Read Revised Akuapem Twi DC-KYERƐW KRONKRON Nehemia 4 Bible Online

Nehemia 4 - Revised Akuapem Twi DC-KYERƐW KRONKRON bible

Nehemia 4

¹ Na Sanbalat tee sɛ yɛreto ɔfasu no no, ne bo hurui na onyaa abufuw pii pa ara, na odii Yudafo no ho fɛw.

²Na ɔkae ne nuanom ne Samaria atumfo no anim sɛ: Dɛn na Yudafo nyamoonyamoofo yi reyɛ yi? So wɔmma wɔn kwan? So, wɔbɛbɔ afɔre? So wobewie no nnɛ ara? So wobenyannyan abo no afi afabo akuwakuw a ahyehyew no mu?

³Na Amonni, Tobia a ogyina ne nkyɛn no kae sɛ: Yiw, nea wɔreto yi mpo, sɛ sakraman foro a, obebubu wɔn abo fasu no.

⁴ Tie, yɛn Nyankopɔn, sɛ yɛabɔ adapaa, na dan wɔn ahohora bua wɔn atifi, na fa wɔn yɛ odwen nnommumfa asase so,

⁵na nkata wɔn amumɔyɛ so, na wɔn bɔne nso, mma wɔmmpopa w’anim, na wɔafuw wo bo abantofo no anim.

⁶Na yɛtoo ɔfasu no, na wɔtoatoaa ɔfasu no nyinaa koduu ne fa so, na ɔman no nyaa koma pa de yɛe.

⁷Na Sanbalat ne Tobia ne Arabiafo ne Amonfo ne Asdodfo no tee sɛ wɔatoatoa Yerusalem afasu no ahyia na wɔafi ase retuatua ntokuru no, wɔn bo fuwii sɛ,

⁸na wɔn nyinaa kɔɔ apam yɛɛ biako sɛ wɔreba ne Yerusalem abɛko, na wɔayɛ no sakasaka.

⁹Na yɛbɔɔ yɛn Nyankopɔn mpae, na wɔn nti, yesisii awɛmfo awia ne anadwo, wɔn anim.

¹⁰Na Yuda kae sɛ: Nnosoasoafo no ahoɔden so ahuan, na afabo no nso dɔɔso, enti yɛrentumi nto afasu no.

¹¹Na yɛn ahohiafo no kae sɛ: Mommma wɔnnte na wonnhu nkosi sɛ yebedu wɔn mu akunkum wɔn ama adwuma no to atwa.

¹²Na Yudafo a wɔtete wɔn ho no fi nkurow no nyinaa mu bɛka kyerɛɛ yɛn bɛyɛ mpɛn du sɛ wɔrepam yɛn ho apammɔne.

¹³Ɛnna mede nnipa misisii ase ase hɔnom, ɔfasu no akyi, nea ɛhɔ da hɔ no, na mede ɔman no misisii sɛ wɔn mmusua te, wɔde wɔn nkrante ne wɔn mpeaw ne wɔn ta.

¹⁴ Na mekɔhwɛe, na mesɔree, na misee mmakoma ne mpanyimfo ne ɔman no nkae sɛ: Munnsuro wɔn anim, AWURADE kɛse a ne ho yɛ hu no mmom na monkae no, na monko mma mo nuanom ne mo mmammarima ne mo mmabea ne mo yerenom ne mo afi.

¹⁵ Na yɛn atamfo no tee sɛ wɔabɛka akyerɛ yɛn no, Onyankopɔn maa wɔn agyina no yɛɛ ɔkwa. Na yɛn nyinaa san baa ɔfasu no ho kokɔɔ yɛn adwuma so.

¹⁶Na efi da no, me mmerante no fa fraa mu yɛɛ adwuma, na wɔn mu fa nso kurakuraa mpeaw ne akyɛm ne ta ne amiade mu, na asafohene no gyinaa Yuda fi nyinaa akyi.

¹⁷Wɔn a wɔreto ɔfasu no ne wɔn a wɔsoso nnosoa ne wɔn a wɔsoasoa wɔn no, wɔde nsa biako reyɛ adwuma, na wɔde biako kura dade mu.

¹⁸Na wɔn a wɔto no nyinaa bobɔ wɔn nkrante wɔ wɔn asen na wɔde to; na torobɛntohyɛnfo no wɔ me nkyɛn.

¹⁹Na misee mmakoma ne mpanyimfo ne ɔman no nkae sɛ: Adwuma no dɔɔso, na emu trɛw na yɛn nso yɛapaepae yɛn mu ɔfasu no so, onipa ne ne yɔnko ntam ware.

²⁰Enti baabiara a mobɛte torobɛnto nka no, ɛhɔ na mommoa mo ho ano mmehyia yɛn nkyɛn: Yɛn Nyankopɔn bɛko ama yɛn.

²¹Saa na yɛyɛɛ adwuma no. Na wɔn mu fa kurakura mpeaw fi adekyee kosi sɛ nsoromma pue.

²²Nso bere no ara mu no, misee ɔman no sɛ: Onipa biara nipa ne ne somfo nna Yerusalem, na wɔnyɛ yɛn awɛmfo anadwo ne adwumayɛfo awia.

²³Na me ne me nuanom ne m’asomfo ne awɛmfo a wodi m’akyi no, yɛanyiyi yɛn ntade, obiara kura ne dade.