Read Revised Akuapem Twi DC-KYERƐW KRONKRON 1 Ahene 17 Bible Online

1 Ahene 17 - Revised Akuapem Twi DC-KYERƐW KRONKRON bible

1 Ahene 17

¹ Na Tisbini Elia a ofi Gilead atubrafo no mu ka kyerɛɛ Ahab sɛ: Sɛ AWURADE Israel Nyankopɔn a migyina n’anim te ase yi, obosu anaa osu rentɔ mfe yi mu gye sɛ ɛnam m’asɛm so!

²Na AWURADE asɛm baa ne nkyɛn sɛ:

³Fi ha kɔ, na dan wo ho kɔ apuei, na kohintaw asu Kerit a ɛwɔ Yordan anim no ho.

⁴Na wobɛnom asu no mu nsu, na mahyɛ nkwaakwaadabi sɛ wɔnhwɛ wo wɔ hɔ.

⁵Na osiim kɔyɛe sɛ AWURADE kae no, na ɔkɔe kɔtenaa asu Kerit a ɛwɔ Yordan anim no ho.

⁶Na nkwaakwaadabi brɛɛ no abodoo ne nam anɔpa, ne abodoo ne nam anwummere, na ɔnom asu no mu nsu.

⁷Na nna bi akyi no, asu no yowee, efisɛ osu antɔ asase no so.

⁸Na AWURADE asɛm baa ne nkyɛn sɛ:

⁹ Sɔre kɔ Sarefat a ɛyɛ Sidonfo de no, na kɔtena hɔ; na hwɛ, mahyɛ ɔbea kunafo bi hɔ sɛ ɔnhwɛ wo.

¹⁰Na ɔsɔre kɔɔ Sarefat. Na oduu kurow no pon ano no, na hwɛ, ɔbea kunafo no wɔ hɔ repɛ mmobaa. Na ɔfrɛɛ no ka kyerɛɛ no sɛ: Kɔsaw nsu kakra gu biribi mu brɛ me na mennom.

¹¹Na ɔrekɔ akɔsaw no, frɛɛ no sɛ: Fa abodoo afono ma kura wo nsam brɛ me.

¹² Na ose: Sɛ AWURADE wo Nyankopɔn te ase yi, atode biara nni me nsam, gye asikresam nsa ma a ɛwɔ kuruwa mu ne ngo kakra a ɛwɔ toa mu, na hwɛ, merepɛ mmobaa abien bi makɔ makɔto, na me ne me ba adi na yɛawu.

¹³Na Elia ka kyerɛɛ no sɛ: Nsuro, kɔyɛ sɛ woaka no, nanso kɔfa bi yɛ ɔfam ketewaa bi ma me kan, na fa brɛ me, na ɛno akyi no yɛ wo ne wo ba de.

¹⁴ Na sɛ AWURADE Israel Nyankopɔn se ni: Asikresam kuruwa no so renhuan, na ngo toa no so rentew de bɛkɔ akosi da a AWURADE bɛma osu atɔ agu asase so.

¹⁵Na ɔkɔe kɔyɛe sɛ Elia ka kyerɛɛ no no, na odii, ɔno ne ɔbea no ne ne fi, nna pii;

¹⁶na asikresam kuruwa no so anhuan na ngo toa no so antew, sɛnea AWURADE nam Elia so kae no.

¹⁷Na nsɛm yi akyi no, ɔbea fiwura no babarima yaree, na ne yare no mu yɛɛ den pii kosii sɛ ahome biara anka no mu.

¹⁸ Na ɔbea no ka kyerɛɛ Elia sɛ: Wo Onyankopɔn nipa, dɛn na me ne wo wɔ yɛ? Wobaa me nkyɛn sɛ worebɛma wɔakae me bɔne na wɔakum me ba!

¹⁹Na ɔka kyerɛɛ no sɛ: Fa wo ba no brɛ me! Na ogyee no fii ne kokom de no kɔɔ abansoro pia a ɔte mu no mu, na ɔde no kɔtoo ne mpa so.

²⁰Na ɔteɛɛm frɛɛ AWURADE sɛ: AWURADE me Nyankopɔn, ɔbea kunafo yi nso a mabɛsoɛ ne nkyɛn yi, wode mmusu reba no so sɛ worekum ne ba yi?

²¹ Na ɔteɛɛ ne mu butuw abofra no so mprɛnsa, na ɔteɛɛm frɛɛ AWURADE sɛ: AWURADE me Nyankopɔn, ma abofra yi kra nsan mmra no mu.

²²Na AWURADE tiee Elia nne, na abofra no kra san baa no mu, na onyaa nkwa.

²³ Na Elia faa abofra no de no sian fii abansoro pia mu baa ɔdan no mu, na ɔde no brɛɛ ne na, na Elia se: Hwɛ, wo ba no anya nkwa.

²⁴Na ɔbea no ka kyerɛɛ Elia sɛ: Afei na mahu sɛ Onyankopɔn nipa ne wo, na AWURADE asɛm a ɛwɔ w'anom no yɛ nokware.