Read Revised Akuapem Twi DC-KYERƐW KRONKRON 2 Berɛsosɛm 11 Bible Online

2 Berɛsosɛm 11 - Revised Akuapem Twi DC-KYERƐW KRONKRON bible

2 Berɛsosɛm 11

¹ Na Rehoboam duu Yerusalem no, ɔboaa Yuda ne Benyamin fi no nyinaa ano hyiae, mmarima akofofo a wɔapaw wɔn ɔpeha aduɔwɔtwe, sɛ ɔne Israel rekɔko na wɔadan ahenni no ama Rehoboam.

²Na AWURADE asɛm baa Onyankopɔn nipa Semaia nkyɛn sɛ:

³Ka kyerɛ Solomon ba Rehoboam, Yuda hene, ne Israel a wɔwɔ Yuda ne Benyamin nyinaa sɛ:

⁴Sɛ AWURADE se ni: Mommforo nnkɔ, na mo ne mo nuanom nnkɔko; monsan nkokɔ mo afi, na me na asɛm yi fi me. Na wotiee AWURADE asɛm no, na wɔsan fii Yeroboam so kɔ no.

⁵Na Rehoboam tenaa Yerusalem. Na ɔkyekyee nkurow ma ɛyɛɛ den wɔ Yuda,

⁶na ɔkyekyee Betlehem ne Etam ne Tekoa,

⁷ne Bet-sur ne Soko ne Adulam,

⁸ne Gat ne Maresa ne Sif,

⁹ne Adoraim ne Lakis ne Aseka,

¹⁰ne Sora ne Ayalon ne Hebron a ɛyɛ Yuda ne Benyamin mu nkurow a ɛyɛ den no.

¹¹Na ɔhyehyɛɛ nkurow no den, na ɔde asafohene ne aduan ne ngo ne nsa akorade kokɔɔ mu.

¹²Na ɔde akyɛm ne mpeaw korakoraa nkurow no nyinaa mu, na ɔhyehyɛɛ nkurow no den pa ara. Na Yuda ne Benyamin wɔ no.

¹³Na asɔfo ne Lewifo a wɔwɔ Israel nyinaa fi wɔn nsaase nyinaa so begyinaa n’akyi.

¹⁴ Na Lewifo no gyigyaw wɔn nkurow ho mfikyisaase ne wɔn agyapade, na wɔbaa Yuda ne Yerusalem, efisɛ Yeroboam ne ne mma tutuu wɔn sɛ wonnni AWURADE asɔfo,

¹⁵ na ɔhyehyɛɛ n’asɔfo maa sorɔnsorɔmmea no ne mpapo ne anantwi mma a ɔyɛe no.

¹⁶Na wɔn akyi no wɔn a wɔde wɔn koma mae sɛ wɔbɛhwehwɛ AWURADE Israel Nyankopɔn no fifii Israel mmusuakuw nyinaa mu baa Yerusalem, sɛ wɔbɛbɔ afɔre ama AWURADE wɔn agyanom Nyankopɔn no.

¹⁷Na wɔmaa Yuda ahenni no yɛɛ den, na wɔhyɛɛ Solomon ba Rehoboam den mfirihyia abiɛsa, efisɛ wɔnantew Dawid ne Solomon kwan so mfe abiɛsa.

¹⁸ Na Rehoboam waree Mahalat a ɔyɛ Dawid ba Yerimot babea ne Abihail a ɔyɛ Yese ba Eliab babea,

¹⁹na ɔwoo mma, Yeus ne Semaria ne Saham.

²⁰Na ɛno akyi no, ɔwaree Absalom ba Maaka, na ɔwoo Abigya ne Atai ne Sisa ne Selomit maa no.

²¹Na Rehoboam dɔ Absalom ba Maaka sen ne yerenom ne ne yefamnom nyinaa, na ɔwaree yerenom dunwɔtwe ne yefam aduosia, na ɔwowoo mmammarima aduonu awotwe ne mmabea aduosia.

²²Na Rehoboam de Maaka ba Abigya dii ne nuanom no mu ti ne panyin, na ɔpɛe sɛ osi no hene.

²³ Na odii no nyansam, na ɔde ne mmammarima no nyinaa mu binom sisii Yuda ne Benyamin nsaase no nyinaa so, nkurow a ɛyɛ den no nyinaa mu, na ɔde akɔnhamabɔde bebree maa wɔn, na ogyigyee mmea bebree aware momaa wɔn.