Read Revised Akuapem Twi DC-KYERƐW KRONKRON 2 Ahene 3 Bible Online

2 Ahene 3 - Revised Akuapem Twi DC-KYERƐW KRONKRON bible

2 Ahene 3

¹ Na Ahab ba Yehoram bedii Israel so hene Samaria, Yuda hene Yehosafat afe a ɛto so dunwɔtwe so; na odii hene mfe dumien.

² Na ɔyɛɛ AWURADE ani so bɔne, nanso ɛnte sɛ n’agya ne ne na; efisɛ oyii Baal honi a n’agya yɛe no hɔ.

³ Nanso ɔbataa Nebat ba Yeroboam a ɔmaa Israel yɛɛ bɔne no bɔne ho, na wansan amfi ho.

⁴Na Moab hene Mesa yɛ nguanhwɛfo, na ɔmaa Israel hene nguanten mma ɔpeha ne adwennini ɔpeha ho nwi.

⁵Na Ahab wui no, Moab hene tew Israel hene anim atua.

⁶Na Yehoram fii Samaria da no ara, boaboaa Israel nyinaa ano.

⁷ Na ɔkɔe, na ɔsoma kɔɔ Yuda hene Yehosafat nkyɛn sɛ: Moab hene atew m’anim atua, na wo ne me bɛkɔ ne Moab akɔko anaa? Na ose: Mɛkɔ, mete sɛ wo, me man te sɛ wo man, m’apɔnkɔ te sɛ w’apɔnkɔ.

⁸Na ɔkae sɛ: Ɔkwan bɛn so na yɛbɛfa akɔ? Na ose: Edom sare so kwan no.

⁹Ɛnna Israel hene ne Yuda hene ne Edom hene siim kɔe; na wokyinii nnansɔn kwan, na nsu nni hɔ mma dɔm no ne mmoa a wodi wɔn akyi.

¹⁰Na Israel hene kae sɛ: Ao, sɛ AWURADE afrɛ ahene baasa yi ahyia sɛ ɔde wɔn rekɔhyɛ Moab nsa!

¹¹ Na Yehosafat se: So AWURADE diyifo bi nni ha a yɛbɛkɔ ne nkyɛn akobisa AWURADE? Na Israel hene nkoa mu biako buae sɛ: Ɛha na Safat ba Elisa a ohwiee nsu guu Elia nsa so no wɔ.

¹²Na Yehosafat kae sɛ: AWURADE asɛm wɔ ne nkyɛn. Ɛnna Israel hene ne Yehosafat ne Edom hene sian kɔɔ ne nkyɛn.

¹³Na Elisa ka kyerɛɛ Israel hene no sɛ: Dɛn na me ne wo wɔ yɛ? Kɔ w’agya adiyifo ne wo na adiyifo no nkyɛn! Na Israel hene ka kyerɛɛ no sɛ: Dabi, na AWURADE afrɛ ahene baasa yi ahyia sɛ ɔde wɔn rekɔhyɛ Moab nsa.

¹⁴ Na Elisa se: Sɛ asafo AWURADE a migyina n’anim te ase yi, sɛ ɛnyɛ Yuda hene Yehosafat anim na mehwɛ a, anka merenhwɛ wo na merenhu wo.

¹⁵Na afei momfa ɔsankubɔfo mmrɛ me. Na ɔsankubɔfo no rebɔ no, AWURADE nsa baa no so,

¹⁶na ɔkae sɛ: Sɛ AWURADE se ni: Mɛma nsu abɛhyɛ abon a emu awo yi mu ma.

¹⁷Na sɛ AWURADE se ni: Morenhu mframa na morenhu osu, nanso nsu bɛyɛ obon yi ma; na moanom, mo ne mo anantwikuw ne mo mmoa.

¹⁸Na eyi nso yɛ mmerɛw AWURADE ani so, na obeyi Moab nso ahyɛ mo nsa.

¹⁹Na mobɛbobɔ afasu mu nkurow nyinaa ne nkurow a ɛyɛ fɛ nyinaa, na moatotow nnua pa nyinaa, na moasisiw nsuaniwa nyinaa, na mode abo asɛe mfuw pa nyinaa.

²⁰Na anɔpa a wɔrebɔ aduan afɔre no, hwɛ, nsu fii Edom kwan so bae, na nsu no yɛɛ asase no ma.

²¹Na Moabfo nyinaa tee sɛ ahene no reforo aba ne wɔn abɛko no, wɔfrɛfrɛɛ wɔn a wobetumi amia amiade nyinaa efi mmofra so kosii mpanyimfo so ne wɔn hyiae, na wobegyinaa ɔhye so.

²²Na wɔsɔree anɔpatutu na owia repue nsu no so no, Moabfo huu nsu no agya noho sɛ ɛbere sɛ mogya;

²³na wɔkae sɛ: Mogya ni! Ahene no ne wɔn ho adi nnɔmmata akunkum wɔn ho, na afei, Moabfo, monkɔ asade ho.

²⁴Na wɔbaa Israel nsra ho no, Israel sɔre kunkum Moabfo, na woguanee wɔn anim, na wɔkɔɔ mu kokunkum Moabfo.

²⁵ Na nkurow no, woburuwii, na mfuw pa nyinaa, wɔtotow abo mmiako mmiako guguu so kosii sɛ ɛso katae, na wosisiw nsuaniwa nyinaa, na wɔtotow nnua pa nyinaa; gye Kir-hareset na wogyaw n’abo, na ataabotowfo kotwaa ho hyiae bɔɔ no.

²⁶Na Moab hene hui sɛ dɔm no ano ayɛ den papa ama no no, ɔfaa mmarima ahansɔn a wɔtwe nkrante kaa ne ho sɛ ɔretew mu akɔ Edom hene ho, nanso wɔantumi.

²⁷Ɛnna ɔfaa n’abakan a anka obesi n’ananmu adi hene no, na ɔde no bɔɔ ɔhyew afɔre ɔfasu no so. Na abufuw kɛse baa Israel mu, na wofii ne ho san baa wɔn asase so.