Read Revised Akuapem Twi DC-KYERƐW KRONKRON Eksodɔs 1 Bible Online

Eksodɔs 1 - Revised Akuapem Twi DC-KYERƐW KRONKRON bible

Eksodɔs 1

¹ Na eyinom ne Israel mma a wɔne Yakob baa Misraim no din. Wɔn mu biara ne ne fifo na ɛbae.

²Ruben, Simeon, Lewi ne Yuda,

³Isakar, Sebulon ne Benyamin,

⁴Dan ne Naftali, Gad ne Aser.

⁵ Na akra a wofi Yakob asen mu nyinaa si akra aduɔsɔn; na Yosef wɔ Misraim dedaw.

⁶ Na Yosef ne ne nuanom nyinaa ne wɔn bere sofo no nyinaa wuwui.

⁷ Na Israel mma no wowoe, na wɔdɔe pii pa ara, na wɔn ase fɛee, na wɔn ho yɛɛ den papaapa; na wɔyɛɛ asase no so ma.

⁸Na ɔhene foforo bi a onnim Yosef bedii Misraim so.

⁹Na ɔka kyerɛɛ ne man sɛ: Hwɛ, Israelfo no dɔɔso, na wɔn ho yɛ den sen yɛn.

¹⁰Momma yɛmpɛ nyansa kwan bi mfa wɔn mfa so, na wɔannɔɔso, na sɛ ɔsa bi ba a, wɔankɔdɔm yɛn atamfo ne yɛn ammɛko, na wɔansɔre asase yi so ankɔ.

¹¹ Na wosisii wɔn so adwumayɛfo so mpanyimfo sɛ wɔmfa nnwuma a ɛyɛ den nhyɛ wɔn so. Na wɔkyekyeree adekora nkurow Pitom ne Rameses maa Farao.

¹²Nanso dodow a wɔhyɛɛ wɔn so no, dodow ara na wɔdɔe, na wɔtrɛwee. Na Misraimfo suroo Israelfo no.

¹³Na wɔde anyadi yawyaw dii Israelfo,

¹⁴na wɔmaa wɔn asetena fonoo wɔn wɔ dɔte ne ntayaa ho adwuma den ne afum adwumayɛ ahorow nyinaa, ne nnwuma horow nyinaa mu nyadi yawyaw a wɔde dii wɔn mu.

¹⁵Na Misraim hene ka kyerɛɛ Hebrifo awogyefo a wɔn mu biako din de Sifra, na obiako din de Pua no sɛ:

¹⁶Sɛ mokogye Hebrifo mmea awo, na muhu agua no so sɛ ɔyɛ ɔbarima a, munkum no; na sɛ ɔyɛ ɔbea de a, momma ɔntena ase.

¹⁷Na awogyefo no suro Onyankopɔn, enti wɔanyɛ sɛnea Misraim hene ka kyerɛɛ wɔn no, na mmom wogyee mmammarima no nkwa.

¹⁸Na Misraim hene frɛɛ awogyefo no ka kyerɛɛ wɔn sɛ: Ɛdɛn nti na moyɛ saa, na moma mmarima no tena ase?

¹⁹Na awogyefo no ka kyerɛɛ Farao sɛ: Hebrifo mmea nte sɛ Misraimfo mmea, na wɔn de, wɔyɛ pirimpirim; awogyefo no nnya nnuu wɔn nkyɛn no, na wɔawo dedaw.

²⁰Enti Onyankopɔn ne awogyefo no dii no yiye. Na nkurɔfo no dɔɔso ara, na wɔyɛɛ den yiye.

²¹Na esiane sɛ awogyefo no suro Onyankopɔn nti, ɔmaa wɔn afi mu yɛɛ yiye.

²²Ɛnna Farao hyɛɛ ne man nyinaa sɛ: Ɔbabanin biara a wɔbɛwo no no, monkɔtow no nkyene asubɔnten Nil mu, na mmabea nyinaa de, momma wɔntena hɔ.