Read Revised Akuapem Twi DC-KYERƐW KRONKRON 1 Berɛsosɛm 11 Bible Online

1 Berɛsosɛm 11 - Revised Akuapem Twi DC-KYERƐW KRONKRON bible

1 Berɛsosɛm 11

¹ Na Israel nyinaa boaboaa wɔn ho ano baa Dawid nkyɛn Hebron bɛkae sɛ: Hwɛ, w’abusuafo ne yɛn.

²Na kan a Saul di hene no, wo ara na wode Israel fi adi na wode wɔn ba mu. Na AWURADE wo Nyankopɔn aka akyerɛ wo sɛ: Wo na wobɛyɛn me man Israel, na wo ara na wubedi me man Israel so bapɔmma.

³ Na Israel mpanyin nyinaa baa ɔhene no nkyɛn Hebron, na Dawid ne wɔn pamee AWURADE anim Hebron, na wɔsraa Dawid ngo sii no Israel so hene, sɛnea AWURADE nam Samuel so kae no.

⁴Na Dawid ne Israel nyinaa siim kɔɔ Yerusalem, ɛne Yebus, efisɛ ɛhɔ na Yebusifo a wɔyɛ asase no sofo no te.

⁵Na Yebusifo no ka kyerɛɛ Dawid sɛ: Woremma ha. Nanso Dawid faa Sion aban a ɛne Dawid kurow no.

⁶Na Dawid kae sɛ: Obiara a obekum Yebusifo kan no, ɔbɛyɛ otitiriw ne ɔsafohene. Ɛnna Seruia ba Yoab foro kɔe kan, na ɔyɛɛ otitiriw.

⁷Na Dawid tenaa aban no mu, na enti wɔfrɛ no Dawid kurow.

⁸Na Dawid kyekyeree kurow no hyiae de fi Milo ara de twaa ho hyiae. Na Yoab siesiei ɔman no a ɛkae no.

⁹Na Dawid de kɛseyɛ ara, na asafo AWURADE dii n’akyi.

¹⁰ Na eyinom ne nnɔmmarima a Dawid wɔ no mu atitiriw a wɔhyɛɛ wɔn ho den kaa ne ho n’ahenni mu, sɛ wɔne Israel nyinaa besi no hene, sɛnea AWURADE kae Israel ho no.

¹¹ Na eyinom ne nnɔmmarima a Dawid wɔ no dodow: Hakmonini Yasobeam, odi akunini no ti, ɔno na ɔde ne peaw kunkum nnipa ahasa prɛko.

¹² Na n’akyi na Ahohini Dodo ba Eleasar di, ɔfra nnɔmmarima baasa no mu.

¹³Ɔno na ɔne Dawid wɔ Pas-damim, na Filistifo aboaboa wɔn ho ano hɔ sɛ wɔrebedi ako, na asasewa bi wɔ hɔ a atoko ayɛ so ma, na ɔman no guan fii Filistifo anim,

¹⁴na wokogyinaa asasewa no mfinimfini gyei, na wokum Filistifo no, na AWURADE de nkonimdi kɛse gyee wɔn.

¹⁵ Na atitiriw aduasa no mu baasa sian kɔɔ ɔbotan no so Dawid nkyɛn, Adulam bodan no mu, na Filistifo dɔm abɔ nsra Refaim bon mu.

¹⁶Nso ɛbere no mu na Dawid wɔ bepɔw so atenae no mu, na Filistifo bansifo wɔ Betlehem bere no mu.

¹⁷Na ɛdɔɔ Dawid kɔn, na ɔkae sɛ: Hena na ɔbɛma me Betlehem asubura a ɛwɔ kurow pon ho no mu nsu manom?

¹⁸Na mmarima baasa no tew faa Filistifo nsra no mu kɔsaw Betlehem asubura a ɛwɔ kurow pon ho no mu nsu de brɛɛ Dawid. Nanso Dawid ampɛ sɛ ɔnom, na ohwie gu maa AWURADE,

¹⁹na ɔkae sɛ: Me Nyankopɔn mma ɛmpare me sɛ mɛyɛ eyi. So mennom mmarima a wɔde wɔn nkwa too wɔn nsam yi mogya? Na wɔn nkwa na wɔde kɔfa bae yi. Na wampɛ sɛ ɔnom. Eyi na nnɔmmarima baasa no yɛe.

²⁰Na Yoab ne nua Abisai nso di baasa no ti. Ɔno nso na ohwinhwim ne peaw nnipa ahasa so kunkum wɔn, na ɔwɔ din baasa no mu.

²¹Nnipa baasa no mu na ɔwɔ anuonyam sen baanu no, na odi wɔn safohene, nanso wanto kan baasa no.

²²Yehoiada ba Benaia yɛ ɔbarima katakyi a ofi Kabseel a ɔyɛɛ nneɛma akɛse: Ɔno na okum Moabni Ariel mma baanu no. Na ɔno ara nso sian kokum gyata, abura bi mu, da bi a sukyerɛma atɔ.

²³ Na ɔno ara nso kokum Misraimni barima bi a ne tenten yɛ basafa abien ne fa, na Misraimni no kura peaw a ɛte sɛ ɔtamanwemfo nsadua wɔ ne nsam, na ɔde poma sian kɔɔ ne nkyɛn, na ohuam Misraimni no nsam peaw no de n’ankasa peaw no kum no.

²⁴ Eyi na Yehoiada ba Benaia yɛe, na ɔwɔ din nnɔmmarima baasa no mu.

²⁵Hwɛ, ɔwɔ anuonyam sen akunini aduasa no, nanso kan baasa no de, wanto wɔn. Na Dawid de no sii n’ankɔbeafo so.

²⁶Na dɔm no mu nnɔmmarima no ne: Yoab ne nua Asahel, Betlehemni Dodo ba Elhanan,

²⁷ Harodini Samot, Pelonni Heles,

²⁸Tekoani Ikes ba Ira, Anatotni Abieser,

²⁹Husani Sibekai, Ahohini Ilai,

³⁰Netofani Maharai, Netofani Baana ba Heled,

³¹Ribai a ofi Gibea a ɛwɔ Benyamin mma mu ba Itai, Piratonni Benaia,

³²Gaasni Hurai, Aribani Abiel,

³³Baharumni Asmawet, Saalbonni Eliahba,

³⁴Gisonni Hasem mma, Hararini Sage ba Yonatan,

³⁵Hararini Sakar ba Ahiam, Ur ba Elifal,

³⁶Mekerani Hefer, Pelonni Ahia,

³⁷Karmelni Hesro, Esbai ba Naarai,

³⁸Natan ne nua Yoel, Hagri ba Mibhar,

³⁹Amonni Selek, Berotni Naharai a ɔyɛ Seruia ba Yoab akodekurafo,

⁴⁰Yitrini Ira, Yitrini Gareb,

⁴¹ Hetini Uria, Ahlai ba Sabad,

⁴²Rubenni Sisa ba Adina a ɔyɛ Rubenfo so otitiriw, na nnipa aduasa ka ne ho;

⁴³Maaka ba Hanan, Mitni Yosafat,

⁴⁴Asterani Usia, Aroerni Hotam mma Sama ne Yeiel,

⁴⁵Simri ba Yediael ne Tisini Yoha a ɔyɛ ne nua,

⁴⁶Mahawini Eliel, Elnaam mma Yeribai ne Yosawia, Moabni Yitma,

⁴⁷Eliel ne Obed ne Mesobaiani Yaasiel.