twi DC-KYERƐW KRONKRON 1 Ahene 1 Bible Online

1 Ahene 1 - Revised Akuapem Twi DC-KYERƐW KRONKRON bible

1 Ahene 1

¹Na ɔhene Dawid abɔ akora na wadi nna pii. Na sɛ wɔde ntama kata no ho mpo a, ne ho nyɛ no hyew.

²Enti ne nkoa ka kyerɛɛ no sɛ: Ma wɔnhwehwɛ ababaa a ɔyɛ ɔbaabun bi mmrɛ me wura ɔhene, na ommegyina ɔhene anim nyɛ wo hwɛfo, na ɔnna wo kokom na me wura ɔhene nnya ahoɔhyew.

³Ɛnna wɔkɔhwehwɛɛ ababaa hoɔfɛfo bi Israel ahye nyinaa mu, na wokohuu Sunamni Abisag, na wɔde no brɛɛ ɔhene.

⁴Na ababaa no ho yɛ fɛ pa ara, na ɔyɛɛ ɔhene hwɛfo na ɔsom no. Nanso ɔhene ne no anna.

⁵ Absalom wu akyi no, Hagit ba Adonigya maa ne ho so kae sɛ: Me na medi hene. Na osiesiee nteaseɛnam ne apɔnkɔsotefo ne mmarima aduonum a wɔbɛbɔ ne ho ban

⁶Nanso n’agya anka asɛm a ɛyɛ yaw bi ankyerɛ no da sɛ: Adɛn na woyɛ sɛɛ yi? Na ɔno nso yɛ ɔhoɔfɛfo, na ɔno na wɔwoo no dii Absalom akyi.

⁷ Na ɔne Seruia ba Yoab ne Ɔsɔfo Abiatar na edi atirimsɛm, na wodii Adonigya akyi boaa no.

⁸Na Ɔsɔfo Sadok ne Yoiada ba Benaia ne odiyifo Natan ne Simei ne Rei ne Dawid nnɔmmarima no de, wonni Adonigya fam.

⁹ Na Adonigya kunkum nguan ne anantwi ne anantwi a wɔadɔ srade, Sohelet bo a ɛwɔ En-rogel ho no so, na ohyiahyiaa ne nuanom ahenemma no nyinaa ne Yuda mmarima a wɔyɛ ɔhene nkoa no nyinaa.

¹⁰Na odiyifo Natan ne Benaia ne nnɔmmarima no ne ne nua Solomon de, wanhyia wɔn.

¹¹Ɛnna Natan ka kyerɛɛ Solomon ne na Batseba sɛ: So wontee sɛ Hagit ba Adonigya di hene, na yɛn wura Dawid nnim?

¹²Afei bra ma yentu agyina, na gye wo kra ne wo ba Solomon kra nkwa.

¹³Kɔ ɔhene Dawid nkyɛn, na ka kyerɛ no sɛ: So ɛnyɛ wo, me wura ɔhene, na wokaa w’afenaa ntam sɛ: Wo ba Solomon na obedi m’ade, na ɔno na ɔbɛtena m’agua so? Na adɛn nti na Adonigya di hene yi?

¹⁴Hwɛ, wo ne ɔhene da so rekasa wɔ hɔ no, me nso medi w’akyi maba, na mabɛfoa wo nsɛmmoa.

¹⁵Na Batseba kɔɔ ɔhene nkyɛn pia mu; na ɔhene abɔ akora pa ara, na Sunamni Abisag som ɔhene.

¹⁶Ɛnna Batseba bɔɔ ne mu ase kotow ɔhene. Na ɔhene bisaa no sɛ: Dɛn na ɛyɛ wo?

¹⁷Na obuaa no sɛ: Me wura, wo na wokaa AWURADE wo Nyankopɔn ntam kyerɛɛ w’abaawa sɛ: Wo ba Solomon na obedi m’ade, na ɔno na ɔbɛtena m’agua so.

¹⁸Na afei, hwɛ, Adonigya na odi hene yi; nanso me wura ɔhene, wunnim.

¹⁹ Na wakunkum anantwi ne nyɛmmoa ne nguan bebree, na wahyiahyia ahenemma nyinaa ne ɔsɔfo Abiatar ne ɔsahene Yoab, na w’akoa Solomon de, wanhyia no.

²⁰Na wo, me wura ɔhene, Israel nyinaa ani da wo so sɛ, kyerɛ wɔn nea ɔbɛtena me wura ɔhene agua no so ne wu akyi.

²¹ Anyɛ saa a, me wura ɔhene bɛkɔ n’agyanom nkyɛn asaman no, wobebu me ne me ba Solomon nnebɔneyɛfo.

²²Na hwɛ, ɔda so ne ɔhene rekasa no, odiyifo Natan nso baa hɔ.

²³Na wɔkɔka kyerɛɛ ɔhene sɛ: Hwɛ, odiyifo Natan ni. Na oduu ɔhene anim no, ɔkotow ɔhene de n’anim butuw fam.

²⁴Na Natan kae sɛ: Me wura ɔhene, wo na wuse: Adonigya nni w’ade na ɔno na ɔntena w’agua so, anaa?

²⁵ Na ɛnnɛ wasian kɔ, na wakokum anantwinini, ne anantwi a wɔadɔ srade, ne nguan bebree, na wahyia ahenemma nyinaa ne asafohene ne ɔsɔfo Abiatar, na hwɛ, wɔredidi na wɔrenom n’anim, na wɔka sɛ: Ɔhene Adonigya tiri nkwa!

²⁶ Na me, w’akoa ne ɔsɔfo Sadok ne Yoiada ba Benaia ne w’akoa Solomon de, wanhyia yɛn.

²⁷So me wura ɔhene nkyɛn na asɛm yi fi, na woamma w’akoa anhu nea ɔbɛtena me wura ɔhene wu akyi agua no so?

²⁸Ɛnna ɔhene Dawid buae sɛ: Momfrɛ Batseba mma me. Na ɔbaa ɔhene anim begyinaa hɔ.

²⁹Na ɔhene kaa ntam sɛ: Sɛ AWURADE a ogyee me kra fii ahohia nyinaa mu te ase yi,

³⁰sɛnea mekaa AWURADE Israel Nyankopɔn ntam mekyerɛɛ wo sɛ: Wo ba Solomon na obedi m’ade, na ɔno na ɔbɛtena m’agua so asi m’ananmu no, saa ara na mɛyɛ nnɛ da yi.

³¹Ɛnna Batseba bɔɔ ne mu ase de n’anim butuw fam kotow ɔhene kae sɛ: Me wura ɔhene nnya nkwa daa!

³²Na Ɔhene Dawid kae sɛ: Momfrɛ ɔsɔfo Sadok ne odiyifo Natan ne Yoiada ba Benaia mma me. Na wɔbaa ɔhene anim.

³³Na ɔhene ka kyerɛɛ wɔn sɛ: Momfa mo wura nkoa nka mo ho, na momfa me ba Solomon ntena m’afurumpɔnkɔ so, na momfa no nsian nkɔ Gihon.

³⁴Na ɔsɔfo Sadok ne odiyifo Natan nsra no mfa no nsi Israel so hene wɔ hɔ, na monhyɛn torobɛnto sɛ: Ɔhene Solomon tiri nkwa!

³⁵Na momforo nni n’akyi, na ɔmmra mmɛtena m’agua so, na ɔno na onni m’ade, na ɔno na mahyɛ no sɛ ɔnyɛ Israel ne Yuda so panyin.

³⁶Ɛnna Yoiada ba Benaia buaa ɔhene sɛ: Amen! Saa ara nso na AWURADE, me wura ɔhene Nyankopɔn, nka.

³⁷Sɛnea AWURADE ne me wura ɔhene tenae no, saa ara nso na ɔne Solomon ntena, na ɔmma n’agua nso nsen me wura ɔhene Dawid agua no.

³⁸ Na ɔsɔfo Sadok ne odiyifo Natan ne Yoiada ba Benaia ne Keretifo ne Peletifo sian kɔe, na wɔde Solomon tenaa ɔhene afurumpɔnkɔ so, na wɔde no kɔɔ Gihon.

³⁹ Na ɔsɔfo Sadok faa ngo abɛn fii ntamadan no mu de bɛsraa Solomon. Na wɔhyɛn torobɛnto, na ɔman no nyinaa kae sɛ: Ɔhene Solomon tiri nkwa!

⁴⁰Na ɔman no nyinaa foro dii n’akyi bae, na ɔman no hyenhyɛn mmɔtɔwa, na wɔn ani gyee kɛse, na wɔn gyegyeegye no reyɛ ama asase mu apae.

⁴¹Na Adonigya ne wɔn a wahyia wɔn a wɔne no wɔ hɔ no nyinaa tee; na wɔawie adidi; na Yoab tee torobɛnto no nka no, ɔkae sɛ: Kurow no mu hooyɛ a yɛte yi ase ne dɛn?

⁴² Na ɔda so rekasa no, hwɛ, ɔsɔfo Abiatar ba Yonatan bae; na Adonigya kae sɛ: Bra, na woyɛ ɔbarima a wutumi, na wukura kaseɛ pa.

⁴³Na Yonatan bua ka kyerɛɛ Adonigya sɛ: Ampa, yɛn wura ɔhene Dawid de Solomon asi hene.

⁴⁴Na ɔhene asoma ɔsɔfo Sadok ne odiyifo Natan ne Yoiada ba Benaia ne Keretifo ne Peletifo aka ne ho, na ɔde no atena ɔhene afurumpɔnkɔ so,

⁴⁵na ɔsɔfo Sadok ne odiyifo Natan asra no de no asi hene Gihon, na wɔde anigye de no aforo afi hɔ aba, na kurow no mu ayɛ hoo: Ɛno ne gyegyeegye a motee no.

⁴⁶ Nso Solomon te ahenni agua no so.

⁴⁷Nanso ɔhene nkoa aba abehyira yɛn wura ɔhene Dawid sɛ: Onyankopɔn mma Solomon din nyɛ kɛse nsen wo din, na ɔmma n’agua nso nsen w’agua. Na ɔhene abɔ ne mu ase ne nnae so;

⁴⁸ nanso sɛ ɔhene kae ni: Nhyira ne AWURADE Israel Nyankopɔn a wama obi atena m’agua so nnɛ yi, na m’aniwa ahu.

⁴⁹Ɛnna nnipa a Adonigya ahyia wɔn no nyinaa bobɔɔ piriw, na wɔsɔresɔree, na obiara sii ne kwan so kɔe.

⁵⁰Na Adonigya suroo Solomon anim, na ɔsɔre kɔe kosusoo afɔremuka abɛn mu.

⁵¹ Na wɔka kyerɛɛ Solomon sɛ: Hwɛ, Adonigya suro ɔhene Solomon, na hwɛ, wakosuso afɔremuka abɛn mu sɛ: Ɔhene Solomon nka me ntam nnɛ, sɛ ɔremfa nkrante nkum n’akoa.

⁵² Na Solomon kae sɛ: Sɛ ɔdan onipa a ɔsɛ a, ne nwi biako rentɔ fam; na sɛ wohu bɔne wɔ no mu a, obewu.

⁵³Na ɔhene Solomon soma ma wɔkɔfaa no fii afɔremuka no ho sian bae. Na ɔbae bɛkotow ɔhene Solomon, na Solomon ka kyerɛɛ no sɛ: Kɔ wo fi.