Read Revised Akuapem Twi DC-KYERƐW KRONKRON 2 Ahene 14 Bible Online

2 Ahene 14 - Revised Akuapem Twi DC-KYERƐW KRONKRON bible

2 Ahene 14

¹ Israel hene Yoahas ba Yoas afe a ɛto so abien so na Yuda hene Yoas ba Amasia bedii hene.

²Obedii hene no, na wadi mfe aduonu anum, na odii hene mfe aduonu akron Yerusalem. Na ne na din de Yoadin a ofi Yerusalem.

³ Na ɔyɛɛ nea ɛteɛ AWURADE ani so, nanso ɛnte sɛ n’agya Dawid; sɛnea n’agya Yoas yɛɛ no nyinaa na ɔno nso yɛe.

⁴ Nanso sorɔnsorɔmmea no de, wɔanyi. Ɔman no kɔɔ so bɔɔ afɔre na wɔhyew aduhuam sorɔnsorɔmmea no so.

⁵ Na ahenni no timii ne nsam no, okum ne nkoa a wokum n’agya ɔhene no.

⁶ Na awudifo no mma no de, wankum wɔn, sɛnea wɔakyerɛw Mose mmara no mu sɛnea AWURADE hyɛɛ sɛ: Wonnkum agyanom, mma nti, nso wonnkum mma, agyanom nti, na mmom obiara bɔne so na wonkum no, no.

⁷Ɔno na okum Edom mu nnipa ɔpedu, Nkyene-bon mu, na ɔde ɔko faa Sela, na ɔtoo ne din Yokteel saa bere no.

⁸Ɛbere no mu na Amasia somaa abɔfo kɔɔ Israel hene Yoas, Yehu ba Yehoahas ba, nkyɛn se: Bra ma yɛnsɔ yɛn ho nhwɛ.

⁹ Na Israel hene Yoas soma baa Yuda hene Amasia nkyɛn sɛ: Nsɔe dua a ɛwɔ Lebanon no soma kɔɔ kyeneduru a ɛwɔ Lebanon no nkyɛn sɛ: Fa wo babea ma me ba nware. Na wuram mmoa a wɔwɔ Lebanon no sen betiatiaa nsɔe dua no so.

¹⁰Okum de, woakum Edom, na wo koma ama wo so. Ma w’anuonyam nnɔ wo so na tena wo fi, na ɛdɛn nti na wo ne mmusu rebedi aperepere na woahwe ase, wo ne Yuda nyinaa?

¹¹Na Amasia antie. Ɛnna Israel hene Yoas foro bae, na wobehyiaam koe, ɔno ne Yuda hene Amasia, wɔ Bet-semes a ɛyɛ Yuda dea hɔ.

¹²Na Yuda gui Israel anim, na woguan kokɔɔ wɔn ntamadan mu.

¹³Na Israel hene Yoas kyeree Yuda hene Amasia, Ahasia ba Yoas ba, wɔ Bet-semes; na ɔbaa Yerusalem beburuw Yerusalem fasu fi Efraim pon no ho de kosii twea pon no ho basafa ahannan;

¹⁴na ɔfaa sika ne dwetɛ nyinaa, ne nnwinne a wohui AWURADE fi ne ahemfi akorade mu ne nnɔnwowa, na ɔsan kɔɔ Samaria.

¹⁵Na Yoas ho nsɛm nkae, nea ɔyɛe ne ne mmaninne, ne sɛnea ɔne Yuda hene Amasia koe no, so wɔankyerɛw Israel ahene beresosɛm nhoma no mu?

¹⁶ Na Yoas wui, na wosiee no Samaria kaa Israel ahene ho, na ne ba Yeroboam bedii n’ade.

¹⁷Na Yuda hene Amasia, Yoas ba, tenaa ase mfirihyia dunum, Israel hene Yoas, Yoahas ba, wu akyi.

¹⁸Na Amasia ho nsɛm nkae no, wɔakyerɛw ahyɛ Yuda ahene beresosɛm nhoma no mu.

¹⁹ Na wɔpam ne tiri so Yerusalem, na oguan kɔɔ Lakis; na wɔsoma tiw no kɔɔ Lakis, na wokokum no wɔ hɔ.

²⁰ Na wɔde no too apɔnkɔ so bae, na wosiee no Yerusalem kaa n’agyanom ho, Dawid kurow mu.

²¹ Ɛnna Yuda man no nyinaa faa Asaria a wadi mfe dunsia no na wosii no hene sii n’agya Amasia ananmu.

²² Ɔno na ɔkyekyeree Elat na ɔdan maa Yuda, na akyiri no ɔhene no wu kɔɔ n’agyanom nkyɛn wɔ asaman.

²³ Yuda hene Amasia, Yoas ba, afe a ɛto so dunum so na Israel hene Yeroboam, Yoas ba, bedii hene, Samaria, mfe aduanan biako.

²⁴ Na ɔyɛɛ AWURADE ani so bɔne, wamfi Nebat ba Yeroboam a ɔmaa Israel yɛɛ bɔne no bɔne nyinaa ho.

²⁵ Ɔno na okogyee Israel hye san maa wɔn de fi Hamat de besii Araba po ano, sɛ AWURADE Israel Nyankopɔn nam n’akoa, Amitai ba Yona, odiyifo a ofi Gat-hefer, so kae no.

²⁶ Na AWURADE huu Israel amanehunu sɛ ɛyɛ nwene papa, na ɔdehye ne akoa nyinaa kɔ, na Israel nni boafo bi.

²⁷ Nso AWURADE nkae sɛ ɔbɛpopa Israel din afi ɔsoro ase, na ɔnam Yoas ba Yeroboam so gyee wɔn.

²⁸Na Yeroboam ho nsɛm nkae, ne nea ɔyɛe nyinaa ne ne mmaninne, sɛnea ɔkoe ne sɛnea ɔdan Damasko ne Hamat a ɛyɛ Yuda de no maa Israel no, wɔakyerɛw no Israel ahene beresosɛm nhoma no mu.

²⁹ Na Yeroboam tiw n’agyanom Israel ahemfo no wɔ asamando, na ne ba Sakaria bedii n'ade.