Read Revised Akuapem Twi DC-KYERƐW KRONKRON 2 Ahene 19 Bible Online

2 Ahene 19 - Revised Akuapem Twi DC-KYERƐW KRONKRON bible

2 Ahene 19

¹ Na ɔhene Hesekia tee no, osunsuanee ne ntade mu na ofuraa atweatam na osiim kɔɔ AWURADE fi.

²Na ɔsomaa Eliakim a odi ofi no so ne ɔkyerɛwfo Sebna ne asɔfo mu mpanyin a wofurafura ayitam kɔɔ Amos ba odiyifo Yesaia nkyɛn,

³na wɔkɔka kyerɛɛ no sɛ: Sɛ Hesekia se ni: Ahohia ne asotwe ne nsopa da ne nnɛ, na mma adu awotwaa ano, na ahoɔden nni hɔ a wɔde bɛwo.

⁴ Ebia AWURADE wo Nyankopɔn bɛte Rabsake a ne wura Asaria hene asoma no sɛ ɔmmɛsopa Onyankopɔn teasefo no nsɛm, na nsɛm a AWURADE wo Nyankopɔn ate no nti watwe n’aso. Enti ma wo mpaebɔ so ma nkae a wɔwɔ hɔ no.

⁵Na ɔhene Hesekia nkoa no baa Yesaia nkyɛn.

⁶Na Yesaia ka kyerɛɛ wɔn sɛ: Sɛ monka nkyerɛ mo wura ni: Sɛ AWURADE se ni: Nsuro nsɛm a wotee a Asaria hene nkoa de abɛyaw me no anim.

⁷ Hwɛ, mede honhom bi mɛhyɛ no mu, na wate nsɛm bi, na wasan akɔ n’asase so, na mama watɔ nkrante ano n’asase so.

⁸Na Rabsake sanee, na ɔkɔtoo Asaria hene sɛ ɔne Libna reko, efisɛ wate sɛ watu afi Lakis.

⁹Na ɔtee Etiopia hene Tirhaka nka sɛ: Hwɛ, watu ne wo rebɛko. Na ɔsan somaa abɔfo baa Hesekia nkyɛn bio sɛ:

¹⁰ Sɛ monkɔka nkyerɛ Yuda hene Hesekia ni: Mma wo Nyankopɔn a wode wo ho ato no so no nnnyigye wo sɛ: Wɔremfa Yerusalem nhyɛ Asaria hene nsa.

¹¹Hwɛ, wo ara woate nea Asaria ahene ayeyɛ nsaase nyinaa, asɛe no pasaa, na wo na wobegye wo anaa?

¹² So amanaman a m’agyanom asɛe wɔn, Gosan ne Haran ne Resef ne Edenfo a wɔwɔ Telasar no anyame no gyee wɔn anaa?

¹³Ɛhe na Hamat hene ne Arpad hene ne Sefarwaim kurow ne Hena ne Iwa hene no wɔ?

¹⁴Na Hesekia gyee nhoma no abɔfo no nsam, na ɔkenkanee; na ɔforo kɔɔ AWURADE fi, na Hesekia trɛw mu too AWURADE anim.

¹⁵ Na Hesekia bɔɔ AWURADE anim mpae sɛ: AWURADE Israel Nyankopɔn a wote Kerubim so, wo nko ne Nyankopɔn asase so ahenni nyinaa so; wo na woyɛɛ ɔsoro ne asase.

¹⁶ Brɛ w’aso ase, AWURADE, na tie! Bue w’aniwa, AWURADE, na hwɛ! Na tie Senakerib nsɛm a wasoma sɛ wɔmfa mmɛsopa Onyankopɔn teasefo no.

¹⁷Ɛwom, AWURADE, Asaria ahene asɛe amanaman ne wɔn nsaase,

¹⁸na wɔatotow wɔn anyame agu ogya mu, efisɛ wɔnyɛ anyame, na ɛyɛ onipa nsa ano adwuma, dua ne ɔbo nko, na wɔasɛe wɔn.

¹⁹Enti, AWURADE yɛn Nyankopɔn, gye yɛn fi ne nsam, na asase so ahenni nyinaa nhu sɛ wo AWURADE ne Nyankopɔn, wo nkutoo ara nko!

²⁰Ɛnna Amos ba Yesaia soma kɔɔ Hesekia nkyɛn sɛ: Sɛ AWURADE Israel Nyankopɔn se ni: Nea wobɔɔ me ɛho mpae Asaria hene Senakerib ho no, mate.

²¹Eyi ne asɛm a AWURADE aka agu no so: Ɔbaabun Sion babea no bu wo animtiaa yi wo ahii, w’akyi na Yerusalem babea rewosow ne ti.

²²Hena na woasopa no na woayaw no? Na hena so na woama wo nne so na woama w’ani atra wo ntɔn? Wode ahyɛ Israel kronkronni no.

²³W’abɔfo so na wonam asopa Awurade aka sɛ: Mede me nteaseɛnam dodow no mɛforo makɔ mmepɔw atifi, Lebanon mu noho tɔnn, na metwitwa ne nkyeneduru atenten ne ɔpopaw a ɛyɛ fɛ no agu na makodu n’atenae a ɛwɔ akyirikyiri, ne kwaebirentuw mu.

²⁴Me na matutu mmura manom amannɔne nsu, na mede manammɔn mu mayow Misraim nsubɔnten nyinaa.

²⁵So wontee sɛ mifi meyɛe akyɛ, na mifi tete mmere mu na mehyɛɛ no saa? Afei na mama aba mu, sɛ wɔnsɛe nkurow a afasu atwa ho ahyia mma ɛnnan akurofo akuwakuw,

²⁶na emufo a wɔagurow no ho adwiriw wɔn na wɔn ani awu, na wɔadannan mfuwa so ahaban ne wura momono, adan atifi wura, ne awi a amma ne ho so na akisa.

²⁷Na w’asetena ne w’adifi ne wo muba no, minim, ɛne wo dam a wobɔ me so no.

²⁸Esiane sɛ wobɔ me so dam, na w’ahoahoa aforo abedu m’asom nti, mede me darewa mɛhyɛ wo hwenem na mede me nnareka bɛto w’anom, na masan wo mafa ɔkwan a wonam so bae no so akɔ.

²⁹Na eyi nyɛ wo sɛnkyerɛnne: Afe yi mu munni ntwakae a efifii, na afe a ɛto so abien no mu, nea ebedi akyiri aba. Na afe a ɛto so abiɛsa mu no, mungu na muntwa, na montɛw bobe nturo, na munni mu aba.

³⁰Na Yuda fi mu wɔn a wɔagye wɔn afi mu a wɔaka no, wobegye ntini bio, na wɔasow aba.

³¹ Na Yerusalem nkae bi befi, na nnipa a wɔafi mu anya nkwa nso afi Sion bepɔw so, AWURADE ninkuntwe na ɛbɛyɛ eyi.

³²Enti sɛ AWURADE se Asaria hene ho ni: Ɔremma kurow yi mu, na ɔrentow agyan mma ha, na ɔremfa ɔkyɛm mmehyia no, na ɔrenhɔre pempe nhyɛ no.

³³Ɔkwan a ɔnam so bae no so na ɔnam bɛsan akɔ, na kurow yi de, ɔremma mu, AWURADE na ose.

³⁴ Na mɛwaw kurow yi ani magye no, me ara ne m’akoa Dawid nti a!

³⁵Na anadwo no ara AWURADE bɔfo fi kokum Asaria nsra mu nnipa ɔpeha aduɔwɔtwe anum; na wɔsɔree anɔpa no, na hwɛ, wɔn nyinaa yɛ afunu.

³⁶Ɛnna Asaria hene Senakerib sii mu sanee, na ɔkɔtenaa Niniwe.

³⁷ Na ɔresɔre ne nyame Nisrok fi no, ne mma Adramelek ne Sareser de nkrante kum no, na wofii mu guan kɔɔ Ararat asase so; na ne ba Esar-hadon bedii n'ade.