Read Revised Akuapem Twi DC-KYERƐW KRONKRON 2 Ahene 12 Bible Online

2 Ahene 12 - Revised Akuapem Twi DC-KYERƐW KRONKRON bible

2 Ahene 12

¹ Yehu afe a ɛto so ason so na Yoas bedii hene, na odii hene mfirihyia aduanan Yerusalem. Na ne na din de Sibia a ofi Beer-seba.

²Na Yoas yɛɛ nea ɛteɛ AWURADE ani so ne nna a ɔsɔfo Yehoiada kyerɛkyerɛɛ no nyinaa.

³ Nanso sorɔnsorɔmmea no de, wɔanyi; ɔman no kɔɔ so bɔɔ afɔre na wɔhyew aduhuam sorɔnsorɔmmea no so.

⁴Na Yoas ka kyerɛɛ asɔfo no sɛ: Akronkronne sika a wɔde ba AWURADE fi nyinaa ne obiara kra ti sika sɛ wɔbɔ no bo no, ne sika biara nso a ɛba obi koma mu sɛ ɔde bɛba AWURADE fi no,

⁵asɔfo no nnyigye wɔ amannifo nkyɛn, na wɔmfa nsiesie ofi no faako a ayɛ gow no, baabiara a wobehu sɛ gow bi wɔ.

⁶Na ɔhene Yoas afe a ɛto so aduonu abiɛsa so no, na asɔfo no nnya nsiesie ofi no mu adangow no ɛ.

⁷Ɛnna ɔhene Yoas frɛɛ ɔsɔfo Yehoiada ne asɔfo no ka kyerɛɛ wɔn sɛ: Ɛdɛn nti na monnsiesie ofi no mu adangow no? Afei munnnyigye sika mo amannifo nkyɛn bio, na munyi mma na wɔmfa mpompam ofi no adangow no.

⁸Na asɔfo no penee sɛ wɔrennye ɔman no hɔ sika, na wɔrempompam ofi no mu adangow no bio.

⁹Ɛnna ɔsɔfo Yehoiada faa adaka bi, na otuu ne mmuaso mu tokuru, na ɔde sii afɔremuka no ho, nea wɔfa ba AWURADE fi no nifa; na asɔfo a wɔhwɛ ɔpon no ano no de sika a wɔde ba AWURADE fi no nyinaa guu mu.

¹⁰Na sɛ wohu sɛ sika pii wɔ adaka no mu a, ɔhene kyerɛwfo ne ɔsɔfo panyin no foro ba, na wɔbɛkyekyere, na wɔkan sika a wohu AWURADE fi no.

¹¹Na wɔde sika a wɔakari no hyɛɛ wɔn a wɔyɛɛ adwuma no a wɔde wɔn sisii AWURADE fi so ahwɛfo no nsa, na woyi maa nnua adwumfo ne adansifo a wɔyɛ AWURADE fi no,

¹²ne abantofo, ne abotwafo, ne nea wɔde bɛtɔ nnua ne abo a wɔatwa, nea wɔde bɛpompam AWURADE fi adangow no, ne nea wɔde betua ofi no adangow no pempam ho ade a wɔhwere nyinaa ka.

¹³Nanso wɔamfa sika a wɔde ba AWURADE fi no mu bi anyɛ AWURADE fi dwetɛ nsanka, adumgya, nkora, ntorobɛnto anaa sika ne dwetɛ ade biara.

¹⁴Na wɔde maa wɔn a wɔyɛ adwuma no, na wɔde pempam AWURADE fi no.

¹⁵ Nanso wɔne nnipa a wɔde sika hyɛɛ wɔn nsa sɛ wɔmfa mma adwumayɛfo no ammu akontaa, efisɛ wɔyɛɛ no nokware mu.

¹⁶Asodi afɔre sika ne bɔne ho afɔre sika de, wɔamfa amma AWURADE fi; ɛyɛ asɔfo no dea.

¹⁷ Ɛbere no mu na Siria hene Hasael foro bae ne Gat bɛkoe, na odii nkunim; na Hasael de n’ani kyerɛe sɛ ɔreforo aba Yerusalem.

¹⁸ Ɛnna Yuda hene Yoas faa akronkronne a n’agyanom Yuda ahene Yosafat ne Yoram ne Ahasia yɛɛ no kronkron no nyinaa, ne n’akronkronne, ne sika a wohuu AWURADE fi ne ahemfi akorade mu nyinaa, na ɔsoma ma wɔde kɔmaa Siria hene Hasael; ɛnna ofii Yerusalem hɔ kɔe.

¹⁹Na Yoas ho nsɛm nkae ne nea ɔyɛe nyinaa, wɔakyerɛw no Yuda ahene beresosɛm nhoma no mu.

²⁰ Na ne nkoa sɔre pam ne tiri so, na wokum Yoas wɔ Milo dan a ɛde rekɔ Sila no mu.

²¹ Na ne nkoa Simeat ba Yosakar ne Somer ba Yosabad bɔɔ no na owui; na wosiee no kaa n’agyanom ho, Dawid kurow mu; na ne ba Amasia bedii n’ade.