Read Revised Akuapem Twi DC-KYERƐW KRONKRON 2 Ahene 21 Bible Online

2 Ahene 21 - Revised Akuapem Twi DC-KYERƐW KRONKRON bible

2 Ahene 21

¹ Manase bedii hene no, na wadi mfirihyia dumien, na odii hene mfe aduonum anum wɔ Yerusalem. Na ne na din de Hefsi-ba.

²Na ɔyɛɛ AWURADE ani so bɔne sɛ amanaman a AWURADE tuu wɔn fii Israelfo anim no akyide.

³ Na ɔsan sisii sorɔnsorɔmmea a n’agya Hesekia asɛesɛe no no, na osisii afɔremuka maa Baal, na ɔyɛɛ Asera dua sɛnea Israel hene Ahab yɛe no, na ɔsɔree ɔsoro asafo nyinaa na ɔsom wɔn.

⁴ Na osisii afɔremuka AWURADE fi a AWURADE kaa ho asɛm sɛ: Yerusalem na mede me din mɛto hɔ, no mu.

⁵ Na osisii afɔremuka maa ɔsoro asafo nyinaa AWURADE fi abangua abien no so;

⁶ na ɔmaa ne babarima faa ogya mu, na ɔyɛɛ abayide ne adebisade, na ɔhyehyɛɛ asamanfrɛfo ne asumanfo, ɔmaa bɔne a ɔyɛe no dɔɔso AWURADE ani so de huruu ne bo.

⁷ Na ɔde Asera ohoni a ɔyɛe no sii ofi no mu, ofi a AWURADE kaa ho asɛm kyerɛɛ Dawid ne ne ba Solomon no sɛ: Ofi yi ne Yerusalem a mayi Israel mmusuakuw nyinaa mu no mu na mede me din mɛto daa;

⁸nanso meremma Israel anan ntu nkyin mfi asase a mede mama wɔn agyanom no so bio. Na nea wɔnyɛ nko ne sɛ: Wɔhwɛ yɛ sɛnea mahyɛ wɔn nyinaa ne sɛ mmara a m’akoa Mose hyɛɛ wɔn no nyinaa te no.

⁹Nanso wɔantie, na Manase de wɔn yerae ma wɔyɛɛ bɔne sen amanaman a AWURADE sɛee wɔn fii Israel anim no.

¹⁰Na AWURADE nam ne nkoa adiyifo no so kae sɛ:

¹¹Esiane sɛ Yuda hene Manase ayɛ saa akyide yi, na wayɛ bɔne asen nea Amorifo a wodii n’anim yɛe nyinaa, na ɔde n’abosonhuhu ama Yuda nso ayɛ bɔne nti,

¹² sɛ AWURADE Israel Nyankopɔn se ni: Hwɛ, mede bɔne mereba Yerusalem ne Yuda so a obiara a ɔbɛte no, n’aso abien mu bɛyɛ no yɔnn.

¹³Na mɛtwe Samaria susuhama mu, ne Ahab fi so taahama mu aba Yerusalem so, na mɛpopa Yerusalem mu sɛnea wɔpopa asanka mu, wɔpopa na wɔdan butuw;

¹⁴na mɛpo m’agyapade nkae no, na mede wɔn mahyɛ wɔn atamfo nsa, na wɔayɛ dwow ade ne afow ade ama wɔn atamfo nyinaa,

¹⁵efisɛ wɔayɛ m’ani so bɔne na wɔahuru me bo fi da a wɔn agyanom fii Misraim bae de besi nnɛ.

¹⁶ Na mogya a edi bem nso Manase kaa pii pa ara gui kosii sɛ ɔde hyɛɛ Yerusalem ma fi ano kɔpem ano, ɛsono ne bɔne a ɔmaa Yuda yɛe, sɛ wɔyɛɛ nea enye AWURADE ani so no.

¹⁷Na Manase ho nsɛm nkae ne nea ɔyɛe nyinaa ne ne bɔne a ɔyɛe no, wɔakyerɛw Yuda ahene beresosɛm nhoma no mu.

¹⁸Na Manase ne n’agyanom kɔdae, na wosiee no ne fi turo a ɛne Usa turo no mu; na ne ba Amon bedii n’ade.

¹⁹Amon bedii hene no, na wadi mfirihyia aduonu abien, na odii hene mfe abien Yerusalem. Na ne na din de Mesulemet, Harus a ofi Yotba ba.

²⁰Na ɔyɛɛ AWURADE ani so bɔne sɛnea n’agya Manase yɛe no,

²¹na ɔnantew ɔkwan a n’agya nantew mu no nyinaa mu, na ɔsom abosonhuhuw a n’agya somee no, na ɔsɔree wɔn;

²²na ogyaw AWURADE, n’agyanom Nyankopɔn, na wannantew AWURADE kwan mu.

²³ Na Amon nkoa pam ne tiri so, na wokum ɔhene no ne fi.

²⁴Na asase no sofo no kunkum wɔn a wɔpam ɔhene Amon tiri so no nyinaa, na asase no sofo no de ne ba Yosia sii hene sii n’ananmu.

²⁵Na Amon ho nsɛm nkae, nea ɔyɛe no, wɔankyerɛw Yuda ahene beresosɛm nhoma no mu?

²⁶ Na wosiee no ne da mu, Usa turom, na ne ba Yosia bedii n’ade.